Ema-video emhlangano wesifundza atsintsa tinhlitiyo tetfu futsi asenta sikucondze kancono loko liBhayibheli lelisifundzisa kona. Umhlangano Wesifundza Wa-2020 lobewunesihloko lesitsi “Hlalani Nijabula”! bewunema-video langu-114, lokufaka ekhatsi tinkhulumo letingu-43 lebetibekwa malunga eSigungu Lesibusako kanye nebasiti babo. Uke watibuta yini kutsi ungakanani umsebenti netindleko letibekhona nakwentiwa lama-video?

 Bazalwane nabodzadze labacishe babe ngu-900 labavela emhlabeni wonkhe, banikele ngesikhatsi nangemakhono abo kuze kwentiwe loluhlelo. Sewuwonkhe lomsebenti, utsetse ema-awa langu-100 000 esikhatsini lesiyiminyaka lemibili. Loku kufaka ekhatsi ema-awa langu-70 000 lacitfwe kwentiwa i-drama yeliBhayibheli letsi Nehemiya: “Injabulo Yenu Levela KuJehova Ingemandla Enu” letsatsa imizuzu lengu-76.

 Njengobe ungacabanga, kube tindleko letinkhulu kunakekela tidzingo talamavolontiya kanye nato tonkhe tintfo tekusebenta kuze kucedvwe lomsebenti.

 Jared Gossman losebenta ne-Audio/Video Services utsi: “IKomidi Yekufundzisa yeSigungu Lesibusako ifuna kutsi kube nemasiko netindzawo letehlukahlukene kulama-video etfu, kuze kubonakale kutsi sibazalwane bemhlaba wonkhe. Kuze wentiwe kahle lomsebenti, kudzingeke emacembu langu-24 lavela emaveni langu-11 emhlabeni wonkhe kutsi asebente ndzawonye. Kudzingeke nemali lenyenti, kuhlela kahle, kanye nekubambisana kuze bonkhe labazalwane labavela emhlabeni wonkhe basebente kahle.”

 Kuze kwentiwe ema-video etfu lamanyenti, kudzingeka imishini netindzawo letikhetsekile. Sibonelo saloko kutsi indzawo lakwentelwa khona i-drama yaNehemiya: “Injabulo Yenu Levela KuJehova Ingemandla Enu”, yakhiwa ekhatsi e-studio lesise Mt. Ebo dvutane nasePatterson, eNew York, e-U.S.A. Kuze kusetjentiswe kahle iminikelo, bazalwane bakha lokucishe kufane netibondza taseJerusalema, kuze lelifilimu levete iJerusalema njengobe yayinjalo. Lubondza ngalunye belwentiwe nge-frame yesigodvo lesingemamitha lasitfupha budze futsi sipendwe ngendlela yekutsi kubonakale ngatsi litje. “Letibondza” betisetjentiswa eticeshini letehlukahlukene kuze kuncishiswe linani letindzawo letidzingekako. Nobe kunjalo, kuze kwakhiwe tindzawo tekwentela le-drama nje kuphela, kwadzingeka imali lengema-dollar langu-100 000 aseMelika. a

 Kusenta sibonge kakhulu kwati imininingwane ledzingekile kuze loluhlelo lwemhlangano wesifundza lube yimphumelelo. Siyaciniseka kutsi imetamo leyentiwe kuze loluhlelo luphumelele, itawenta Jehova advunyiswe emhlabeni wonkhe. Sinibonga kakhulu ngeminikelo yenu leniyenta ngekutitsandzela niyentela umsebenti wemhlaba wonkhe nisebentisa i-donate.pr418.com nobe letinye tindlela.