Zakhariya 6:1-15
6 Ngaphindze ngaphakamisa emehlo, futsi ngabona kuchamuka tincola letine emkhatsini wetintsaba letimbili telitfusi.
2 Incola yekucala beyidvonswa ngemahhashi labovu, leyesibili yona beyidvonswa ngemahhashi lamnyama.+
3 Incola yesitsatfu beyidvonswa ngemahhashi lamhlophe, kantsi leyesine beyidvonswa ngemahhashi lamibalabala futsi lanemacabhacabha.+
4 Ngabuta lengilosi lebeyikhuluma nami ngatsi: “Nkhosi, kumelelani loku?”
5 Lengilosi yangiphendvula yatsi: “Leti tidalwa letine letingumoya*+ lebetime embikweNkhosi yemhlaba wonkhe futsi nyalo setiyaphuma.+
6 Lencola ledvonswa ngemahhashi lamnyama iya eveni lasenyakatfo;+ lena ledvonswa ngulamhlophe iya enshonalanga;* futsi lena ledvonswa ngemahhashi lanemacabhacabha iya eveni laseningizimu.
7 Lamahhashi lamibalabala bekanesifiso lesikhulu sekuhambahamba emhlabeni.” Lengilosi yabese itsi kuwo: “Phumani niyohambahamba emhlabeni.” Ngako aphuma, ahambahamba emhlabeni.
8 Yabese iyangimemeta futsi yatsi: “Buka, lamahhashi laya enyakatfo ente kutsi Jehova angasalitfukutseleli kakhulu* live lasenyakatfo.”
9 Jehova waphindze wakhuluma nami watsi:
10 “Tsatsa tintfo letinikelwe bantfu labatfunjiwe, utitsatse kuHeldayi, kuThobiya, nakuJedaya. Ngelilanga lelibekiwe ubobese uhamba nalaba lababuya eBhabhulona, niye endlini yaJosaya indvodzana yaZefaniya.
11 Ubotsatsa lisiliva neligolide bese wakha umchele* futsi uwubeke enhloko yaJoshuwa+ umphristi lophakeme, loyindvodzana yaJehosadaki.
12 Ubobese utsi kuye:
“‘Jehova wemabutfo utsi: “Nangu-ke umuntfu lobitwa ngekutsi Lihlumela.+ Utawuhluma endzaweni yakhe futsi akhe lithempeli laJehova.+
13 Nguye lotawakha lithempeli laJehova, futsi utawukhatinyuliswa. Utawuhlala esihlalweni sakhe sebukhosi+ abuse, aphindze abe ngumphristi, futsi lemisebenti lemibili utayenta ngendlela letawuletsa kuthula.*
14 Lomchele* utawuhlala ethempelini laJehova khona kutawukhunjulwa loko lokwentiwa nguHelemi,* naThobiya, naJedaya+ kanye naHeni* indvodzana yaZefaniya.
15 Nalabo labakhashane batawuta batokwakha lithempeli laJehova.” Nine-ke nitawubese niyati kutsi nguJehova wemabutfo longitfume kini. Letintfo titawenteka nangabe nitakulalela konkhe lokushiwo nguJehova Nkulunkulu wenu.’”
Imibhalo lengentansi
^ Loku kungasho emacembu lamane elibutfo letingilosi.
^ Nobe “ngesheya kwelwandle.”
^ NgesiHebheru kutsi, “umoya waJehova wehle.”
^ Nobe “umchele lomuhle.”
^ Nobe “lemisebenti lemibili itawuvumelana.”
^ Nobe “Lomchele lomuhle.”
^ Kuvesi 10 ubitwe ngekutsi nguHeldayi.
^ Kungenteka nguJosaya lokukhulunywe ngaye kuvesi 10.
