Zakhariya 5:1-11
5 Ngaphindze ngaphakamisa emehlo, futsi ngabona umculu londizako.
2 Lengilosi yangibuta yatsi: “Ubonani?”
Ngayiphendvula ngatsi: “Ngibona umculu londizako, futsi ungemamitha langaba ngu-9* budze nemamitha langaba mane nehhafu* bubanti.”
3 Yabese itsi kimi: “Lesi sicalekiso lesiya kuwo wonkhe umhlaba, ngenca yekutsi bantfu labebako+ solo abakajeziswa, nanobe bacalekisiwe ngekwaloko lokubhalwe kulolunye luhlangotsi lwalomculu; nalabo labafunga emanga abakajeziswa, ngisho nobe kufunga+ emanga kucalekisiwe njengobe kubhalwe kulololunye luhlangotsi lwalomculu.
4 Jehova wemabutfo utsi: ‘Sengisitfumele lesicalekiso, futsi sitawungena endlini yemuntfu lowebako nasendlini yemuntfu lofunga emanga egameni lami; angeke sisuke kuleto tindlu kuze kube ngulapho siticotfula kanye netingodvo tato nematje ato.’”
5 Ngemuva kwaloko lengilosi lebeyikhuluma nami yasondzela kimi futsi yatsi: “Ngicela uphakamise emehlo akho ubuke kutsi kuyini lolokuphumako.”
6 Ngako ngayibuta ngatsi: “Kuyini?”
Yangiphendvula yatsi: “Lolokuphumako ngubhasikidi wekukala* kolo.” Yachubeka yatsi: “Lena yindlela lababukeka ngayo bantfu lababi labasemhlabeni wonkhe.”
7 Ngabona kutsi simbonyo salobhasikidi lesiyindingilizi futsi lesingumthofi besiphakanyisiwe. Bekunemfati lobekahleti ekhatsi kulobhasikidi.
8 Ngako yatsi: “Lomfati umelela Bubi.” Yabese imfucela ekhatsi kulobhasikidi, futsi yacindzetela lesimbonyo lesingumthofi emlonyeni walobhasikidi.
9 Ngabese ngiphakamisa emehlo futsi ngabona kusondzela bafati lababili, bandiza emoyeni. Bebanetimphiko letifana netadvoye. Batsatsa lobhasikidi bawuphakamisela esibhakabhakeni.*
10 Ngako ngabuta lengilosi lebeyikhuluma nami ngatsi: “Bawuyisaphi lobhasikidi wekukala kolo?”
11 Yangiphendvula yatsi: “Bawuyisa eShinari,*+ lapho batawufike bakhele khona lomfati indlu; batawutsi nasebayicedzile bamshiye khona lapho endzaweni yakhe lemfanele.”
Imibhalo lengentansi
^ NgesiHebheru kutsi, “ungemakhyubhitha langu-20.” Fundza Sandzisanchazo B14.
^ NgesiHebheru kutsi, “nemakhyubhitha langu-10.” Fundza Sandzisanchazo B14.
^ NgesiHebheru kutsi, “li-efa,” lana kusho kwekuphatsa nobe bhasikidi losetjentiselwa kukala li-efa. Li-efa belilingana nemalitha langu-22. Fundza Sandzisanchazo B14.
^ NgesiHebheru kutsi, “emkhatsini wemazulu nemhlaba.”
^ Lokusho, iBhabhulona.
