Zakhariya 9:1-17
9 Simemetelo lesivela kuNkulunkulu:
“Lona ngumlayeto waJehova lomelene nelive laseHadraki,Futsi ucondziswe* eDamaseko,+Ngobe emehlo aJehova abuka bonkhe bantfu,+Abuka nato tonkhe tive taka-Israyeli.
2 Lomlayeto umelene neHamathi,+ lokulive lelingumakhelwane,Futsi umelene neThire+ kanye neSidoni,+ ngobe lamadolobha acabanga kutsi ahlakaniphe kakhulu.+
3 IThire itakhele lubondza* kuze itivikele.
Icongelele lisiliva lelinyenti kwaba shengatsi lutfuliYacongelela neligolide lelinyenti kwaba shengatsi ludzaka lolusetitaladini.+
4 Jehova utawutsatsa umcebo wayo,Abhubhise libutfo layo elwandle;+Futsi itawucotfulwa ngemlilo.+
5 I-Ashkeloni itakubona loku futsi yesabe;IGaza itawuva buhlungu lobukhulu,Ne-Ekroni itawuva buhlungu lobukhulu, ngobe loyo lebeyetsembele kuye utawuhlazeka.
IGaza angeke isaba nenkhosi,Futsi kute umuntfu lotawuhlala e-Ashkeloni.+
6 Sihambi sitawuhlala e-Ashdodi,Futsi ngitakucedza kutigcabha kwemFilisti.+
7 Ngitayisusa ingati emlonyeni wemFilistiNgikhiphe nekudla lokwenyanyekako emkhatsini wematinyo akhe.
Loyo* lotawusindza utawuba waNkulunkulu;Futsi utawufana nesikhulu kaJuda,+Ne-Ekroni itawufana neJebhusi.+
8 Ngitawuma* ngephandle kwendlu yami ngiyigadze,+Khona kutawuba bete lophumako nobe longenako;Futsi kute umuntfu locindzetelanako* lotawuphindze endlule,+Ngobe ngikubone ngemehlo ami loku lokwentekile.*
9 Halalisa wena Siyoni.*
Memeta ngenjabulo wena Jerusalema.*
Inkhosi yakho iyeta.+
Ilungile futsi ikuletsela insindziso,*Itfobekile+ futsi igibele imbongolo,Igibele imbongolo lendvuna, litfole lembongolo.+
10 Ngitatisusa tinkalishi temphi taka-EfrayimuNgisuse nemahhashi eJerusalema.
Butjoki bemphi butawususwa.
Yona itawumemetela kuthula etiveni;+Kubusa kwayo kutawusukela elwandle kuye kulolunye,Futsi kutawusukela eMfuleni iYufrathe* kuze kuyofika emikhawulweni yemhlaba.+
11 Awu Siyoni, ngenca yengati leyacinisekisa sivumelwane lengasenta nawe,Mine ngitabakhipha emgodzini longenamanti bantfu bakho lababoshiwe.+
12 Buyelani endzaweni levikelekile nine tiboshwa letinelitsemba.+
Awu Siyoni, lamuhla ngitsi kuwe:
‘Ngitakubusisa ngalokuphindvwe kabili.+
13 Ngobe Juda ngitamsebentisa njengebutjoki bami.
Efrayimu utawuba ngumcibisholo wami kulobutjoki.
Awu Siyoni, ngitawuvusa emadvodzana akhoKuze amelane nemadvodzana aseGrisi,Futsi ngitakwenta ube njengenkemba yelichawe.’
14 Jehova utawuveta ngalokucacile kutsi unebantfu bakhe,Umcibisholo wakhe utawuphuma ugijima njengembane.
Jehova loyiNkhosi Lephakeme utawushaya luphondvo,+Futsi utawuphuma netivunguvungu taseningizimu.
15 Jehova wemabutfo utabalwela bantfu bakhe,Titsa titabahlasela ngematje esidubulelo,+ kodvwa bona batatincoba.
Batawujabula futsi bamemete kube shengatsi banatse liwayini;Batawugcwala baphuphume njengetitja letisetjentiselwa imihlatjelo,Nanjengemakona eli-al’thare lagcwele ingati.+
16 Ngalelolanga, Jehova Nkulunkulu wabo utabasindzisaNjengalapho umelusi asindzisa timvu takhe;+Batawumanyatela eveni lakhe njengematje laligugu lacwebetelako emchele.+
17 Maye buhle bakhe bukhulu!+
Maye inkhatimulo yakhe yinkhulu!
Kudla kutawenta emajaha abe nemandla,Futsi liwayini lelisha litawenta tintfombi tibe nemdlandla.”+
Imibhalo lengentansi
^ NgesiHebheru kutsi, “uyohlala.”
^ Nobe “indzawo levikelekile.”
^ Lokusho, umFilisti lokukhulunywe ngaye kuvesi 6.
^ Kubonakala ngatsi kushiwo kuhlupheka kwebantfu bakhe.
^ Nobe “lonika bantfu umsebenti.”
^ Nobe “Ngitawumisa lithende.”
^ NgesiHebheru kutsi, “ndvodzakati yaseSiyoni.”
^ NgesiHebheru kutsi, “ndvodzakati yaseJerusalema.”
^ Nobe “incobile; isindzisiwe.”
^ NgesiHebheru kutsi, “eMfuleni.”
