Emacembu ebahumushi asikhatsi sonkhe langetulu kwemaphesenti langu-60, awasebenteli ehhovisini leligatja, kodvwa asebentela emahhovisini ekuhumusha (RTO). Yini leyenta lelilungiselelo libe lusito? Ngutiphi tintfo bahumushi labatidzingako kuze basebente kahle kumaRTO? Indzawo lelihhovisi lekuhumusha lelikuyo iyitsintsa njani indlela bahumushi labahumusha ngayo?

 I-RTO yenta kutsi bahumushi bahlale endzaweni lapho kukhulunywa khona lelolwimi labaluhumushako. Karin lohumusha siLow German, utsi: “Kusukela sefika laRTO eCuauhtémoc, leseChihuahua, eMexico, sihlale sikhuluma siLow German nebahumushi lesikanye nabo, nasishumayela, nalapho sitsenga. Sihlale sinebantfu labakhuluma lulwimi lwetfu. Siva tisho lesesinesikhatsi lesidze sagcina kutiva, siphindze sive nelushitjo emagameni bantfu labawasebentisako.”

 James, losebenta nelicembu lebahumushi besiFrafra, eGhana, uyavuma kutsi ngaletinye tikhatsi uhle akhumbula kuba nemndeni waseBethel losegatjeni. Nobe kunjalo, uchubeka atsi: “Ngiyakutsandza kusebenta eRTO. Kushumayela ngelulwimi lwendzawo kanye nekubona indlela tindzaba letimnandzi letibatsintsa ngayo bantfu, kungijabulisa kakhulu.”

 Bazalwane bayikhetsa njani indzawo lakutawuba neRTO khona? Joseph, lolilunga leliTiko Lekwakha Emhlabeni Wonkhe leliseWarwick, eNew York, eMelika utsi: “Lenye inkinga lesike sibe nayo kutsi letinye tindzawo tite kahle gesi, emanti nobe i-Internet kuze bahumushi bakhone kutfola tintfo lokufanele batihumushe. Ngako nasikhetsa indzawo lakutawuba neRTO khona, asibuki indzawo yinye nje kuphela lakukhulunywa khona lelolwimi.”

 Nasesikhuluma liciniso nje, indlela lesheshako nalengakaduli lakungaba neRTO khona, kuse Hholweni Lemhlangano, eHholweni leMbuso, nobe ekhaya letitfunywa telivangeli lapho bangefika melula khona bahumushi. Nangabe kute letindzawo leti, bazalwane bangatfola imvume yekutsenga takhiwo tekuhlala nobe emahhovisi lapho bahumushi bangasebenta baphindze bahlale khona. Nangabe tidzingo tebahumushi tishintja, letakhiwo tingatsengiswa futsi lemali isetjentiswe lakunesidzingo lesikhulu khona.

 Emnyakeni wemsebenti wa-2020, sisebentise 13 million wema-dollar aseMelika (E194 168 000) kuze emaRTO achubeke asebenta. Lamacembu ebahumushi lakumaRTO adzinga ema-computer, i-software lekhetsekile, imishini yekurikhoda, i-Internet kanye naletinye tintfo letindzingekile. Sibonelo nje, i-computer yinye nako konkhe lokudzingekile kuze isebente, kungabita 750 wema-dollar aseMelika (E11 202). Lama-computer afakwa i-commercial software ne-Watchtower Translation System lesita bahumushi bawuhlele kahle umsebenti wabo futsi bakutfole melula labakudzingako kuze basebente.

 Bahumushi baphindze batfole tintfo tekurikhoda letibavumela kutsi barikhodele emahhovisini. Kubaluleka kwaletintfo tekurikhoda kubonakele ngesikhatsi kucala i-COVID-19, ngobe bahumushi labanyenti bakhonile kuhamba nato emakhaya kuze bachubeke nekurikhoda loko labakuhumushile kanye nema-video.

 Bamemeteli bendzawo bahle bavolontiya kufundza loko lokuhunyushiwe kuze bahlole kutsi kuhunyushwe kahle yini, baphindze banakekele takhiwo taseRTO. Cirstin, losebenta eRTO yesi-Afrikaans leseCape Town, eNingizimu Afrika utsi: “Bamemeteli labanyenti kanye nemahlahlandlela lavamile banelitfuba lekusebenta laRTO.”

 Lamavolontiya ayalijabulela lelilungelo. Lomunye dzadze losita kulenye iRTO utsi kusebenta khona kumkhutsata kakhulu. Labanye bazalwane nabodzadze banikela ngemavi abo kuze barikhodwe. Juana lohumusha siTotonac eVeracruz, leseMexico, utsi: “Nyalo njengobe sesidvutane nelidolobha lakukhulunywa khona lulwimi lwetfu, kumelula kutfola bazalwane nabodzadze lesingaba rikhoda.”

 Nobe kunjalo, emaRTOs ayitfutfukisile yini indlela lokuhunyushwa ngayo? Bantfu labanyenti labafundza tincwadzi tetfu bayavuma. Cédric, losebenta nelicembu lebahumushi besiKongo laseDemocratic Republic of Congo, utsi: “Labanye bazalwane nabodzadze bebabita indlela lebesihumusha ngayo ngekutsi ‘siKongo setincwadzi teWatch Tower,’ ngobe besingahumushi ngendlela siKongo lesikhulunywa ngayo. Nyalo sebatsi tincwadzi tetfu tihunyushwe ngendlela siKongo lesikhulunywa ngayo lamuhla.”

 Andile losebenta nelicembu lelihumusha siXhosa, uve lokufanako eNingizimu Afrika. Utsi: “Bantfu labanyenti basitjela kutsi indlela lesihumusha ngayo seyishintjile. Ngisho bantfwana lebebafundza Sicongosekulindza ngesiNgisi nyalo sebasifundza ngesiXhosa. Labakutsandza kakhulu yindlela Lihumusho Lemhlaba Lomusha lelibuyeketiwe lelihunyushwe ngayo.”

 Tonkhe tindleko tekumisa iRTO, kuyinakekela, kanye netebantfu labasebenta khona tinakekelwa ngeminikelo yekutitsandzela leyentelwa umsebenti wemhlaba wonkhe, lefaka ekhatsi leyo leyentiwa nge-donate.pr418.com.