Kulomnyaka lokunye BoFakazi BaJehova lababuke phambili kuko kubukela Sicephu 1 se-drama lenesihloko lesitsi Indzaba Lemayelana Nemsebenti Lowentiwa NguJesu. Tigidzi setivele tiyibonile, futsi lesi sicephu sekucala kuletingu-18. Yini bazalwane nabodzadze labayentile kuze kwakhiwe ledrama, futsi wena usite njani kuloko?

 Egatjeni lase-Australasia lapho kushuthelwa khona ledrama letsi Indzaba Lemayelana Nemsebenti Lowentiwa NguJesu kuvamise kuba nebantfu labangu-50 kuya ku-80 nakushuthwa. a Bonkhe labalapho balungiselelwa kudla kwasemini, kwantsambama nema-snacks. Kuhlelwa kusengaphambili kutsi kutawudliwani. Esther, losebenta Etikweni Lelilungisa Kudla utsi: “Sitsenga kudla etindzaweni letehlukahlukene kuze sitfole kudla lokusezingeni lelisetulu ngemanani laphansi.” “Kuze singamoshi, sihlale sishintjashintja kudla lesikudlako” futsi sisebentisa imali lengu-72 Emalangeni (4 dollars) ekudleni kwemuntfu ngamunye.

 Labazalwane nabodzadze labakha lama-video abadzingi kudla nje kuphela kodvwa badzinga nekuvikeleka. Kuvikeleka kuphi? E-Australia kuyashisa tikhatsi letinyenti futsi kuvamise kuba nemisebe yelilanga leyingoti. Kuze wonkhe muntfu avikeleke elangeni, bazalwane nabodzadze bamisa emathende kuze kube nemtfunti futsi baciniseke kutsi kuhlala kunemanti, tambulelo kanye nema-sunscreen. Kevin, losebenta ka-Audio/Video Services utsi: “Bazalwane labanyenti labenta lomsebenti bangemavolontiya leta ngemalanga latsite eBethel. Benta lomsebenti kanye naleminye leminyenti ngekutfobeka nangenjabulo. Besingeke sikhone kwenta lomsebenti ngaphandle kwabo.”

 Letinye ticephu ativumi kutsi tingashuthelwa egatjeni, lakwentelwa khona emafilimu nobe e-studio. Etimeni letinjalo, ledrama ibese iyoshuthelwa kulenye indzawo. Kuze kushuthwe ticephu tangesikhatsi seliBhayibheli, laba labenta ledrama baya etindzaweni letikhashane lapho kute khona gesi, imigwaco yesikontiyela, netindlu tesikhatsi salamuhla. Tintfo labatatigcoka nalabatatidzinga nabashutha ledrama, lokuhlanganisa nemishini yekushutha kuyapakishwa futsi kumikiswe lapho kuyoshuthelwa khona. Ngaphambi kwekutsi kucalwe kushutha, ema-assistant production coordinators ayacinisekisa kutsi letintfo letilandzelako tikhona, ema-generator, emanti ekunatsa lahlobile, kanye netindlu tangansense. Laba labatoshutha ledrama bahlala emakhaya ebazalwane, kubomahamba nendlwana (trailers) emahhotela nobe kuma-cabins.

 Kushuthela etindzaweni letikhashane kubita kakhulu, kudla sikhatsi futsi kubenta badzinwe kakhulu labo labenta ledrama. Ngako, nga-2023, Sigungu Lesibusako sagunyata kutsengwa kwe-video wall lebita 44-million Emalangeni (2.5-million-dollar) kuze kushuthwe kungakayiwa etindzaweni letikhashane. Le-video wall yenta kube melula kutsi bakhe sitfombe sendzawo lekhashane babe bangakayi kuyo. Ngaleyo ndlela siyakhona konga iminikelo ngekungayi kuyoshuthela etindzaweni letikhashane. Darren, lolilunga leKomidi yeLigatja lase-Australasia uchaza utsi: “Kushutha nge-video wall kunciphisa kudzinwa kubadlali baledrama kusite nalaba labashuthako kutsi baphindzaphindze tincenye letitsite nakunesidzingo. Sibonelo nje, nasishuthela ngephandle, siba nesikhatsi lesincane sekushutha kushona kwelilanga ngaphambi kwekutsi lisitsele. Kodvwa nge-video wall, siyakhona kutakhela lesitfombe sekushona kwelilanga sisishuthe kuze kube ngulapho sesenetiseka ngalesikushuthile.”

 Kudzingeka badlali kanye nalabashuthako labanyenti esiceshini ngasinye sedrama letsi Indzaba Lemayelana Nemsebenti Lowentiwa NguJesu. Bativa njani ngaloko bazalwane labakwentile kuze babanakekele?

 Amber, wesuka ekhaya lakhe leliseMelbourne lelikhashane ngemakhilomitha langetulu kwa-700 kuze ayosita kulomsebenti wekwakhiwa kwaledrama, utsi: “Nangifika nje esikhumulweni setindiza, bazalwane baseBethel banginakekela. Labanyenti bangimema kutsi ngiyokudla nabo nobe ngiyonatsa nabo litiya. Nasekushuthwa, bonkhe bangenta ngativa ngemukelekile futsi ngitsandvwa. Loluhambo lwami belugcwele tibusiso. Angizange ngive ngatsi kukhona lengikudzelile.”

 Derek losebenta kaproduction, Utsi: “Manyenti ematiko lasisitile kusukela sicale lomsebenti. Ngijabula kakhulu kuba nebazalwane nabodzadze labadzele sikhatsi sabo, emandla abo kanye netintfo tabo kuze kwentiwe lomsebenti. Bayasekelana, bakhutsele futsi banemusa. Jehova usibusise sonkhe. Unendzaba nekutsi lomsebenti siwenta njani hhayi umphumela wawo nje kuphela.”

 Sibonga kakhulu ngekusekela kwakhiwa kwaledrama ngeminikelo yenu, lefaka ekhatsi leyo leniyenta nisebentisa i-website letsi donate.pr418.com.