Zakhariya 12:1-14
12 Simemetelo:
“Leli livi laJehova lelimayelana na-Israyeli,” kusho Jehova,Loyo lowendlale emazulu,+Wakha netisekelo temhlaba,+Futsi wanika umuntfu umoya wekuphila.
2 “Ngitawenta iJerusalema ifanane nendzebe* yeliwayini leyenta kutsi tonkhe tive letiyitungeletile tidzayitele; futsi live lakaJuda litawuvinjetelwa, neJerusalema itawuvinjetelwa.+
3 Ngalelolanga ngitawenta iJerusalema ifanane nelitje lelisindzako* kuto tonkhe tive. Bonkhe bantfu labetama kuliphakamisa batawulimala kakhulu;+ futsi tonkhe letive titawubutsana ndzawonye timelane neJerusalema.”+
4 Jehova utsi: “Ngalelolanga, ngitawenta kutsi onkhe emahhashi esabe futsi labo labawagibele bahlanye. Emehlo ami atawuhlale abuke sive sakaJuda, kodvwa onkhe emahhashi ebantfu betive ngitawenta angaboni.
5 Baholi bakaJuda batawutsi etinhlitiyweni tabo: ‘Bantfu labahlala eJerusalema basinika emandla ngobe Jehova wemabutfo unguNkulunkulu wabo.’+
6 Ngalelolanga ngitawenta kutsi baholi bakaJuda bafanane nemlilo lovutsa ehlatsini, ngibente babe njengesibane lesivutsa emkhatsini wemalayini akolo lovuniwe,+ futsi batawucotfula bonkhe bantfu labangesekudla nalabangesencele.+ Bantfu baseJerusalema batawuphindze bahlale edolobheni labo,* lokulidolobha laseJerusalema.+
7 “Jehova utawucala ngekusindzisa emathende akaJuda, kuze ludvumo lwebantfu bendlu yaDavide nelwebantfu labahlala eJerusalema lungabi ngetulu kunelwebantfu bakaJuda.
8 Ngalelolanga, Jehova utabavikela bantfu labahlala eJerusalema;+ futsi ngalelolanga, loyo logileka awe* emkhatsini wabo utawuba nemandla njengaDavide, futsi bantfu bendlu yaDavide batawuba nemandla njengaNkulunkulu, batawufana nengilosi yaJehova lehola bantfu.+
9 Ngalelolanga, tonkhe tive letitohlasela iJerusalema ngitatibhubhisa ngalokukhulu kutimisela.+
10 “Ngitawutfululela umoya wami kubantfu bendlu yaDavide nakubantfu baseJerusalema, mine ngitabemukela futsi bona batawuncusa kimi. Batambuka loyo labamgwaza,+ bamkhalele kabuhlungu kube shengatsi bakhalela indvodzana yabo lekuphela kwayo; futsi batamlilela kabuhlungu kube shengatsi balilela indvodzana yabo lelitibulo.
11 Ngalelolanga, kutawuba nesililo lesikhulu eJerusalema kuhle kwesililo lesaba khona eHadadi Rimoni leseTsafeni laseMegido.+
12 Lelive litawulila, futsi umndeni ngamunye utawulila wodvwa, bantfu bendlu yaDavide batawulila bodvwa, nebafati bakhona balile bodvwa; bantfu bendlu yaNathani+ batawulila bodvwa, nebafati bakhona balile bodvwa;
13 bantfu bendlu yaLevi+ batawulila bodvwa, nebafati bakhona balile bodvwa; umndeni wemaShimeyi+ utawulila wodvwa, nebafati bakhona balile bodvwa;
14 umndeni ngamunye kuyo yonkhe imindeni lesele utawulila wodvwa, nebafati bakhona balile bodvwa.
Imibhalo lengentansi
^ Nobe “nendishi.”
^ Nobe “lelingumtfwalo.”
^ Nobe “endzaweni yabo lefanele.”
^ Nobe “lobutsakatsaka kakhulu.”
