BoFakazi BaJehova babatsandza kakhulu labo labakholwa nabo. (1 Phetro 2:17) Linyenti letfu litiva njengalomunye dzadze waseKenya lokutsiwa nguTannis. Utsi, “Ngiyatsandza kwati kutsi kwentekani kubazalwane nabodzadze emhlabeni wonkhe.” Yini lesite Tannis kanye nalabanye bofakazi labanyenti bati kutsi kwentekani emhlabeni wonkhe? Basitwe likhasi Letindzaba leliku-website letsi jw.org, lelakhululwa nga-2013.

 Lelikhasi Letindzaba liveta imibiko lesingayetsemba ngaBoFakazi BaJehova lisebentisa tihloko letimayelana nekukhululwa kwemaBhayibheli, umsebenti wekusita nakuvele tehlakalo, imisebenti yekwakha kanye naleminye imibutsano lemikhulu. Lisitjela ngebazalwane nabodzadze lababoshiwe ngenca yekukholwa kwabo. Lelikhasi Letindzaba liphindze lisikhutsate ngalokwenteke kubazalwane betfu emikhankhasweni yekushumayela kanye nasemikhosini yeSikhumbuto. Ngubani lowenta lucwaningo ngetihloko letivela kuletindzaba, futsi tilungiselelwa njani?

 Likhasi Letindzaba linakekelwa litiko laka-Office of Public Information (OPI). Lelitiko lisendlunkhulu futsi lisebenta ngaphansi kwekucondziswa yiKomidi Yebachumanisi yeSigungu Lesibusako. I-OPI yakhiwa bazalwane labengetulu kwa-100, labanyenti babo basebentela emakhaya, bafaka ekhatsi babhali, bacwaningi, ema-visual artists, kanye nebahumushi. Labanye bachumana netisebenti tahulumende, bophrofesa nabothishela kanye nebetindzaba. I-OPI isitwa ngema-Public Information Desks (PID) langetulu kwa-80 lasemahhovisini emagatja emhlabeni wonkhe.

 Kuze ilungiselele letindzaba, i-OPI isebentelana dvutane nema-PIDs. Bazalwane nabatfola indzaba lekahle labangayibhala, benta lucwaningo ngayo futsi bacongelele kwatiswa lokungetsenjwa. Loku kufaka ekhatsi nekucocisana netati. Nasebawatfolile emaciniso ngalendzaba, bayayibhala, bayilungise, bayifundze, bafake netitfombe bese bayitfumela eKomidini Yebachumanisi kuze batfole imvume yekuyikhulula.

 Bazalwane nabodzadze bativa njani ngalelikhasi Letindzaba? Cheryl, dzadze losePhilippines, utsi, “Ngiyatsandza kucala lilanga lami ngekufundza tindzaba letimayelana nenhlangano yaJehova kanye nebantfu bakhe.”

 Bantfu labanyenti labafundza lelikhasi Letindzaba leliku-jw.org bakhuluma ngemehluko labawubonile emkhatsini walo netindzaba letivamile. Tatiana, loseKazakhstan, utsi: “Kuyangijabulisa kwati kutsi ngingatetsemba tindzaba letiku-jw.org ngobe tetsembekile futsi tiliciniso.” Alma, dzadze loseMexico utsi: “Lelikhasi letindzaba lisikhutsata kakhulu nalicatsaniswa netindzaba letibuhlungu lesihlale sitiva etindzabeni letivamile.”

 Lelikhasi letindzaba aliketsembeki nje kuphela kodvwa liphindze licinise nekukholwa. Bernard, waseKenya, utsi: “Lelikhasi letindzaba lingisite ngatsatsa bazalwane nabodzadze labasemhlabeni wonkhe njengemndeni wami, ngisho nobe bahlala kuphi. Nangithantaza ngiyakhona kubasho ngemagama kanye netimo lababhekene nato.” Dzadze Bybron, naye waseKenya, utsi: “Ngijabula kakhulu nangibona sihloko Iesikhuluma ngekukhululwa kweliBhayibheli ngalolunye lulwimi! Letihloko tingikhumbuta kutsi Jehova akakhetsi.”

 Ngisho netindzaba letimayelana nebazalwane betfu labahlushwako tiyasikhutsata. “Kucabanga ngesibindzi sabo kukucinise kakhulu kukholwa kwami,” kusho Jackline, waseKenya. “Ngihlale ngibuka kutsi yini lebasita bacinisele. Ngifundze kutsi tintfo letincane njengekuthantaza, kufundza liBhayibheli, ngisho nekuhlabela kudlale indzima lebalulekile ekusiteni bazalwane bahlala betsembekile.”

 Beatriz dzadze waseCosta Rica utijabulela kakhulu tindzaba letimayelana netehlakalo temvelo. Utsi: “Lelikhasi letindzaba lingenta ngibone indlela inhlangano lenakekela ngayo tidzingo tebazalwane betfu ngekushesha, nangendlela lehlelekile kanye nangelutsandvo. Loku kungenta ngiciniseke kutsi lena yinhlangano yaJehova.”

 Sibonga kakhulu ngekutfola tindzaba takamuva ngalokwenteka kubazalwane betfu emhlabeni wonkhe! Loku bekungeke kuze kwenteke ngaphandle kweminikelo yenu leniyentela umsebenti wemhlaba wonkhe, leminyenti yayo leyentiwe kusentjentiswa i-website letsi donate.pr418.com. Sibonga kakhulu ngeminikelo yenu.