Umculo usipho lesihle lesivela kuJehova. Ungayitsintsa indlela lesicabanga ngayo, ushintje indlela lesitiva ngayo futsi usikhutsate. Nguloko kanye lokwentiwa tingoma tetfu leticanjiwe. Ecinisweni, letingoma tenta lokungetulu kwaloko, tisenta sisondzelane naJehova.

 Kusukela nga-2014, tingetulu kwa-70 tingoma leticanjiwe letikhululiwe, futsi lokungenani yinye yaletingoma itfolakala ngetilwimi letingetulu kwa-500! Kodvwa kungenteka uyatibuta kutsi, ‘Bobani labenta letingoma, futsi batenta njani?’

 Letingoma leticanjiwe tentiwa licembu lebazalwane nabodzadze labasebenta ngemculo etikweni laka-Audio/Video, lelicondziswa yiKomidi Yekufundzisa yeSigungu Lesibusako. Lelicembu lakhiwa bazalwane nabodzadze labangu-13 labasita ekubhaleni letingoma, ekuhlanganiseni konkhe lokudzingekako natirekhodwa, ekuhleleni kanye nasekwenteni leminye imisebenti ledzingekako. Ngetulu kwaloko, iKomidi Yekufundzisa inikete imvume yekutsi kube nalabasebentela emakhaya emhlabeni wonkhe labasita kulomsebenti, lokufaka ekhatsi lababhala tingoma kanye nalabahlabelako. Ngekutfobeka, labazalwane nabodzadze basebentisa emakhono abo futsi abafuni kudvunyiswa ngenca yalomsebenti labawentako.

 Tentiwa njani letingoma leticanjiwe? Kwekucala, iKomidi Yekufundzisa ngiyo lencumako kutsi ingoma kufanele isekelwe kumiphi imiBhalo kanye nekutsi kufanele yente labayilalelako bative njani. Licembu lalabasebenta ngemculo lihlela kwentiwa kwalengoma kanye nekubhalwa kwemagama ayo. Ngemuva kwekwenta lengoma kwekucala, iKomidi Yekufundzisa iyayihlola bese ibaniketa ticondziso tekutsi kufanele bayilungise kuphi. Lelicembu libese liyayilungisa lengoma, liyirekhode kwekugcina. Letingoma tirekhodwa etindzaweni letehlukahlukene, lokufaka ekhatsi emahhovisini emagatja kanye nasemakhaya ebazalwane.

 Bazalwane basebentisa ema-computer programs lehlukahlukene kuze babhale baphindze barekhode letingoma leticanjiwe. Lomsebenti uphindze udzinge kusetjentiswe emathulusi lehlukahlukene njengema-musical instruments, ema-mixing consoles, ema-amplifiers, ema-speakers kanye nema-microphones. Iyinye, i-microphone ingabita kusuka ku-R1 547 ($100) kuya emalini lengetulu kwa-R15 474 ($1 000). Nga-2020, kwasetjentiswa R1 794 873 ($116 000) kuze kutsengwe emathulusi ekurekhoda umculo.

 Nguyiphi imetamo leyentiwako kuze kongiwe imali lenikelwe? Kunekutsi kube nelicembu lelikhulu lemculo eBethel, kusetjentiswa bazalwane labanyenti labasemakhaya. Ngetulu kwaloko, kunekutsi laba labadlala ema-musical instruments bahlangane ndzawonye kuze barekhode kanyekanye, bazalwane betfu basebentisa i-computer program kuze bente imisindvo yema-musical instruments lehlukahlukene.

 Bazalwane nabodzadze bayatsandza kulalela letingoma leticanjiwe. Tara, lohlala eGermany, utsi: “Tiyangisita nangikhatsatekile. Kutilalela ngelulwimi lwami kungenta ngitive shengatsi ngihagwa nguJehova.” Dmitry, umzalwane loseKazakhstan, utsi: “Ngiyatsandza kulalela letingoma ngobe angikhatsateki ngekutsi titangikhutsata kutsi ngente tintfo letimbi, njengobe kwenta tingoma talelive. Ngetulu kwaloko, letingoma tingisita nginake kakhulu buhlobo bami naJehova.”

 Delia, loseSouth Africa, uchaza indlela lativa ngayo ngaletingoma leticanjiwe: “Ngito letigcina buhlobo bami naJehova bucinile. Nangiva buhlungu nobe nginenkinga, kuhlale kunengoma lehambisana ncamashi nesimo lengikuso. Esikhatsini lesinyenti, kuva nje i-tune yaletingoma kwenele kuze kushintje indlela lengitiva ngayo!”

 Letinye tingoma leticanjiwe sititsandza kakhulu. Lerato, naye loseSouth Africa, utsi: “Ingoma letsi ‘Selisemnyango’ kanye naletsi ‘Eveni Lelisha’ tingenta ngitibone ngeliso lengcondvo sengemukela make wami lowashona nasekavusiwe ekufeni. Njalo nangilalela letingoma ngihlale ngimbona ngeliso lengcondvo agijima eta kimi kuze angihage.”

 Lenye ingoma lecanjiwe yamsita kakhulu losemusha waseSri Lanka. Utsi: “Thishela wami wesayensi wangitsetsisa kabuhlungu embi kwalabanye bafundzi ngenca yekutsi nginguFakazi waJehova. Ngafikelwa kwesaba futsi bengingati nekutsi ngitsini. Nangifika ekhaya, make wangikhutsata kutsi ngilalele ingoma letsi ‘Study Makes You Strong.’ Lengoma yangisita ngabona sidzingo sekwenta lucwaningo futsi ngilungiselele loko lengitakusho kuthishela wami. Ngelilanga lelilandzaleko, ngakhuluma naye, wangilalela futsi wabonga watsi nyalo sewuyakucondza loko BoFakazi BaJehova labakukholelwako. Ngiyibonga kakhulu inhlangano yaJehova ngekusentela letingoma letikhutsatako.”

 Ichamuka kuphi imali lesetjentiswa kuze kwentiwe letingoma? Ichamuka eminikelweni leyentelwa umsebenti wemhlaba wonkhe lenikelwa ngetindlela letichazwe ku-website letsi donate.pr418.com. Sinibonga kakhulu ngaleminikelo yenu.