Tikhulu 19:1-30
-
Licala lebakaBhenjamini leliphatselene nekuya ecansini eGibeya (1-30)
19 Ngalawo malanga, ngesikhatsi kute inkhosi ka-Israyeli,+ umLevi lobekahlala endzaweni lekhashane lesesifundzeni lesinetintsaba saka-Efrayimu+ watsatsa umfati lomncane eBhetlehema+ yakaJuda.
2 Kodvwa lomfati lomncane walomLevi bekangaketsembeki kuye ngako washiya lendvodza yakhe wabuyela endlini yababe wakhe eBhetlehema yakaJuda. Wahlala lapho tinyanga letine.
3 Indvodza yakhe yaya kuyomncenga kutsi abuye; beyihamba nenceku yayo kanye netimbongolo letimbili. Lomfati wangenisa lendvodza yakhe endlini yababe wakhe. Ngesikhatsi babetala wayo ayibona, wajabula.
4 Ngako babetala walendvodza, lokungubabe walomfati lomncane wayincenga kutsi ihlale emalanga lamatsatfu. Bebadla baphindze banatse futsi beyilala lapho busuku bonkhe.
5 Ngelilanga lesine, nabavuka ekuseni kakhulu futsi sebalungele kuhamba, babe walomfati lomncane watsi kulomkhwenyane wakhe: “Akube khona lenikudlako lokutaninika emandla,* bese-ke niyahamba.”
6 Ngako bahlala phansi base bacala kudla nekunatsa ndzawonye, ngemuva kwaloko babe walomfati lomncane watsi kulendvodza: “Ngicela ulale lapha kulobusuku futsi utijabulise.”*
7 Ngesikhatsi lendvodza seyilungela kuhamba, babetala wayo wachubeka ayincenga ngako yaphindze yalala lobunye busuku.
8 Nayivuka ekuseni kakhulu ngelilanga lesihlanu kuze ihambe, babetala wayo watsi: “Ngicela kube khona lenikudlako lokutaninika emandla.”* Bebabamba bayekela kwaze kwaba nguntsambama futsi bebachubeka badla.
9 Ngesikhatsi lendvodza seyilungele kuhamba inemfati wayo lomncane nenceku yayo, babetala wayo, lokungubabe walomfati lomncane watsi kuyo: “Sekuvele kuyahlwa, ngicela uphindze ulale lobunye busuku, ngobe selivele liyashona. Ngicela ulale futsi utijabulise. Kusasa-ke ungavuka ekuseni kakhulu utsatse luhambo ubuyele ekhaya.”*
10 Kodvwa lendvodza beyingasafuni kuphindze ilale lobunye busuku ngako yesuka yahamba yaze yayofika eJebhusi lokuyiJerusalema.+ Beyihamba netimbongolo tayo letimbili letetfwele umtfwalo, kanye nemfati wayo lomncane nenceku yayo.
11 Ngesikhatsi sebasondzele eJebhusi, lilanga beseliyoshona. Ngako lenceku yatsi enkhosini yayo: “Kungaba njani sale sima kulelidolobha lemaJebhusi futsi silale khona kulobusuku?”
12 Kodvwa lenkhosi yayo yayiphendvula yatsi: “Akukafaneli sime edolobheni lebantfu baletinye tive labangasiwo ema-Israyeli. Sitawuhamba size siyofika eGibeya.”+
13 Ngemuva kwaloko yatsi kulenceku yayo: “Asihambe futsi asizame kufika kulenye yaletindzawo, sitawulala eGibeya nobe eRama.”+
14 Ngako bahamba futsi lilanga lacala kushona nasebasedvute neGibeya, lebekuyindzawo yesive sakaBhenjamini.
15 Befike bema lapho base bangena eGibeya kuze balale khona. Nasebangenile, bahlala esigcawini salelidolobha, kodvwa kute loweta kubo kuze abatsatse bayolala endlini yakhe.+
16 Ekugcineni kulobo busuku, kwefika indvodza leseyikhulile ibuya kuyosebenta emasimini. Beyiyasesifundzeni lesinetintsaba saka-Efrayimu+ futsi beseyinesikhatsi ihlala eGibeya kodvwa takhamuti takulelodolobha bekubantfu besive sakaBhenjamini.+
17 Ngesikhatsi lendvodza iphakamisa emehlo futsi ibabona esigcawini selidolobha, yatsi kubo: “Niyaphi futsi nichamukaphi?”
18 LomLevi waphendvula watsi: “Sisuka eBhetlehema yakaJuda siya endzaweni lekhashane lesesifundzeni lesinetintsaba saka-Efrayimu, lapho ngivela khona. Bengiye eBhetlehema yakaJuda,+ futsi nyalo ngiya endlini yaJehova* kodvwa kute longingenisa endlini yakhe.
19 Sinetinhlanga netjani lobenele bekondla timbongolo+ tetfu futsi sinesinkhwa+ neliwayini lokutakwenela mine, umkami kanye nalenceku yetfu. Kute lesikweswele.”
20 Kodvwa lendvodza leseyikhulile yatsi: “Shengatsi ningaba nekuthula! Ngicela kunakekela tonkhe tidzingo tenu. Kuphela nje ningalali lasigcawini salelidolobha.”
21 Ngako yabangenisa endlini yayo, yafike yanika letimbongolo talomLevi kudla.* Ngemuva kwaloko bageza tinyawo, badla base bayanatsa.
22 Ngesikhasi basatijabulisa, lamanye emadvodza langenangcondvo alelidolobha atungeletela lendlu futsi ashaya sivalo, achubeka atsi kulendvodza leseyikhulile lengumnikati walendlu: “Khipha lendvodza lengene landlini yakho kuze silale nayo.”+
23 Lendvodza lengumnikati walendlu yaphuma yafike yatsi kubo: “Kahleni bomnaketfu, ningayenti lentfo lembi. Ngiyanincenga, lendvodza isivakashi sami. Ngicela ningalenti lelihlazo lelingaka.
24 Nginanayi indvodzakati yami leyintfombi ntfo kanye nemfati lomncane walesivakashi. Ngicela kuniletsela bona futsi ningabenta nobe ngabe yini leniyifunako nangabe nifisa kwenta njalo.*+ Kepha ningalenti lelihlazo kulendvodza.”
25 Kodvwa lamadvodza awazange ayilalele lendvodza leseyikhulile, ngako lomLevi watsatsa lomfati wakhe lomncane,+ wamkhiphela ngephandle kulamadvodza. Amgagadlela futsi amhlukumeta busuku bonkhe kwaze kwasa. Ngemuva kwaloko amyekela wahamba nasekudzabuka kusa.
26 Ekuseni kakhulu lomfati wafike wawela emnyango wendlu yalendvodza leseyikhulile lapho bekunendvodza yakhe khona, futsi walala lapho kwaze kwasa.
27 Ngesikhatsi lendvodza lengumLevi ivuka ekuseni futsi ivula iminyango yalendlu kute ichubeke neluhambo lwayo, yabona lomfati wayo lomncane alele ngembili kwalendlu netandla takhe tisemnyango.
28 Lendvodza yatsi kulomfati: “Sukuma sihambe.” Kodvwa kute imphendvulo leyayitfola. Ngako yamtsatsa yamgibelisa kulembongolo futsi yahamba yaya ekhaya.
29 Nayifika endlini yayo, yatsatsa umukhwa, yabamba sidvumbu salomfati wayo lomncane yase isijuba emalungeni saba ticucu letingu-12. Yatsatsa sicucu ngasinye yasiyisa kuto tonkhe tindzawo taka-Israyeli.
30 Bonkhe lababona loko batsi: “Intfo lenjena ayikaze yenteke nobe ibonwe kusukela ngelilanga ema-Israyeli laphuma ngalo eveni laseGibhithe kuze kube ngulamuhla. Cabangisisani ngaloku,* nibonisane+ ngako bese niyasitjela kutsi kufanele senteni.”
Imibhalo lengentansi
^ Nobe “kuze kugcine tinhlitiyo tenu tiphila.”
^ Nobe “ujabulise inhlitiyo yakho.”
^ Nobe “kuze kugcine tinhlitiyo tenu tiphila.”
^ NgesiHebheru kutsi, “ethendeni lakho.”
^ Kungaphindze kubekwe ngekutsi, “futsi ngisebenta endlini yaJehova.”
^ Nobe “tinhlanga.”
^ Nobe “ningabahlukumeta futsi nente loko lenibona kulungile emehlweni enu.”
^ Nobe “Bekani tinhlitiyo tenu kuloku.”
