Jehova Nkulunkulu ufuna bonkhe bantfu bafundze ngaye nangeMbuso wakhe wasezulwini kungakhatsaliseki kutsi banetimo letinjani. (1 KuThimothi 2:3, 4) Ngenca yaloko, BoFakazi BaJehova bakhicita emaBhayibheli kanye netincwadzi letisekelwe eBhayibhelini kuze tifundvwe bantfu labanyenti lokufaka ekhatsi nebantfu labangeva etindlebeni. Ecinisweni inhlangano yetfu seyikhicite tinkhulungwane tetincwadzi letima-video ngelulwimi lwetandla, a letitfolakala ngetilwimi tetandla letingetulu kwa-100. Tikhicitwa tiphindze tisakatwe njani letincwadzi? Nguyiphi intfutfuko lebekhona njengobe sikhatsi sichubeka?

 Tincwadzi letingelulwimi lwetandla tikhicitwa ngemacembu ebahumushi lasemhlabeni wonkhe. Emalunga alamacembu ebahumushi afundza aphindze ahlatiye incwadzi lokufanele ayihumushe. Abese ayacoca futsi avumelane ngendlela lekahle yekwendlulisela lokwatiswa ngelulwimi lwetandla. Nasekacedzile abese arekhoda lencwadzi kuze ibe yi-video. Nyalo, kunemacembu langu-60 lahumusha tincwadzi letisekelwe eBhayibhelini ngetilwimi tetandla sikhatsi sonkhe, kantsi kunalamanye langu-40 lahumusha ngemalanga latsite.

 Esikhatsini lesendlulile bekubita kakhulu kukhicita ema-video ngelulwimi lwetandla. Ema-camera kanye nalamanye emathuluzi bekudule kakhulu kunalamuhla. Ema-video bekarekhodelwa e-studio, lebekufanele sitakhele sona, ngaletinye tikhatsi ngekulungisa sakhiwo lebesivele sikhona. Kuze kulungiswe yonkhe intfo letawudzingwa bahumushi belulwimi lwetandla kudzingeka imali lengetulu kwa-$30 000. b

 Kuze kusetjentiswe kahle iminikelo, inhlangano yetfu ifune tindlela tekutfutfukisa kanye nekwenta umsebenti wekuhumusha ube melula. Ngako sisebentise emathulusi lokumelula kuwasebentisa nalangakaduli. Kunekusebentisa studio, emacembu ebahumushi angasebentisa lubondza loluluhlata lolubitwa ngekutsi yi-green screen kuze arekhode ema-video emahhovisini awo. Nangabe kudzingeka bantfu labanyenti labatawurekhoda, bazalwane nabodzadze akusadzingeki baye e-studio kodvwa bangarekhoda tincenye tabo emahhovisini abo nobe emakhaya.

 Siphindze sakha i-software lesita bahumushi ngemsebenti wabo. Ngenca yaloku, emacembu ebahumushi sewangakhona kukhicita tincwadzi telulwimi lwetandla ngesikhatsi lesincane kunaleso bewasitsatsa esikhatsini lesendlulile. Bazalwane betfu bayabonga ngalolushintjo. Umzalwane lokutsiwa ngu-Alexander utsi: “Ema-video elulwimi lwetandla sekakhululwa kanyenti kunangesikhatsi lesendlulile. Loko kungijabulisa kakhulu ngobe ngibukela lama-video onkhe malanga.”

 Kulesikhatsi sanyalo, kubita imali lengephansi kwa-$5,000 kuze kutfolakale yonkhe intfo ledzingwa ngemacembu ebahumushi. Ngenca yaloku, siyakhona kukhicita ema-video ngetilwimi letinyenti tetandla.

 Licembu lekuhumusha naselicedzile kurekhoda incwadzi letsite ngelulwimi lwetandla, leyo video kufanele imikiswe kulabo labayidzingako. Esikhatsini lesedlulile, besikhicita ema-videocassette kanye nema-DVD, kodvwa loko bekudulile, kudla sikhatsi futsi kungumsebenti lomkhulu. Loku lokurekhodiwe bekubese kumikiswa kulenye inkapani kuze kwentiwe emakhophi ako. Nasekwentiwe konkhe loko, lama-videocassette kanye nema-DVD bekubese kutfunyelwa emabandleni. Nga-2013 nje kuphela, sacitsa imali lengetulu kwa-$2 000 000 kuze sikhicite ema-DVD elulwimi lwetandla.

 Bantfu labangeva etindlebeni bebabonga kakhulu ngalamalungiselelo. Nobe kunjalo, bekungasimelula kusebentisa lama-video njengobe besewamanyenti lama-cassettes nobe ema-DVD. Kuletinye timo, bekudzingeka ema-DVD lamanyenti kuze kurekhodwe incwadzi yinye nje yeliBhayibheli. Umzalwane waseBrazil lokutsiwa nguGilnei utsi: “Njalo nasifuna kufundza umbhalo bekufanele sifune i-videocassette lenaloyombhalo kuze siwufundze. Bekumatima kakhulu.” Dzadze lokutsiwa nguRafayane, lebekasebentisa ema-DVD elulwimi lwetandla, utsi: “Bekulukhuni kutidadishela liBhayibheli. Besicitsa sikhatsi lesinyenti sifuna imibhalo nobe tincwadzi letiwuchazako.” Bazalwane nabodzadze nabasemsebenti wekushumayela bebavame kuphatsa ema-DVD nobe ema-videocassette kuze bawadlale ku-TV yemuntfu lotsandza kufundza. Labanye bazalwane bebaze baphatse nemishini yabo yekudlala ema-DVD. Nobe kunjalo, ngekuhamba kwesikhatsi kwase kuba nemishini lene-screen lephatsekako yekudlala ema-DVD futsi bazalwane labanyenti base basebentisa yona. Bobby, lohlala e-United State, utsi: “Nangabe bewufundza umbhalo futsi sewufuna kufundza lomunye, bekufanele ushintje ufake lenye i-DVD. Loko bekudla sikhatsi futsi kwente kube matima kusebentisa liBhayibheli nawucoca nemuntfu.”

 Nga-2013, inhlangano yaJehova yakhulula i-JW Library Sign Language app, lesita bazalwane nabodzadze bakhone kutitsatsela kanye nekudlala ema-video elulwimi lwetandla etintfweni tabo tebuchwephesha. Le-app yacale yakhululelwa labakhuluma lulwimi lwetandla lwaseMelika (American Sign Language). Nga-2017, le-app yatfutfukiswa kuze ikhone kusetjentiswa bantfu labakhuluma lulwimi lwetandla lwakulamanye emave. Bazalwane nabodzadze emhlabeni wonkhe bajabula kakhulu. Juscelino, umzalwane waseBrazil, utsi: “Bekungakholwakali! Bengihlale ngicabanga ngendlela Sigungu Lesibusako lesibatsandza ngayo bantfu labangeva etindlebeni kanye nendlela lesifuna sitfutfuke ngayo ecinisweni njengalabo labangasebentisi lulwimi lwetandla. Ngajabula kakhulu futsi le-app yangikhutsata kutsi ngilifundze kakhulu liBhayibheli.”

 Lamuhla, onkhe ema-video elulwimi lwetandla sekatfolakala etintfweni tebuchwephesha, futsi kusetjentiswa i-website yetfu kanye ne-JW Library Sign Language app kuze asakatwe. Ngenca yaloko, tincwadzi letitfolakala ngelulwimi lwetandla tingahunyushwa, tirekhodwe tiphindze tisakatwe ngemalanga lambalwa nje, kunekutsi kutsatse tinyanga nobe iminyaka. Ecinisweni, tincwadzi letinyenti letingelulwimi lwetandla tikhululwa ngesikhatsi lesifanako netincwadzi taletinye tilwimi.

 Naka lokushiwo ngulabanye bazalwane nabodzadzewetfu labangeva etindlebeni. Dzadze lokutsiwa nguKlízia utsi: “Kute inhlangano lebanaka kakhulu kangaka bantfu labangeva etindlebeni kangangekutsi ingenta imfundvo levela kuNkulunkulu itfolakale kubo ngendlela lemelula kangaka. Loko lesikwentelwa yinhlangano yaJehova ngeke size sikucatsanise nalutfo emhlabeni.” Vladimir utsi: “Lama-video angikhombise kutsi Jehova uyabakhatsalela bantfu labangeva etindlebeni njengobe akhatsalela bantfu labevako.”

 Ema-video etfu elulwimi lwetandla avamise kusho naku lokulandzelako: “Le-video yentelwe kusita emsebentini wekufundzisa ngeliBhayibheli lowentiwa emhlabeni wonkhe losekelwa ngeminikelo yekutitsandzela.” Sibonga kakhulu ngeminikelo yenu, leminyenti yayo leyentiwa kusetjentiswa i-website letsi donate.pr418.com. Leminikelo isisita sikhone kukhicita emaBhayibheli kanye netincwadzi letisekelwe eBhayibhelini letisita bonkhe bantfu, lokufaka ekhatsi labakhuluma lulwimi lwetandla.