Tikhulu 15:1-20
-
Samsoni uyatiphindziselela kumaFilisti (1-20)
15 Ngemuva kwesikhatsi lesitsite, ngemalanga ekuvuna kolo, Samsoni wahamba wayovakashela umfati wakhe, aphetse imbuti leseyincane. Watsi: “Ngicela kungena ngiye kumfati wami ekamelweni.”* Kodvwa babetala wakhe akazange amvumele.
2 Babetala waSamsoni watsi: “Bengicabanga kutsi uyamenyanya.+ Ngako ngimnikete lelinye lijaha lebeliyimphekeleteli yakho.+ Dzadzewabo losemncane akasimuhle yini kwendlula yena? Ngicela utsatse yena esikhundleni semfati wakho.”
3 Kodvwa Samsoni watsi: “Nyalo emaFilisti akukafaneli angisole ngekuwalimata.”
4 Ngako Samsoni wahamba futsi wabamba timphungushe letingu-300. Ngemuva kwaloko watsatsa tibane, wafulatselisa letimphungushe ngatimbili wase utibopha ngemisila futsi emkhatsini wemisila lemibili wafaka sibane sinye.
5 Wabese ulumeka letibane ngemlilo futsi wakhulula letimphungushe kutsi tiye emasimini emaFilisti akolo longakavunwa. Washisa konkhe, kusuka etitfungweni takolo kuya kukolo longakavunwa, washisa nemasimu emagilebisi netihlahla temncumo.
6 EmaFilisti abuta atsi: “Ngubani lowente loku?” Atjelwa kwatsiwa: “NguSamsoni umkhwenyane wemThimna ngobe babetala wakhe utsetse umfati waSamsoni wamnika lelinye lijaha lebeliyimphekeleteli yakhe.”+ Atsi nakeva loko, emaFilisti akhuphuka ayoshisa lomfati waSamsoni kanye nababe wakhe ngemlilo.+
7 Ngemuva kwaloko, Samsoni watsi: “Nangabe nenta ngalendlela, nami angeke nginiyekele kuze kube ngulapho ngitiphindziselela kini.”+
8 Ngako wawabulala, lomunye ngemuva kwalomunye* futsi wabulala linyenti lawo. Ngemuva kwaloko wehlela emhumeni* losedvwaleni lelise-Etamu, wafike wahlala khona.
9 Ngemuva kwesikhatsi, emaFilisti akhuphuka futsi amisa emathende kaJuda, ahambahamba eLehi.+
10 Emadvodza akaJuda atsi: “Kungani nite kutesihlasela?” EmaFilisti wona aphendvula atsi: “Site kutobamba* Samsoni, sente kuye njengobe naye entile kitsi.”
11 Ngako emadvodza akaJuda langu-3 000 ehlela kulomhume* losedvwaleni lelise-Etamu, afike atsi kuSamsoni: “Awati yini kutsi sibuswa ngemaFilisti?+ Manje ukwenteleni loku kitsi?” Yena watsi: “Nami ngente kuwo njengobe nawo entile kimi.”
12 Kodvwa lamadvodza atsi kuye: “Sitele kutokubamba* futsi sikunikele kumaFilisti.” Samsoni wase utsi: “Fungani kimi kutsi angeke ningihlasele.”
13 Lamadvodza atsi kuye: “Cha, sitakubopha nje kuphela bese sikunikela kuwo, kodvwa angeke sikubulale.”
Ngako ambopha ngetintsambo letinsha letimbili ase ayamkhipha kulelidvwala.
14 Watsi nakefika eLehi, emaFilisti amemeta ajabulile nakahlangana naye. Umoya waJehova wabese unika Samsoni emandla,+ futsi letintsambo lebetisetandleni takhe tafana nemtiya welineni loshiswe ngumlilo. Letintsambo tanyomuka etandleni takhe.+
15 Wabese utfola umhlatsi losemusha wembongolo lendvuna, wawutsatsa futsi wabulala ngawo emadvodza langu-1 000.+
16 Ngemuva kwaloko, Samsoni watsi:
“Ngemhlatsi wembongolo kube nendvundvuma yinye, netindvundvuma letimbili!
Ngemhlatsi wembongolo ngibulele emadvodza langu-1 000.”+
17 Watsi nakacedza kukhuluma, walahla lomhlatsi futsi lendzawo wayibita ngekutsi yiRamathi-lehi.*+
18 Samsoni wabese woma kakhulu futsi wakhala kuJehova watsi: “Nguwe losindzise inceku yakho kakhulu kangaka. Kodvwa nyalo sekufanele ngibulawe koma futsi ngifele etandleni talabangakasoki?”
19 Ngako Nkulunkulu wavula umsele lobewuseLehi futsi emanti ageleta kuwo.+ Ngesikhatsi Samsoni asanatsa, umoya* wakhe wabuya wase uphindze uba nemandla. Kungako lendzawo ayibita ngekutsi yi-Eni-hakhore,* futsi iseLehi kuze kube ngulamuhla.
20 Samsoni wehlulela ema-Israyeli iminyaka lengu-20+ ngesikhatsi semaFilisti.
Imibhalo lengentansi
^ Nobe “ekamelweni lelingekhatsi.”
^ NgesiHebheru kutsi, “wawabulala wabeka umlente etikwelitsanga.”
^ Nobe “emgedzeni.”
^ Nobe “kutobopha.”
^ Nobe “kulomgedze.”
^ Nobe “kutokubopha.”
^ Lokusho kutsi “Indzawo Lephakeme Yemhlatsi.”
^ Nobe “emandla.”
^ Lokusho kutsi “Umtfombo Waloyo Lokhalako.”
