Tikhulu 4:1-24
4 Ngemuva kwekufa kwa-Ehudi, ema-Israyeli aphindze enta lokubi emehlweni aJehova.+
2 Ngako Jehova wawanikela esandleni saJabini inkhosi yaseKhenani+ lebeyibusa eHasori. Sikhulu selibutfo lakhe bekunguSisera, lobekahlala eHaroshethi+ yebantfu betive.*
3 Ema-Israyeli akhala kuJehova+ ngobe Jabini* abenetincola temphi letinemasikela ensimbi*+ letingu-900, futsi wacindzetela ema-Israyeli kamatima+ iminyaka lengu-20.
4 Debhora lobekangumphrofethikati+ futsi angumfati waLapidothi, nguye lobekehlulela ema-Israyeli ngaleso sikhatsi.
5 Bekavame kuhlala ngephansi kwesihlahla selusundvu emkhatsini weRama+ neBetheli+ esifundzeni lesinetintsaba saka-Efrayimu. Ema-Israyeli bekakhuphukela kuye kuze atfole tehlulelo letivela kuNkulunkulu.
6 Debhora watsi akuyobitwa Bharaki+ indvodzana ya-Abinowami eKhedeshi kulakaNaftali,+ wase utsi kuye: “Jehova Nkulunkulu wema-Israyeli ukunike umyalo lotsi: ‘Hamba uye* eNtsabeni iThabori, utsatse emadvodza langu-10 000 esiveni sakaNaftali kanye nesakaZebuloni ute nawo.
7 Ngitawuletsa Sisera, sikhulu selibutfo laJabini kanye netincola takhe temphi nemabutfo akhe esihosheni saseKhishoni+ futsi ngitamnikela esandleni sakho.’”+
8 Bharaki wamphendvula watsi: “Nangabe uhamba nami, ngitawuhamba kodvwa nawungahambi nami, angeke ngihambe.”
9 Debhora yena wamphendvula watsi: “Nome kanjani ngitawuhamba nawe. Kodvwa lomsebenti loyowenta angeke uletsele wena ludvumo ngobe Jehova utawunikela Sisera+ esandleni semfati.” Ngemuva kwaloko Debhora wasukuma wahamba naBharaki baya eKhedeshi.+
10 Bharaki wabitela ndzawonye sive sakaZebuloni nesakaNaftali+ eKhedeshi futsi emadvodza langu-10 000 amlandzela. NaDebhora wahamba naye.
11 Hebere wesive semaKheni+ abehlukene nesive sakubo, lokubantfwana baHobabi, longubabetala waMosi+ futsi wamisa lithende lakhe eceleni kwesihlahla lesikhulu eSananimu leseKhedeshi.
12 Sisera wabikelwa kutsi Bharaki indvodzana ya-Abinowami ukhuphukele eNtsabeni iThabori.+
13 Ngako wavele wabutsisa ndzawonye tonkhe tincola takhe temphi, lokutincola letingu-900 letinemasikela ensimbi,* kanye nawo onkhe emabutfo labekanaye basuka eHaroshethi yebantfu betive baya esihosheni saseKhishoni.+
14 Debhora wase utsi kuBharaki: “Khuphuka ngobe leli lilanga Jehova latawunikela ngalo Sisera esandleni sakho. Ciniseka kutsi Jehova uhamba embikwakho.” Ngako Bharaki wehla esuka eNtsabeni iThabori nemadvodza langu-10 000 labemlandzela.
15 Jehova wase ubangela kudideka+ kuSisera, nakuto tonkhe tincola takhe temphi kanye nakulo lonkhe libutfo lakhe embikwaBharaki. Ekugcineni Sisera wehla encoleni yakhe, wabaleka.
16 Bharaki wacosha letincola temphi kanye nalelibutfo waze wayewufika eHaroshethi yebantfu betive. Ngako lonkhe libutfo laSisera labulawa ngenkemba, kwangasindzi ngisho namunye.+
17 Kodvwa Sisera wabaleka ngetinyawo waze wayewufika ethendeni laJayeli+ umfati waHebere+ umKheni, ngobe bekunekuthula emkhatsini waJabini+ inkhosi yaseHasori kanye nendlu yaHebere umKheni.
18 Ngemuva kwaloko, Jayeli waphuma wayohlangabeta Sisera wase utsi kuye: “Ngena nkhosi yami, ngena lapha ngekhatsi. Ungesabi.” Ngako Sisera wangena kulelithende futsi Jayeli wamembatsisa ingubo.
19 Sisera wase utsi kuye: “Ngicela unginatsise emanti ngobe ngomile.” Ngako Jayeli wamvulela sikhwama sesikhumba lebesinelubisi wamnika futsi wanatsa,+ ngemuva kwaloko waphindze wamembatsisa.
20 Sisera wase utsi kuye: “Mani emnyango walelithende, futsi nakufika lotsite abute atsi: ‘Ikhona yini indvodza lelapha?’ ubomphendvula utsi: ‘Kute!’”
21 Kodvwa Jayeli umfati waHebere watsatsa sikhonkwane selithende kanye nesandvo. Ngemuva kwaloko ngesikhatsi Sisera akulobudze butfongo futsi adziniwe, wamnyonyobela wase ushayela lesikhonkwane emhlafunweni wakhe saphumela emhlabatsini, futsi Sisera wafa.+
22 Bharaki wefika acosha Sisera futsi Jayeli wase uyaphuma kuze amhlangabete, watsi: “Wota lapha ngitekukhombisa lendvodza loyifunako.” Bharaki wangena naJayeli ethendeni wabona Sisera afile, nalesikhonkwane selithende siphumele ngale kwemhlafuno wakhe.
23 Ngalelolanga Nkulunkulu wancoba Jabini inkhosi yemaKhenani embikwema-Israyeli.+
24 Sandla sema-Israyeli sacina kakhulu ngalokumelene naJabini inkhosi yemaKhenani,+ kwaze kwaba ngulapho sekambulele.+
Imibhalo lengentansi
^ Nobe “eHaroshethi-ha-goyimu.”
^ NgesiHebheru kutsi, “yena.”
^ NgesiHebheru kutsi, “tincola tensimbi.”
^ Nobe “Hamba uhlele bantfu bakho.”
^ NgesiHebheru kutsi, “tincola tensimbi.”
