Zakhariya 13:1-9
13 “Ngalelolanga, kuyawugujwa umtfombo wemanti kuze bantfu bendlu yaDavide nebantfu baseJerusalema bageze sono sabo kanye nekungcola kwabo.”+
2 Jehova wemabutfo utsi: “Ngalelolanga ngitatibhubhisa tithico takulelive,+ futsi angeke tiphindze tikhunjulwe; ngitawubasusa baphrofethi+ kulelive futsi kute lotawuba nemkhuba wekwenta tintfo letingcolile.
3 Nakungenteka umuntfu aphindze aphrofethe, batali bakhe batawutsi kuye: ‘Wena utawufa, ngobe ukhulume emanga egameni laJehova.’ Batali bakhe batamgwaza ngenca yekutsi uyaphrofetha.+
4 “Ngalelolanga, nguloyo naloyo mphrofethi utawuba nemahloni ngembono lawushoko nakaphrofetha; futsi angeke asayigcoka ingubo* yeboya+ yekukhohlisa bantfu.
5 Utawutsi: ‘Angisuye umphrofethi, kodvwa ngingumlimi, ngobe kusukela ngisemncane ngatsengwa kutsi ngibe sigcili.’
6 Nakwenteka lotsite ambuta atsi: ‘Ngewani lamanceba lasemtimbeni wakho?’* Utamphendvula atsi: ‘Lamanceba ngawatfola endlini yebangani bami.’”*
7 “Awu nkemba, vuka umelane nemelusi wami,+Umelane nemuntfu longumngani wami,” kusho Jehova wemabutfo.
“Shaya umelusi+ futsi uyekele umhlambi wetimvu uhlakateke;+Mine ngitawuphakamisa sandla sami ngimelane nalabo lababukelwa phansi.”
8 Jehova utsi: “Kulo lonkhe lelive,Bantfu labanyenti batawubulawa futsi bashabalale,*Kusale nje labambalwa kulo.
9 Labo labasele ngitabacwenga ngemlilo;Ngibacwenge njengalapho kucwengwa lisiliva,Futsi ngibavivinye njengalapho ligolide livivinywa ngemlilo.+
Batawubita libito lami,Mine ngibaphendvule.
Ngitawutsi: ‘Laba bantfu bami,’+Bona batawutsi: ‘Jehova nguNkulunkulu wetfu.’”
Imibhalo lengentansi
^ Nobe “ingubo yemphrofethi.”
^ NgesiHebheru kutsi, “lasemkhatsini wetandla takho?” Loku kusho esifubeni nobe emhlane.
^ Nobe “yebantfu labangitsandzako.”
^ Nobe “bafe.”
