Tikhulu 1:1-36
1 Ngemuva kwekufa kwaJoshuwa,+ ema-Israyeli* abuta Jehova+ atsi: “Ngubani emkhatsini wetfu lokufanele akhuphuke kucala kuyokulwa nemaKhenani?”
2 Jehova waphendvula watsi: “NguJuda lokufanele akhuphuke kucala.+ Lelive ngilinikela* esandleni sakhe.”
3 Sive sakaJuda sabese sitsi esiveni sakaSimeyoni lesibomnakabo: “Khuphukani natsi siye eveni lesabelwe*+ lona kuze silwe nemaKhenani. Ngemuva kwaloko sitawubese siya eveni lenabelwe lona.” Ngako sive sakaSimeyoni sahamba nesive sakaJuda.
4 Ngesikhatsi bakaJuda bakhuphukela kuyokulwa, Jehova wanikela emaKhenani kanye nemaPheresi esandleni sabo+ futsi bancoba emadvodza langu-10 000 eBhezeki.
5 Batfola Adoni-bhezeki endzaweni yaseBhezeki futsi balwa naye, bancoba nemaKhenani+ nemaPheresi.+
6 Ngesikhatsi Adoni-bhezeki abaleka, bamcosha, bambamba, base bamjuba titfupha kanye nabobhozo.
7 Adoni-bhezeki wase utsi: “Kunemakhosi langu-70 lajutjwa titfupha nabobhozo futsi atfola kudla ngephansi kwelitafula lami. Nkulunkulu sewente kimi njengobe nami ngentile.” Babese bamletsa eJerusalema+ futsi wafela lapho.
8 Ngetulu kwaloko, emadvodza akaJuda alwa neJerusalema+ futsi ayincoba; ayihlasela ngenkemba ase okhela lelidolobha ngemlilo.
9 Ngemuva kwaloko emadvodza akaJuda ehla ayokulwa nemaKhenani labekahlala esifundzeni lesinetintsaba, eNegebhu naseShefela.+
10 Ahamba ayokulwa nemaKhenani labehlala eHebroni (ekucaleni iHebroni bekutsiwa yiKhiriyathi-abha), futsi abulala Sheshayi, Ahimani naThalmayi.+
11 Nakesuka lapho, lamadvodza akaJuda ahamba ayokulwa nebantfu baseDebiri.+ (Ekucaleni iDebiri bekutsiwa yiKhiriyathi-seferi.)+
12 Khalebi+ wase utsi: “Umuntfu lotawuhlasela iKhiriyathi-seferi aphindze ayincobe ngitamendzisela Akhisa indvodzakati yami.”+
13 Othniyeli+ indvodzana yaKhenazi,+ umnakabo Khalebi lomncane wayincoba. Ngako Khalebi wamendzisela Akhisa indvodzakati yakhe.
14 Ngesikhatsi Akhisa aya ekhaya, wancenga indvodza yakhe kutsi icele insimu kubabe wakhe. Ngemuva kwaloko Akhisa wehla embongolweni* labekayigibele. Khalebi wambuta watsi: “Ufunani?”
15 Akhisa watsi: “Ngicela ungibusise. Njengobe unginikete indzawo eningizimu,* ngicela uphindze unginike neGulothi-mayimu.”* Ngako Khalebi wamniketa iGulothi Lengenhla kanye neGulothi Lengentasi.
16 Ngemuva kwaloko bantfwana bababetala waMosi+ lobekangumKheni+ bakhuphuka basuka edolobheni lelinetihlahla telusundvu+ bakanye nebantfu bakaJuda, baya ehlane lakaJuda eningizimu ye-Aradi.+ Bahamba baya kuleyondzawo bafike bahlala nebantfu bakhona.+
17 Kodvwa sive sakaJuda sahamba nesive sakaSimeyoni lesibomnakabo sayohlasela emaKhenani labehlala eSefathi futsi sayibhubhisa.+ Setsa lelidolobha satsi yiHoma.*+
18 Ngemuva kwaloko sive sakaJuda sancoba iGaza+ nendzawo yayo, i-Ashkeloni+ nendzawo yayo kanye ne-Ekroni+ nendzawo yayo.
19 Jehova wasisekela sive sakaJuda futsi satsatsa sifundza lesinetintsaba, kepha asizange sikhone kucosha bantfu lebebahlala etsafeni, ngobe bebanetincola temphi letinemasikela ensimbi.*+
20 Lesive sanika Khalebi iHebroni njengobe Mosi beketsembisile,+ futsi wacosha emadvodzana lamatsatfu a-Anaki+ kuleyondzawo.
21 Sive sakaBhenjamini naso asizange siwacoshe emaJebhusi labekahlala eJerusalema, ngako emaJebhusi achubeka nekuhlala nesive sakaBhenjamini eJerusalema kuze kube ngulamuhla.+
22 Ngaleso sikhatsi, indlu yaJosefa+ yakhuphuka yayokulwa neBetheli futsi Jehova bekanayo.+
23 Yatfuma tinhloli kutsi tiyohlola iBetheli (esikhatsini lesendlulile lelidolobha bekutsiwa yiLuzi),+
24 futsi letinhloli tabona indvodza iphuma kulelidolobha. Tase titsi kuyo: “Sicela usikhombise indlela lengena kulelidolobha, tsine sitakuphatsa kahle.”*
25 Ngako lendvodza yatikhombisa indlela lengena kulelidolobha futsi tahlasela lelidolobha ngenkemba, kodvwa tayikhulula lendvodza kanye nawo wonkhe umndeni wayo.+
26 Lendvodza yahamba yaya eveni lemaHethi yafike yakha lidolobha, yalibita ngekutsi yiLuzi, lokuligama lalo kuze kube ngulamuhla.
27 Sive sakaManase asizange siyitsatse iBhethi-sheyani kanye nemadolobha laseceleni* kwayo, iThanaki+ nemadolobha laseceleni kwayo, iDori nemadolobha laseceleni kwayo, iJibleyamu nemadolobha laseceleni kwayo kanye neMegido nemadolobha laseceleni kwayo.+ EmaKhenani achubeka ahlala ngenkhani kulelo live.
28 Ngesikhatsi sive saka-Israyeli siba nemandla, sacindzetela emaKhenani kutsi abe tigcili+ kodvwa asizange siwacoshe ngalokuphelele.+
29 Ngisho nesive saka-Efrayimu asizange siwacoshe emaKhenani labekahlala eGezeri. EmaKhenani achubeka ahlala naso eGezeri.+
30 Sive sakaZebuloni asizange sibacoshe bantfu baseKhitroni nebaseNahaloli.+ EmaKhenani achubeka ahlala naso futsi sawacindzetela kutsi abe tigcili.+
31 Sive saka-Asheri asizange sibacoshe bantfu base-Akho, baseSidoni,+ base-Ahilabi, base-Akzibi,+ baseHelba, base-Afiki+ nebaseRehobu.+
32 Ngako sive saka-Asheri sachubeka sihlala nemaKhenani akuleyo ndzawo, ngobe asiwacoshanga.
33 Sive sakaNaftali asizange sibacoshe bantfu baseBhethi-shemeshi nebaseBhethi-anathi+ kodvwa sachubeka sihlala nemaKhenani akuleyo ndzawo.+ Bantfu baseBhethi-shemeshi nebaseBhethi-anathi baba tigcili taso.
34 Bantfu labangema-Amori bavimbela sive sakaDani kutsi singehli esifundzeni lesinetintsaba, ngobe bebangafuni kusivumela kutsi sehlele kulelitsafa.+
35 Sive sema-Amori sachubeka sihlala ngenkhani eNtsabeni iHeresi, e-Ayaloni+ kanye naseShalbimu.+ Kodvwa ngesikhatsi emandla* endlu yaJosefa akhula,* sive sema-Amori sentiwa tigcili.
36 Indzawo yesive sema-Amori beyisuka emgwacweni lowenyukelako wase-Akrabhimu,+ futsi beyisuka naseSela kukhuphuke.
Imibhalo lengentansi
^ NgesiHebheru kutsi, “emadvodzana aka-Israyeli.”
^ Nobe “Nginikele.”
^ NgesiHebheru kutsi, “esabelweni sami.”
^ Kungaphindze kubekwe ngekutsi, “washaya tandla asekulembongolo.”
^ Nobe “iNegebhu.”
^ Lokusho kutsi “Tiyalu Temanti.”
^ Lokusho kutsi “Kunikela Ekubhujisweni.”
^ NgesiHebheru kutsi, “tincola tensimbi.”
^ NgesiHebheru kutsi, “sitakubonisa umusa.”
^ Nobe “lebekakhelene.”
^ NgesiHebheru kutsi, “sandla.”
^ NgesiHebheru kutsi, “aba manyenti.”