Tikhulu 12:1-15
12 Ngemuva kwaloko emadvodza aka-Efrayimu abitelwa ndzawonye futsi ewelela eSafoni,* afike atsi kuJeftha: “Awukasibiti leni kutsi sihambe nawe ngesikhatsi uyokulwa nebaka-Amoni?+ Ngako sitawushisa indlu yakho nawe ekhatsi.”
2 Kodvwa Jeftha watsi kuwo: “Mine kanye nebantfu bami besinekungevani lokukhulu nebaka-Amoni. Ngilucelile lusito lwenu, kodvwa anikangisindzisi esandleni sabo.
3 Ngitsite nangibona kutsi angeke ningisite, ngase ngincuma kubeka kuphila kwami engotini, ngahamba ngayokulwa nebaka-Amoni+ futsi Jehova ubanikele kimi. Manje kungani-ke lamuhla nite kutekulwa nami?”
4 Jeftha wabese ubutsela ndzawonye onkhe emadvodza akaGileyadi+ futsi balwa nebaka-Efrayimu. Emadvodza akaGileyadi asincoba sive saka-Efrayimu lebesitsite: “Nine bakaGileyadi lenisemkhatsini webaka-Efrayimu nebakaManase nimane nje nibakhoseli labasuka ku-Efrayimu.”
5 BakaGileyadi batsatsa ematubuko aseJordane+ lasembikwaka-Efrayimu, futsi nakwenteka emadvodza aka-Efrayimu etama kubaleka, bekatsi: “Ngicela ningivumele ngewelele ngesheya”; ngemuva kwaloko emadvodza akaGileyadi bekabuta ngamunye wawo atsi: “Ungum-Efrayimu yini?” Nakaphendvula atsi: “Cha!”
6 emadvodza akaGileyadi bekabese atsi: “Sicela utsi Shibholethi.” Kodvwa emadvodza aka-Efrayimu bekatsi: “Sibholeti” ngobe bekangakhoni kulibita kahle leligama. Ngemuva kwaloko bakaGileyadi bebabese bayawabamba futsi bawabulalele ematubukweni aseJordane. Ngako ngaleso sikhatsi kwafa bantfu baka-Efrayimu labangu-42 000.
7 Jeftha wehlulela ema-Israyeli iminyaka lesitfupha, ngemuva kwaloko Jeftha umGileyadi wafa futsi wangcwatjwa edolobheni lakhe kaGileyadi.
8 Ibsani waseBhetlehema wehlulela ema-Israyeli ngemuva kwaJeftha.+
9 Abenemadvodzana langu-30 nemadvodzakati langu-30. Wendzisa emadvodzakati akhe emadvodzeni langasiwo esive sakhe, futsi watsatsela emadvodzana akhe bafati labangu-30 labangasibo besive sakhe. Wehlulela ema-Israyeli iminyaka lengu-7.
10 Ngemuva kwaloko Ibsani wafa futsi wangcwatjwa eBhetlehema.
11 Ngemuva kwakhe, Eloni umZebuloni waba ngumehluleli wema-Israyeli. Wawehlulela iminyaka lengu-10.
12 Ngemuva kwaloko Eloni umZebuloni wafa futsi wangcwatjwa e-Ayaloni, endzaweni yebakaZebuloni.
13 Ngemuva kwakhe, Abdoni indvodzana yaHileli umPhirathoni wehlulela ema-Israyeli.
14 Abenemadvodzana langu-40 nebatukulu labadvuna labangu-30, futsi bonkhe bebagibela timbongolo letingu-70. Wehlulela ema-Israyeli iminyaka lengu-8.
15 Ngemuva kwaloko Abdoni indvodzana yaHileli umPhirathoni wafa, futsi wangcwatjwa ePhirathoni endzaweni yebaka-Efrayimu, entsabeni yema-Amaleki.+
Imibhalo lengentansi
^ Kungaphindze kubekwe ngekutsi, “ewelela ngasenyakatfo.”