Zakhariya 11:1-17
11 “Awu wena Lebanoni, vula iminyango yakho,Kuze umlilo utocotfula tihlahla takho temisedari.
2 Khalani nine tihlahla temjunipha ngobe setiwile tihlahla temisedari;Setibhujisiwe tihlahla letinkhulu!
Khalani nine tihlahla tem-okhi taseBhashani,Ngobe lihlatsi lelihlangene selibhujisiwe!
3 Lalelani! Belusi bayalila,Ngobe inkhatimulo yabo seyiphelile.
Lalelani! Emabhubesi lanemandla ayabhodla,Ngobe sekabhujisiwe emahlatsi lahlangene langaseJordane.
4 “Jehova Nkulunkulu wami utsi: ‘Yelusa timvu letibekelwe kuyohlatjwa.+
5 Bantfu labatitsengako bayatihlaba+ kepha ababekwa licala. Labo labatitsengisako+ batsi: “Shengatsi Jehova angadvunyiswa ngobe mine ngitawunjinga.” Ngisho nebelusi bato abativeli.’+
6 “Jehova utsi: ‘Angeke ngisabavela bantfu labahlala kulelive. Ngitawenta kutsi nguloyo naloyo acindzetelwe ngumakhelwane wakhe nenkhosi yakhe; batalicotfula lelive futsi angeke ngibakhulule esandleni sabomakhelwane babo.’”
7 Ngabese ngelusa letimvu letibekelwe kuyohlatjwa+ futsi loku ngakwentela nine timvu letihlushwako. Ngako ngatsatsa tindvuku letimbili, lenye ngayibita ngekutsi nguMusa, lelenye ngayibita ngekutsi nguBunye,+ futsi ngabese ngelusa letimvu.
8 Ngenyanga yinye ngacosha belusi labatsatfu, ngobe bengingasakhoni kubabeketelela futsi nabo bebangenyanya.
9 Ngatsi: “Angeke ngichubeke nginelusa. Loyo lofako akafe, loyo loshabalalako akashabalale, futsi labo labasele abadlane bodvwana.”
10 Ngako ngatsatsa lendvuku yami lebitwa ngekutsi nguMusa+ ngayijuba, ngephula sivumelwane lebengisente nabo bonkhe labantfu.
11 Lesivumelwane sephulwa ngalelolanga, futsi letimvu letihlushwako lebetingibukile tavele tabona kutsi leli bekulivi laJehova.
12 Ngabese ngitsi kubo bonkhe labantfu: “Nangabe kukuhle kini, ngiholeleni; kodvwa nangabe kungasinjalo, ningangiholeli.” Ngako bangiholela* tinhlavu telisiliva letingu-30.+
13 Jehova wabese utsi kimi: “Lemali lencane kangaka labayibona ingifanele yijikijele lakubekwa khona umcebo.”+ Ngako ngatsatsa letinhlavu telisiliva letingu-30, ngatijikijela lakubekwa khona umcebo endlini yaJehova.+
14 Ngabese ngijuba indvuku yami yesibili lebitwa ngekutsi nguBunye,+ ngacedza buhlobo emkhatsini waJuda na-Israyeli.+
15 Jehova watsi kimi: “Tsatsa tintfo letisetjentiswa ngumelusi longasiti ngalutfo.+
16 Ngitawuvuma kutsi kube nemelusi lotawelusa lelive. Angeke atinakekele timvu letifako,+ angeke ahambe ayofuna emazinyane etimvu, nobe elaphe letilimele+ nobe ondle leto letikhona kutimela. Esikhundleni saloko utawushwabadzela timvu letinonile,+ adzabudzabule netinselo tato.+
17 Maye kulomelusi longasiti ngalutfo+ futsi loshiya umhlambi!+
Inkemba itawulimata umkhono wakhe neliso lakhe langesekudla.
Umkhono wakhe utawushwaphana, wome nkwa!
Futsi liso lakhe langesekudla angeke lisabona lutfo.”*
Imibhalo lengentansi
^ NgesiHebheru kutsi, “bangikalela.”
^ NgesiHebheru kutsi, “litawubona kalufifi.”
