HLALANI NILINDZILE!
2022: Umnyaka Wekucindzeteleka Nekudideka—Litsini LiBhayibheli?
Ngemnyaka wa-2022, etindzabeni bekuhlale kukhulunywa ngetimphi, ngetinkinga temnotfo kanye nangekushintja kwesimo selitulu. LiBhayibheli kuphela lelingasitjela kutsi tisho kutsini tonkhe letintfo.
Tintfo letenteke nga-2022 tisitjelani?
Tintfo letenteke nga-2022 tikwente kwacaca nakakhulu kutsi siphila esikhatsini liBhayibheli lelisibita ngekutsi ‘ngemalanga ekugcina.’ (2 KuThimothi 3:1) Lesikhatsi sacala ngemnyaka wa-1914. Naka kutsi tintfo letenteka lamuhla tifana njani naloko liBhayibheli lelakuphrofetha ngesikhatsi lesiphila kuso:
‘Timphi.’—Matewu 24:6.
“Umnyaka wa-2022 ube ngumnyaka lokubuye ngawo timphi e-Europe.” a
Buka sihloko lesitsi “IRussia Ihlasela I-Ukraine.”
“Indlala.”—Matewu 24:7.
“2022: Umnyaka Wendlala Lenkhulu.” b
Buka sihloko lesitsi “Imphi Lese-Ukraine Yente Kuswelakala Kwekudla Emhlabeni Kwaba Kubi Nakakhulu.”
‘Tifo Letingumshayabhuce.’—Lukha 21:11.
“Kubuya kwe-polio, kwandza kwe-monkeypox kanye nekuchubeka kwe-COVID-19, kuyibeke ebaleni ingoti yetifo letitsatselwanako kanye nekuba butsakatsaka kwebantfu.” c
Buka sihloko lesitsi “I-COVID-19 Ibulele Bantfu Labangu-6 Million.”
‘Kubonakala Kwetintfo Letetfusako.’—Lukha 21:11.
“Kushisa lokukhulu, somiso, umlilo wemahlatsi kanye netikhukhula. Lihlobo langa-2022 litawukhunjulwa ngekushintja kwesimo selitulu lokubi kakhulu lokuholele emonakalweni, kwabulala tinkhulungwane tebantfu futsi kwenta labanyenti balahlekelwa ngemakhaya abo.” d
Buka sihloko lesitsi “Emazinga Ekushisa Langazange Sekabonwe Emhlabeni.”
‘Tiphitsiphitsi [nobe, ‘imibango,’ ftn.].’—Lukha 21:9.
“Tinkinga temnotfo nga-2022, ikakhulukati kwenyuka kwentsengo yetintfo, kwente bantfu batfukutsela kakhulu futsi kwanyusa linani letitelega njengobe bantfu balwa nabohulumende.” e
Buka sihloko lesitsi “Kwenyuka Kwentsengo Yetintfo Emhlabeni.”
Yini letokwenteka emnyakeni lotako?
Kute longasho kutsi yini letokwenteka nga-2023. Lesikwatiko kutsi madvutane, uMbuso waNkulunkulu, nobe hulumende wasezulwini, utawuletsa lushintjo lolukhulu emhlabeni. (Danyela 2:44) Lohulumende utawucedza loko lokubangela bantfu kutsi bahlupheke futsi ucinisekise kutsi intsandvo yaNkulunkulu iyenteka emhlabeni.—Matewu 6:9, 10.
Sikukhutsata kutsi ulalele seluleko saJesu Khristu sekutsi ‘uhlale ulindzile’ njengobe tintfo letenteka lamhlabeni tigcwalisa siphrofetho seliBhayibheli. (Makho 13:37) Sicela uchumane natsi kuze ufundze lokunyenti ngekutsi liBhayibheli lingakusita njani lamuhla, kanye nekutsi lingakusita njani wena nemndeni wakho kuze nibe nelitsemba ngelikusasa lelihle.
a Sihloko lesitsi, “2022 Was Year the Horror of War Returned to Europe,” lesiphume ku-AP News ngaDecember 8, 2022 lesibhalwe nguJill Lawless.
b Sihloko lesitsi “A Global Food Crises” lesikhishwe yi-World Food Programme.
c Sihloko lesitsi “Living in an Age of Pandemics—From COVID-19 to Monkeypox, Polio, and Disease X,” lesikhishwe ku-JAMA Health Forum, lesibhalwe nguLawrence O. Gostin, JD, ngaSeptember 22, 2022.
d Sihloko lesitsi, “What’s Behind the Record-Breaking Extreme Weather Events of Summer 2022?” lesikhishwe yi-Earth.Org, lesibhalwe ngu-Martina Igini, nga-October 24, 2022.
e Sihloko lesitsi, “Economic Anger Dominated Global Protests in 2022,” lesikhishwe yi-Carnegie Endowment for International Peace, lesibhalwe ngu-Thomas Carothers naBenjamin Feldman, ngaDecember 8, 2022.