Sicongosekulindza saJune 1, 1912, satsi: “Kungenteka bantfu labanyenti labafundza lomagazini betayelene nebantfu labangaboni emehlweni. Bangakhona kutfola mahhala tincwadzi tebantfu labangaboni emehlweni . . . Letincwadzi letiphrintiwe tibhalwe ngemacashata kuze bantfu labangaboni emehlweni bakhone kutifundza. Bantfu labanyenti labangaboni emehlweni babonga kakhulu ngemlayeto wekutsi kunelilanga lelimangalisako lelitako, lelitawuletsa tibusiso emhlabeni.”

 Ngesikhatsi lamavi abhalwa, indlela yekubhala i-braille yesiNgisi, lesetjentiswa emhlabeni wonkhe lamuhla, beyisengakacali. Nobe kunjalo, BoFakazi BaJehova besebavele bafundzisa bantfu emaciniso eliBhayibheli ngetincwadzi te-braille. Nanyalo kusenjalo! Lamuhla sinetincwadzi te-braille letitfolakala ngetilwimi letingetulu kwa-50. Tibhalwa njani letincwadzi?

 Intfo yekucala leyentiwako nakwentiwa tincwadzi te-braille, kubhala emagama kusetjentiswa emacashata lamelela ema-alphabets e-braille. Michael Millen, losebenta neText Processing Services ePatterson, eNew York, uyachaza: “Kadzeni besisebentisa ema-software lasetjentiswa ngulabanye bantfu kuze sibhale tincwadzi te-braille, kodvwa lama-software bewangakhoni kubhala ngato tonkhe tilwimi lebesifuna kubhala ngato. Nyalo sesisebentisa i-Watchtower Translation System, lekhona kubhala i-braille ngetilwimi letinyenti. Ngicabanga kutsi kute lenye i-software lefana nayo.”

 Tincwadzi te-braille atigcini nje kuphela ngekuba netigaba, kepha tiphindze tibe nemisho lechaza titfombe taleyoncwadzi. Sibonelo nje, nayichaza sitfombe lesisekucaleni kwencwadzi letsi Jabulela Kuphila Kuze Kube Phakadze! i-braille itsi: “Indvodza icala kuhamba endleleni lenemajika letungeletwe titjalo letinhle kanye netintsaba.” Jamshed, loyinceku lesebentako aphindze abe lihlahlandlela futsi longaboni emehlweni, utsi: “Angati kutsi ngibonge ngitsini ngalokuchazwa kwetitfombe.”

 Ngemuva kwekubhala letincwadzi nge-braille, tibese titfunyelwa emahhovisini emagatja laphrinta i-braille. Natifika kulamagatja, tiphrintwa kusetjentiswa emaphepha lacinile langeke abhoboke nasekufakwa lamacashata nobe asheshe adzabuke naseyisetjentiswe sikhatsi lesidze lencwadzi. Ngemuva kwaloko, lamaphepha ayahlanganiswa abe tincwadzi. Letincwadzi tibese titfunyelwa naletinye letivamile emabandleni nobe titfunyelwe todvwa ngeliposi kusetjentiwa “i-free matter for the blind,” emaveni lanemaposi lanako loko. Nakudzingekile, emagatja ahlela kutsi letincwadzi titfunyelwe ngekushesha kuze bazalwane labangaboni emehlweni nobe labangaboni kahle bakhone kutisebentisa emihlanganweni yelibandla.

 Kwenta wonkhe lomsebenti kudzinga sikhatsi lesinyenti kanye nemali lenyenti. Ecinisweni, sikhatsi lesitsatfwa ngumshina wetfu kwekuphrinta loseWallkill, eNew York, nawuphrinta emaBhayibheli langu-50 000 lavamile, siyafana naleso lositsatsa nawuphrinta emaBhayibheli e-braille lamabili nje kuphela. LiBhayibheli linye le-braille yesiNgisi liba tincwadzi letinkhulu letingu-25, futsi tintfo letisetjentiswa nakwakhiwa leliBhayibheli tidule ngalokuphindvwe kangu-123 kwendlule leto letisetjentiswa nakwakhiwa liBhayibheli lelivamile. a I-cover ngayinye yaletincwadzi letinkhulu letingu-25 ibita R2 136 ($150)!

 Labo labasebenta kulamagatja lasita ekuphrinteni tincwadzi te-braille bativa njani ngemsebenti wabo? Nadia, losebenta egatjeni lase-South Africa, utsi: “Kumatima kuphila kwebazalwane nabodzadze wetfu labangaboni emehlweni nobe labangaboni kahle, ngako ngikutsatsa njengesibusiso kwenta lokutsite lokutabasita. Kuyacaca kutsi Jehova ubatsandza kakhulu.”

 Kutsiwani nangabe umuntfu longaboni emehlweni angakwati kufundza i-braille? Eminyakeni lembalwa leyendlulile sakhulula incwadzi letsi Learn to Read Braille, lebhalwe nge-braille nangemagama lavamile. Lencwadzi ihlelwe ngendlela yekutsi umuntfu longaboni emehlweni asitwe ngumuntfu lobonako. Lencwajana ihambisana nalokutsite umuntfu longaboni emehlweni langakusebentisa kuze abhale i-braille. Lona lofundza i-braille angasebentisa lamathulusi kuze atijwayete kubhala emagama e-braille. Loku kutamenta awati lamagama e-braille futsi kumsite atsi ngekuwatsintsa nje, avele awakhumbule.

 Bazalwane nabodzadze labangaboni emehlweni nobe labangaboni kahle bazuze njani kuletincwadzi? Ernst, lohlala eHaiti, bekavame kuba khona njalo emihlanganweni yelibandla, kodvwa ete tincwadzi te-braille. Ngenca yaloko, bekudzingeka atibambe ngenhloko tinkhulumo latatibeka kanye netimphendvulo latatiniketa encenyeni yemibuto netimphendvulo. Kodvwa nyalo utsi, “Ngiyakhona kuphakamisa sandla futsi nginikete timphendvulo nobe nini. Ngitiva ngimunye nebazalwane nabodzadze ngobe sonkhe sitfola imfundvo lefanako levela kuNkulunkulu!”

 Jan, longulomdzala longaboni kahle emehlweni ebandleni lase-Austria, lochuba sifundvo seSicongosekulindza kanye neSifundvo SeliBhayibheli Selibandla, utsi: “Tincwadzi tenhlangano te-braille tifundzeka ncono kunaletinye tincwadzi te-braille lengike ngatifundza. Sibonelo nje, tinetinombolo temakhasi, imibhalo lengentasi letfolakala melula kanye nekuchazwa kwetitfombe lokucacile.”

 Esikhatsini lesendlulile, Seon-ok, lolihlahlandlela lelingaboni emehlweni futsi lelingeva nasetindlebeni, lase-South Korea, bekudzingeka atsintse tandla talomunye umuntfu lobekakhuluma ngelulwimi lwetandla kuze eve kutsi emihlanganweni kufundvwa ngani. Kodvwa nyalo sewuyakhona kutifundzela tincwadzi te-braille letisekelwe eBhayibhelini. Utsi: “Bekulukhuni kufundza letinye tincwadzi te-braille ngobe lamanye emacashata bewangekho, emalayini agwenjile nobe leliphepha limelula kakhulu. Kodvwa BoFakazi BaJehova basebentisa liphepha lelicinile futsi benta nemacashata agcame kahle kuze kube melula kuwafundza.” Uchubeka utsi: “Esikhatsini lesendlulile bengikhona kufundza tincwadzi letisekelwe eBhayibhelini kuphela nangisitwa ngulomunye umuntfu. Nobe kunjalo, nyalo sengiyakhona kutitadishela. Ngiyajabula kutsi sengiyakhona kulungiselela imihlangano yelibandla yamaviki onkhe futsi ngihlanganyele kuyo ngalokugcwele. Ngitifundza tonkhe tincwadzi tenhlangano te-braille. Angisakhoni kutiyekela.”

 Njengato tonkhe tincwadzi tetfu letiphrintiwe, tincwadzi tetfu te-braille tinalomusho lolandzelako: “Lencwadzi ayitsengiswa, yentelwe kusita emsebentini wekufundzisa ngeliBhayibheli lowentiwa emhlabeni wonkhe, losekelwa ngeminikelo yekutitsandzela.” Siyabonga ngeminikelo yenu leniyenta nisebentisa tindlela letichazwe ku-website letsi donate.pr418.com. Leminikelo yenu isisita sikwati kuniketa bonkhe bantfu imfundvo levela kuNkulunkulu, lokufaka ekhatsi bantfu labangaboni emehlweni nobe labangaboni kahle.