Sigungu Lesibusako sifuna kusebentisa kahle iminikelo kuze sakhe takhiwo letisisita sente umsebenti wetfu wekushumayela ngeMbuso. Sibonelo nje, ngemnyaka wemsebenti wa-2023, emahhovisi emagatja aBoFakazi BaJehova asebentisa imali lengetulu kwa-500 million dollars kuze atsenge, akhe, alungise futsi anakekele emaHholwa eMbuso kanye nemaHholwa Emhlangano emhlabeni wonkhe. a Lemali yengeta kuleyo emabandla lasemhlabeni wonkhe layisebentisile kuze anakekele emaHholwa awo eMbuso.

 Ngetulu kwaloko, iminikelo isetjentiselwa kwakha kanye nekunakekela takhiwo teligatja, letisisita sihlele futsi sisekele umsebenti wekushumayela emhlabeni wonkhe. Imisebenti leyentiwa egatjeni seyentiwe yaba melula kuze iminikelo isetjentiselwe kwakha kanye nekulungisa emaHholwa eMbuso kanye nemaHholwa Emhlangano. Nobe kunjalo, kusadzingeka imali leyengetiwe kuze kulungiswe nobe kutfutfwe emahhovisi eligatja. Lemisebenti yekwakha ibaluleke ngani? Emagatja awusekela njani umsebenti lobalulekile wekushumayela? Ase sibone.

 Emahhovisi eligatja lamanyenti sewaneminyaka lengetulu kwa-30 nobe 40 akhiwa! Nicholas, losebenta etikweni le-Worldwide Design/Construction, utsi: “Ngisho nesakhiwo lesinakekelwa kahle, sihamba siguge. Nasisilungisa, sisenta kutsi sikhone kuchubeka leminye iminyaka leminyenti.”

 Takhiwo taseBethel tidzinga kwakhiwa ngendlela yekutsi tikhone kusekela lushintjo loluhlale lwenteka enhlanganweni. Kusukela emahhovisi emagatja lamanyenti akhiwa, linani lebamemeteli selenyuke kakhulu emhlabeni wonkhe. Kuze kusekelwe lokwandza, kudzingeke emavolontiya lamanyenti latawusebenta emahhovisini eligatja. Takhiwo taseBethel lebetakhiwe ngendlela yekutsi tilingane tidzingo tebamemeteli ngaleso sikhatsi, nyalo setincane kakhulu!

 Lokunye lokudzingeke kucatjangwe ngako, tindzaba tekuphepha. Njengobe siphila emalangeni ekugcina alelive, setinyenti kakhulu tehlakalo temvelo. (Lukha 21:11) Ngekusebentisa tindlela takamuva tekwakha nasilungisa letakhiwo, sitenta tibe nguletiphephile kulabo labasebentela kuto. Lendlela lensha yekwakha itawenta kube melula kutsi letakhiwo tisetjentiselwe kusita nakuvele tehlakalo kanye nekuchubeka kusekelwa umsebenti wekushumayela ngisho nangemuva kwesehlakalo semvelo.

 Sigungu Lesibusako sinikete imvume yekutsi kulungiswe emagatja langu-43 kulomnyaka wemsebenti wa-2023. Loku kusho kutsi kuto tonkhe takhiwo temagatja letikhona emhlabeni wonkhe, leticishe tibe yihhafu tiyalungiswa. Sicela unake nati tibonelo letimbalwa letikhombisa kubaluleka kwalomsebenti.

 Angola. Matt, lolilunga leKomidi yeliGatja lase-Angola, utsi: “Sinelilungelo lelihle lekubona kugcwaliseka ngendlela lekhetsekile kwesiphrofetho lesikuHagayi 2:7. Linani lebamemeteli lenyuke ngemaphesenti langu-60 ngeminyaka lengu-10 nje kuphela! Kuze kusekelwe lokwandza kwelinani lebamemeteli, linani lemalunga emndeni waseBethel kudzingeke liphindvwe katsatfu. Nobe kunjalo, besingakhoni kumema bantfu labanyenti lebebadzingeka ngenca yekutsi letakhiwo betitincane. Ngako labo lebesebavele basebenta eBethel bebenta umsebenti lomnyenti futsi bebasebenta ema-awa lamanyenti.”

 Bazalwane labatsite bacelwa kutsi bente luhlolo kuze babone kutsi yini lengentiwa kuze kukhuliswe leligatja. Ekucaleni, bekucatjangwa kutsi kulungisa ngekushesha lesakhiwo lebesivele sikhona bekungaba sisombululo lesikahle. Kodvwa ngemuva kwekuhlolisisa lendzaba, kwabonakala kutsi kulungisa lesakhiwo bekungeke kube yindlela lekahle yekusebentisa iminikelo. Ngako kwasikiselwa kutsi kutsengwe futsi kulungiswe lesinye sakhiwo lesidvutane. Matt uchubeka atsi: “Nakusikiselwa kwekucala eKomidini yeliGatja kutsenga nekulungiswa kwalesinye sakhiwo, besikhatsateke ngekutsi besingeke sifane naleso besingatakhela sona tsine. Kodvwa nyalo siyabona kutsi Jehova usibusisile lesincumo ngobe lesakhiwo sisilungela kahle.”

 Kungenteka ligatja lase-Angola kutawudzingeka liphindze likhuliswe ngekuhamba kwesikhatsi. Nobe kunjalo, lesakhiwo lesisha kanye netindzawo tekuhlala letiseBethel naleticashiwe letingaphandle kweBethel, tinikete ligatja indzawo leliyidzingako kuze lisekele lokwandza lokukhulu lokusensimini yaleligatja.

 Japan. Ligatja laseJapan lakhiwa eminyakeni lecishe ibe ngu-40 leyendlulile futsi alikaze lize lilungiswe. Takhiwo taleligatja betinakekelwa kahle, kodvwa besetisetjentiswe sikhatsi lesidze kakhulu kunaleso lesifanele. Ngenca yaloko, nyalo kunemsebenti lomkhulu kakhulu wekutilungisa.

 Indlela lokuphilwa ngayo eBethel ishintjile kuleminyaka leyendlulile. Ngembikwemnyaka wa-2015, umndeni waseBethel bewuphekelwa kudla kwasekuseni, emini nantsambama. Ngako tindlu letinyenti tekuhlala taseBethel leseJapan betinelikhishi lelincane kakhulu. Kodvwa nyalo loku kulungiswa lesakhiwo, kukhuliswe lelikhishi kuze emalunga emndeni waseBethel akhone kutiphekela. Kumiko, dzadze losebenta egatjeni laseJapan utsi: “Lelikhishi lingenta ngitive ngisekhaya futsi lingisita ngikhone kusekela indlela lesekuphilwa ngayo eBethel.”

 Umsebenti lowentiwa egatjeni laseJapan ubaluleke kakhulu ekusekeleni umsebenti wekushumayela lowentiwa emhlabeni wonkhe. (Matewu 28:19, 20) Ligatja laseJapan lingulelinye lemagatja lamabili nje kuphela laphrinta liBhayibheli leliphelele. Ngako lomunye umsebenti wekwakha lowentiwako, kufaka umshini lokoleka tintfuli kuze labo labasebenta e-Printery baphephe. Kutsenga kanye nekufaka lomshini kubita imali lecishe ibe ngu-1 million dollars, kodvwa loku kutawusita leligatja liciniseke kutsi liyachubeka nemsebenti wekuphrinta tincwadzi kanye nemaBhayibheli futsi likutfumele emhlabeni wonkhe.

 Kubaluleke kakhulu kutsi umsebenti wekuphrinta liBhayibheli uchubeke ngisho nobe kunalomsebenti wekwakha. Trey, lolilunga leKomidi yeliGatja laseJapan, utsi: “Ngalesikhatsi kwakhiwa, inhlangano ikhulule emaBhayibheli lamanyenti, futsi bantfu labanyenti emhlabeni wonkhe besebadzinga emaBhayibheli. Ematiko lamanyenti kudzingeke kutsi asebentisane kuze kuhlelwe kutsi lemishini lemisha ifakwa nini futsi kuphrintwa nini.” Ngisho nobe kunaletinkinga, njalo ngenyanga kusukela ngaMarch kuya ku-August 2023, bekuphrintwa emaBhayibheli lacishe abe ngu-220 000. Konkhe loku kwentiwe ngesikhatsi kulungiswa e-Printery. Wonkhe lomsebenti ucedvwe ngaphandle kwekungeta tindleko.

 Lomunye umgomo loyinhloko wekulungisa lesakhiwo seligatja laseJapan, konga gesi. Kutawufakwa ema-solar panels lamasha lokulinganiselwa kutsi atawonga imali yagesi lecishe ibe ngu-$120 000 njalo ngemnyaka. Kutawufakwa nemafasitela lanema-glass laphindzeke katsatfu (triple-glazed windows) kuze kongiwe gesi longabita imali lecishe ibe ngu-$10 000 njalo ngemnyaka. Ngisho nobe wonkhe lomsebenti wekulungisa lesakhiwo utawukhulisa tindleko, kodvwa kufaka lama-solar panels kanye naloluhlobo lwemafasitelo, kulinganiselwa kutsi kutawonga imali lengetulu kwa-3.5 million dollars eminyakeni leminyenti letawulandzela. Loku kutawuphindze kwente letakhiwo tingayilimati imvelo.

 Lomsebenti lowentiwa kulamagatja lamabili ukhombisa kutsi usemnyenti umsebenti lokufanele wentiwe emagatjeni lehlukahlukene kuze kusekelwe umsebenti wekushumayela. Nobe kunjalo, lomsebenti usengakapheli. Aaron, losetikweni le-Worldwide Design/Construction, utsi: “Kunyenti bazalwane lesebakwentile, kodvwa kusenalomunye umsebenti lomnyenti lokusadzingeka wentiwe.” Utawentiwa njani lomsebenti? Uchubeka utsi: “Ngetulu kweminikelo yekutitsandzela leyentiwako kuze kwentiwe lemisebenti lebalulekile, siphindze sibonge kakhulu ngebazalwane labatinikele ekusiteni kulemisebenti kanye nalabo labasahlela timo tabo kuze basite esikhatsini lesitako. Kutinikela kwebazalwane kanye nekusekela kwabo ngeminikelo, kusikhombisa ngalokucacile kutsi Jehova uyawusekela lomsebenti.”​—Tihlabelelo 110:3.

 Yonkhe imisebenti yekwakha kanye nekulungisa takhiwo isekelwa ngeminikelo yekutitsandzela, leminyenti yayo leyentiwa ku-website letsi donate.pr418.com. Sinibonga kakhulu ngekwephana kwenu.