Nga-March 2020, ngesikhatsi i-World Health Organization imemetela kutsi i-COVID-19 isifo lesihlasele umhlaba wonkhe, kute lebekacabanga kutsi lomkhuhlane utawuchubeka uhlasele umhlaba wonkhe sikhatsi lesingutulu kwemnyaka. Tigidzi tebantfu, lokufaka ekhatsi naBoFakazi BaJehova, bawutfolile lomkhuhlane, lokubente beva buhlungu baphindze batsintseka kakhulu kutemnotfo. Yini leyentiwe BoFakazi BaJehova kuze basite ngalesikhatsi salomkhuhlane?

 Ngenca ye-COVID-19, iKomidi Yebachumanisi yeSigungu Lesibusako saBoFakazi BaJehova, imise emaKomidi Ekusita Nakuvele Tehlakalo (DRC) langetulu kwa-950 emhlabeni wonkhe. Kuletinye timo ihlele kutsi bazalwane baleyondzawo basite, kantsi kuletinye, boFakazi basitwe nguhulumende. I-DRC iphindze yahlela kutsi kusitwe bazalwane ngelizinga lelisetulu.

 Sibonelo nje, cabanga ngaloko lokwenteke eParaguay. Lelinye liphephandzaba labika kutsi “bantfu labanyenti baseParaguay bayalamba emakhaya abo” ngenca yesimo semnotfo lesibi lesibangelwe ngulomkhuhlane. I-DRC yaseParaguay beseyicalile kusakata emaphasela ekudla, tintfo teku-cleaner, netintfo tekugeza letilingene umndeni lonebantfu labane letitsatsa emaviki lamabili. Liphasela ngalinye libita E410.97 ($30).

 Letisebenti letisita nakuvele sehlakalo titivikela njani tona kanye nalabanye kulomkhuhlane? Tifaka tifonyo tiphindze tikhweshelane. Tiphindze ticinisekise kutsi letinkapani letitsenga kuto kudla, tikulungiselela endzaweni lehlantekile futsi tilandzela imitsetfo yekuphepha ye-COVID-19. Loku kufaka ekhatsi kuciniseka kutsi bonkhe labatsintsa lamaphasela bagcoke timphahla tekuphepha kulomkhuhlane, bahlanta timoto tabo baphindze baciniseke kutsi babulala nemagciwane (disinfect), futsi babeke lamaphasela endzaweni lehlantekile, lete emagciwane. Ekugcineni, labo labamikisa lamaphasela bayakhweshelana nalabazalwane labatawatsatsa.

 Kusukela nga-January 2021, iKomidi Yebachumanisi inikete imvume yekutsi kusetjentiswe imali lengetulu kwa-E339 426 750.00 (25 million dollars) kuze kusitwe kulesikhatsi se-COVID-19. Emagatja kanye nema-DRC asebentise leminikelo ngekuhlakanipha futsi basebenta kamatima kuze batfole tintfo letidzingekako ngemanani laphansi. Sibonelo nje, eChile, bazalwane labasebenta ekuniketeni lusito bebafuna kutsenga emalentili (lokungulolunye luhlobo lwemabhontjisi) langemakhilogremu langu-750. Nobe kunjalo, imali yekutsenga lamalentili beseyikhuphuke yaphindzeka kabili ngenyanga yinye nje kuphela! Ngemuva nje kwema-awa lamabili bavumelene ngekuwatsenga ngalelinani lelisetulu, lomtsengisi wabatjela kutsi lomunye lobekawatsengile sewuwajikisile. Kunekutsi lomtsengisi abatsengisele ngalelinani lelisetulu lebesebavumelene ngalo, wabese ubatsengisela lamalentili lebekajikisiwe ngelinani lebekatsengiswa ngalo enyangeni lebeyendlulile!

 Nobe kunjalo, ngesikhatsi bazalwane bayotsatsa lamalentili, lomtsengisi washintja ingcondvo ngaloko lebesebavumelene ngako, wabasola ngekutsi bahambisa kudla ngetindlela letingakalungi, njengobe kwenta letinye tinhlangano. Ngemuva kwekwenta umthantazo lomfishane ngenhlitiyo, lomunye webazalwane wachazela lomtsengisi kutsi libandla ngalinye lihloliwe kuze kucinisekwe kutsi bobani labakudzinga mbamba lokudla. Labazalwane baphindze bachaza kutsi ngenca yekungafanani kwemasiko alabo labatfola lokudla, liphasela lilinye lifakwe tintfo letilungela umndeni lotalitfola. Ekugcineni bacinisekesa lomtsengisi kutsi yonkhe iminikelo nemisebenti leyentelwa BoFakazi BaJehova, yentiwa ngekutitsandzela. Lomtsengisi wamangala. Akazange nje agcine ngekubehlisela linani lekutsenga lamalentili kodvwa waphindze wabangetela emalentili langemakhilogremu langu-400, ngesikhatsi baphindze ba-oda lamanye.

 Lusu, umfelokati losakhulile waseLiberia, uhlala nemalunga emndeni wakhe lasihlanu. Ngesikhatsi badla kudla kwasekuseni futsi bacoca nangemBhalo welusuku, umtukulu waLusu loneminyaka lengu-7 wabona kutsi besebete kudla lapha ekhaya. Wase uyabuta, “Sitawudlani?” Lusu wamcinisekisa kutsi besekathantazile kuJehova futsi bekaciniseka kutsi utawubasita. Emini ngalelolanga, Lusu washayelwa ngulomdzala welibandla wamtjela kutsi ete atolandza kudla. Lusu utsi: “Umtukulu wami utsi nyalo sewuyati kutsi Jehova uyayiva imithantazo futsi uyayiphendvula, ngobe uphendvule umthantazo wami.”

 Lomunye wesifazane lohlala eDemocratic Republic of Congo ungumakhelwane wemndeni loboFakazi. Ngemuva kwekubona lomndeni utfola kudla kulabakholwa nawo, watsi, “Nasekuphele lomkhuhlane, sitawuba BoFakazi BaJehova ngobe bayabanaka bazalwane nabodzadze wabo kulesikhatsi lesimatima.” Indvodza yakhe yambuta, “Utawuba nguFakazi waJehova ngenca nje yelisaka le-rice?” Wamphendvula watsi, “Cha, akusinjalo, kodvwa lelisaka le-rice libufakazi bekutsi batsandzana sibili.”

 BoFakazi BaJehova bakhonile kunakekela ngekushesha tindzingo tebazalwane nabodzadze wetfu kulesikhatsi salomkhuhlane ngenca yeminikelo yenu lesuka enhlitiyweni. Siyabonga ngeminikelo leniyente nisebentisa tindlela letichazwe ku-donate.pr418.com.