BoFakazi BaJehova sebantfola imfundvo lenyenti levela kuNkulunkulu ngetintfo tebuchwephesha kuna sesikhatsini lesendlulile. Kodvwa kuletinye tindzawo emhlabeni, bazalwane betfu abanayo imali leyenele yekungena ku-Internet. Labanye bahlala etindzaweni lapho khona i-internet ihle ingabikhona, ihambe kancane nobe kubete sanhlobo.

 Nobe kunjalo, bazalwane nabo dzadzewetfu sebangakhona kutitsatsela tincwadzi ngetintfo tebuchwephesha ngaphandle kwekusebentisa i-Internet! Kwenteka kanjani loku?

 I-JW Box, libhokisi lelincane leliniketwa emabandla lanenkinga ye-Internet. Le-JW Box ita ne-router device letsengwe esitolo lesitsengisa tintfo tebuchwephesha, ine-software leyentiwe yi-Computer Department eBethel, kanye nema-video netincwadzi, lokutfolakala ku-jw.org. Libhokisi linye libita E1 226.59 ($75 U.S).

 EHholweni leMbuso, bazalwane nabo dzadze bachuma tintfo tabo tebuchwephesha kule-JW Box futsi batitsatsele tincwadzi nema-video kuyo. Ngisho nalabo labanetintfo tebuchwephesha letindzala nobe letingakaduli, bangakhona kutichuma kulelibhokisi. Kodvwa nangabe libandla lite i-Internet, le-JW Box ititfola njani tintfo takamuva? Ligatja lihlale litfumela ema-USB keys, lanetintfo takamuva letitfolakala ku-jw.org letibese tifakwa ku-JW Box. I-USB key ibita E65.42 ($4 U.S) iyinye.

 I-JW Box ibasite njani bazalwane betfu? Nathan Adruandra, longubabe lohlala e-Democratic Republic of Congo, utsi: “Ngezama sikhatsi lesidze kutitsatsela i-drama letsi ‘Jehova, . . . Ngetsembele Kuwe’ naletsi Khumbula umka Loti. Kodvwa ngehluleka futsi ngaphela emandla. Nyalo sengiyakhona kutitsatsela lama-video ngelucingo lwami futsi loku kuyasisita njengebatali kutsi sibafundzise kahle bantfwana betfu.”

 Umzalwane losita emabandla e-Nigeria kutsi asebentise i-JW Box utsi: “Bazalwane batsatsa le-JW Box njengesipho lesivela kuJehova. Kubajabulisa kakhulu kutsi nyalo sebangakhona kutitsatsela kamelula tincwadzi nema-video eBhokisini Lemathuluzi Ekufundzisa.”

 Sekutfunyelwe ema-JW Box langetulu kwa-1 700 kubazalwane betfu base-Africa, Oceania, nase South America, futsi kwentiwa emalungiselelo ekutsi atfunyelwe nakulamanye emabandla lamanyenti. Ibuyaphi imali yekwenta konkhe loku? Ibuya eminikelweni yemsebenti wemhlaba wonkhe, leminyenti yayo leyentiwa ku-donate.pr418.com. Sinibonga kakhulu ngeminikelo yenu.