Ngemnyaka wa-2020, kube netehlakalo temvelo letinyenti, kwaphindze kwaba nesifo se-COVID-19 emhlabeni wonkhe. BoFakazi BaJehova babasite njani labo labatsintsekile?

 Ngemnyaka wemsebenti wa-2020, a iKomidi Yebachumanisi yeSigungu Lesibusako yaniketa imvume yekusetjentiswa kwa-28 million wema-dollar b kuze kusitwe labo labehlelwe sehlakalo. Loku kwasita bazalwane labehlelwe tehlakalo letingetulu kwa-200, lokufaka ekhatsi labahlaselwe sifo se-COVID-19, tiphepho letenteka ngalokuphindzaphindziwe, tikhukhula e-Afrika, kuswelakala kwekudla eVenezuela kanye nesomiso eZimbabwe. Leminikelo yasita ekutsengeni kudla, emanti, indzawo yekuhlala, timphahla, nelusito lwetekwelapha, nekutsenga tintfo tekuhlanta, kulungisa kanye nekwakha kabusha. Nati tibonelo letimbalwa talolusito.

 I-COVID-19. Emhlabeni wonkhe, labanye bazalwane nabodzadze basitfolile lesifo, labanye sibatsintse ngekwemivelo, kantsi labanye sibatsintse ngekwetimali. Kuze basitwe, kwacaliswa emaKomidi Ekusita Nakuvele Tehlakalo (Disaster Relief Committees) emhlabeni wonkhe. Labazalwane labakulamakomidi bebahlale banake tidzingo tebazalwane betfu futsi babikele iKomidi Yebachumanisi ngato, bese yona iyancuma kutsi bangasitwa njani labazalwane labatsintsekile.

 Kuwo wonkhe lomnyaka, lamaKomidi Lasita Nakuvele Tehlakalo asite bantfu labanyenti kutsi batfole kudla, emanti, tintfo tekutigcina bahlantekile kanye nemitsi yetekwelapha levamile. Kuletinye tindzawo, lamakomidi asebente nalabadzala bemabandla kuze kusitwe bazalwane batfole lusito kuhulumende.

 Bantfu labangesibo BoFakazi bawubonile umsebenti wetfu wekusita nakuvele tehlakalo. Sibonelo nguloko lokwashiwo nguField Simwinga, loyidistrict commissioner yaseNakonde, eZambia. Watsi kubazalwane betfu: “Sinibonga kakhulu ngelusito lwenu lolufike ngesikhatsi kulemindeni letsintsekile.”

 Kuswelakala Kwekudla E-Angola. Ngenca yesifo se-COVID-19, kube nekuswelakala kwekudla e-Angola futsi loko lokukhona kwadula kakhulu. Bazalwane nabodzadze wetfu labanyenti bakutfole kumatima kukutsenga.

 Ligatja laseBrazil lacelwa kutsi litfumele emaphasela ekudla kubazalwane betfu base-Angola. Kuze kusetjentiswe kahle leminikelo yekusita nakuvele tehlakalo, bazalwane bahlolisise ngekucophelela indlela lekahle yekutsenga nekutfumela kudla, futsi lokudla kwatsengwa ngebunyenti. Ngako kutsenga nekutfumela liphasela ngalinye lekudla, ngekwesilinganiso, bekubita $22 (E331.50). Liphasele ngalinye beline-rice, emabhontjisi kanye nemafutsa ekupheka, futsi belingema-kilograms langu-20. Kuze kube ngulamuhla, kutfunyelwe emaphasela langu-33 544, lokungema-metric tons langu-654. Lokudla lokutfunyelwe, nasekuhlanganiswe nekudla lokutfolakele kuleyo ndzawo, kwakhona kusita bantfu labangetulu kwa-50 000!

 Bazalwane betfu bativa njani ngalolusito? Alexandre lohlala endzaweni lesemakhaya e-Angola, utsi: “Ngibona loku njengebufakazi bekutsi Jehova uyangitsandza futsi angisingedvwa. Ngibalulekile enhlanganweni yaJehova.” Mariza, lokhulisa bantfwana ayedvwa, utsi: “Ngimbonga kakhulu Jehova nenhlangano yakhe ngobe wakuva kukhala kwami.”

 Kusita Nakunesomiso EZimbabwe. Ngemnyaka wemsebenti wa-2020, eZimbabwe kwaba nesomiso lesimatima lesashiya tigidzi tebantfu tihlaselwe yindlala lenkhulu. Tinkhulungwane taBoFakazi eZimbabwe betingakhoni kutfola kudla lokwanele.

 Kwacaliswa emaKomidi Ekusita Nakuvele Tehlakalo langu-5 kuze kusitwe bazalwane betfu ngekudla. Bamemeteli labanyenti basita ngekupakisha kudla, kulayisha, kantsi labanye basita ngetimoto tabo. c Emnyakeni wemsebenti wa-2020, kusetjentiswe imali lengaba ngu-$691 561 (E10 420 441.15) kuze kondliwe bantfu labangetulu kwa-22 700!

 Kuletinye timo, lolusito belufika bazalwane sebakucedzile kudla lebebanako. Labazalwane betfu bebabonga Jehova nakufika lokudla, labanye baze bahlabele tingoma teMbuso.

 Kulenye indzawo, bodzadze lababili lababafelokati baya emhlanganweni wendzawo lowawumayelana nekusita ngekudla, lowawuhlelwe yinhlangano lengekho ngephansi kwahulumende. Nobe kunjalo, kulomhlangano kwabese kufakwa kakhulu tindzaba tepolitiki, ngako labodzadze abazange bavumelane naloko lebekudzingeka bakwente kuze batfole lusito. Njengobe bahamba bashiya lomhlangano, kwahlekiswa ngabo kwatsiwa: “Ningaphindzi nibuye lapha nitofuna kudla kitsi!” Ngemuva nje kwemaviki lamabili loko kwentekile, bazalwane betfu befika kuleyo ndzawo futsi basita labodzadze wetfu ngekudla, ngaphambi kwekutsi lokudla kwalenhlangano kufike!

 Lusito lolutfolakala nakuvele tehlakalo, lusitile ekushumayeleni eZimbabwe. Cabanga ngaloko lokwenteka kuPrisca lohlala endzaweni lenebantfu labambalwa. Ngisho asebumatimeni lobebubangelwa somiso, Prisca wachubeka neluhlelo lwakhe lwekushumayela njalo ngaLesitsatfu nangaLesihlanu, ngisho kusikhatsi sekulima. Bantfu bendzawo bebahlekisa ngaye batsi: “Umndeni wakho utawubulawa yindlala ngenca yalentfo yakho yekushumayela.” Prisca bekabaphendvula atsi: “Jehova akabalahli bantfu bakhe.” Kungakapheli sikhatsi lesingakanani, watfola kudla lokuvela enhlanganweni yetfu. Loku kwabamangalisa bomakhelwane bakhe, futsi batsi kuye: “Nkulunkulu akazange sekakulahle, ngako natsi sifuna kufundza lokunyenti ngaye.” Nyalo, bomakhelwane bakhe labangu-7 balalela imihlangano yetfu yelibandla lesakatwa ku-radio.

 Njengobe kuphela kusondzela, sitawuchubeka sihlaselwa tehlakalo temvelo. (Matewu 24:3, 7) Sibonga kakhulu ngeminikelo yenu leniyenta ngetindlela letehlukahlukene letitfolakala ku-donate.pr418.com. Itawusetjentiswa kahle kuze kusitwe labo labadzinga lusito, ngesikhatsi labaludzinga ngaso.