Jehova uyakutsandza kufundzisa bantfu bakhe. Ngenca yaloko, inhlangano yakhe icalise tikolwa letinyenti leticecesha bafundzi kuze batifeze kahle tabelo tabo. Lesinye saletikolwa, Sikolwa Sebavangeli BeMbuso (SKE). Muva nje, inhlangano yaNkulunkulu ayikanaki nje kuphela loko lokufundvwako, kodvwa iphindze yanaka netindzawo lokufundzelwa kuto. Umgomo loyinhloko kutfutfukisa letindzawo kuze bothishela bakhone kufundzisa kuto, nebafundzi bakhone kufundzela kuto. Iminikelo yenu isisita njani kutsi sifinyelele lomgomo?

 Sekuphele sikhatsi lesidze tikolwa teMbuso tichutjelwa emaHholweni eMbuso nasemaHholweni eMhlangano. Yini lebangele kutsi eminyakeni yakamuva sakhe nobe silungise tindzawo letinyenti kuze sibambele kuto tikolwa teMbuso? Cabanga nganati tizatfu letintsatfu.

 Tidzingo letinkhulu. Christopher Mavor, longumsiti eKomidini YeMsebenti yeSigungu Lesibusako ubike kutsi, “Emahhovisi lamanyenti eligatja anetidzingo letinkhulu ensimini yawo. Sibonelo nje, ligatja laseBrazil lasikisela kutsi bekudzingeka bafundzi labangu-7 600 labaphotfule e-SKE kuze kunakekelwe tidzingo taleligatja.” Lihhovisi leligatja lase-United States libike kutsi kunesidzingo lesikhulu semahlahlandlela lafanelekako langacecesha labanye emsebentini wekushumayela etindzaweni tawonkhewonkhe lokuhlelwe yinhlangano, kushumayela etikhumulweni temikhumbi kanye nasemajele. Kuphindze kube nesidzingo sebazalwane labangakhonta etikweni le-Local Design/Construction kanye nasemaKomidini Labonisana Netibhedlela. Labo labaceceshwe e-SKE bangasita ekwenteni lemisebenti.

 Kwandza kwebantfu labafaka ticelo. Emagatja lamanyenti atfole ticelo letinyenti kunaleto langakhona kutemukela. Sibonelo nje, ligatja laseBrazil,litfole ticelo letingaba ngu-2 500 tase-SKE ngemnyaka munye nje. Ngenca yekuba mbalwa kwetakhiwo lokungachutjelwa kuto letikolwa, leligatja likhone kwemukela bafundzi labangaba ngu-950 nje kuphela.

 Tindzawo tekuhlala letikahle. Nangabe letikolwa tiba seHholweni leMbuso nobe eHholweni leMhlangano, labafundzi bavamise kuhlala emakhaya ebazalwane. Lelilungiselelo lisebenta kahle etindzaweni lapho khona letikolwa tingachutjwa njalo. Kodvwa nangabe letikolwa tihlale tichutjwa angeke kube melula ngebamemeteli bendzawo kutsi bahlalise bafundzi tinyanga letinyenti emnyakeni. Ngako kulungiselelwa tindzawo letidvutane nalapho kuchutjelwa khona letikolwa, futsi letilungele kuhlala labafundzi.

 Sakhiwo lesinelikilasi linye kanye netindlu tekuhlala talabo labafundzisako netebafundzi labangaba ngu-30 kanye nalabo labasitako, singabita tigidzi tema-dollar, kuye ngendzawo lesikuyo kanye naletinye timo.

 Letikolwa tivame kuba sendzaweni lethulile, lengekho emadolobheni lamakhulu, kodvwa ledvutane netintfo tekuhamba. Tivamise kuba setindzaweni lapho kunebamemeteli labanyenti khona, labangasita nakusachubeka lesikolwa, ekunakekeleni lesakhiwo netintfo letikuso.

 Kuletakhiwo kuvame kuba nemtapo wetincwadzi, indzawo yekudadishela, emaphrinta, ema-computer kanye naletinye tintfo. Ngalokuvamile, kuphindze kube nendzawo yekudlela lapho bafundzi nabothishela badlela khona. Kuphindze kube nendzawo lenkhulu labangajimela kuyo, nobe labangatijabulisela kuyo.

 Lelikilasi lokufundzelwa kulo lidzinga kunakwa ngalokukhetsekile. Troy losebenta nelitiko le-Worldwide Design/Construction e-Warwick, eNew York utsi, “Sacocisana nelitiiko le-Theocratic Schools kuze lisisite sente lelikilasi libe yindzawo lekahle lokungafundzelwa kuyo. Labazalwane basiniketa ticondziso tekutsi lelikilasi kufanele libe likhulu kangakanani futsi libe kanjani. Baphindze basitjela ngeluhlobo lwetintfo tekukhanyisa lebesingatisebentisa kulelikilasi, kanye nete-audio nema-video. Zoltán longuthishela wase-SKE eHungary, usho naku lokulandzelako mayelana nekufakwa kwetintfo te-audio: “Ekucaleni, bekufanele sihlale sikhumbuta bafundzi kutsi bakhulumele etulu ngobe besingenayo imibhobho. Kodvwa nyalo njengobe litafula ngalinye selinembhobho lenkinga seyicatululekile!”

 Lokutfutfukiswa kwaletakhiwo kubatsintse njani bothishela kanye nebafundzi? Angela, lowaya e-SKE ePalm Coast, eFlorida, eMelika utsi, “Lendzawo inekuthula. Konkhe kuhlelwe kahle, lokufaka ekhatsi likilasi lesifundzela kulo kanye nemakamelo lesilala kuwo kuze sikhone kunaka kakhulu kudadisha nekufundza.” Csaba, longuthishela wase-SKE eHungary uyakujabulela kudla kanye nebafundzi. Utsi nabadla ndzawonye, “bafundzi bavamise kucoca ngaloko lokwenteke kubo. Loku kusenta sibati kancono bafundzi, futsi kusente sikhone kuvumelanisa loko lesikufundzisako netidzingo tabo.”

 Bafundzi nabothishela batsatsa letakhiwo lapho kuchutjelwa khona letikolwa njengesibusiso lesivela ‘kuMfundzisi wetfu lomkhulu’ Jehova. (Isaya 30:20, 21) Dzadze wasePhilippines lowaya esakhiweni sase-SKE lesaguculwa saba yindzawo yekufundzela utsi: “Lendzawo lesifundzela kuyo isikhumbutile kutsi asisibo nje bafundzi kuphela kodvwa sitimenywa taJehova letikhetsekile. Ufuna sikujabulele kuba lapha njengobe sidadisha liVi lakhe ngalokujulile.”

 Takhiwo tenhlangano tekufundzela tingakhiwa, tilungiswe tiphindze tinakekelwe kusetjentiswa iminikelo yenu, leminyenti yayo leyentiwa kusetjentiswa i-website letsi donate.pr418.com. Sibonga kakhulu ngekwephana kwenu.