Nga-July 2022, emhlabeni wonkhe kubikwe emazinga ekushisa langazange sekabonwe:

•   “Kulenyanga, iChina ikhiphe secwayiso ngekushisa lokukhulu emadolobheni lacishe abe ngu-70.”—I-CNN Wire Service, yanga-July 25, 2022.

•   “Kwandze imililo yesiganga e-Europe njengobe emazinga ekushisa aphakama.”—I-The Guardian, yanga-July 17, 2022.

•   “NgeLisontfo, emadolobha lamanyenti e-United States abike emazinga ekushisa langazange sekabekhona njengobe kushisa lokukhulu kwasehlobo kwendlulele e-East Coast kanye nakuletinye tincenye letiseSouth naseMidwest.”—I-The New York Times, yanga-July 24, 2022.

 Kusho kutsini konkhe loku? Kutawugcina kungasahlaleki yini emhlabeni? Litsini liBhayibheli?

 Yebo. Emazinga ekushisa lasetulu emhlabeni wonkhe ahambisana kahle naloko lokwaphrofethwa liBhayibheli mayelana nesikhatsi lesiphila kuso. Sibonelo nje, Jesu waphrofetha kutsi sitawubona “tintfo letetfusako.” (Lukha 21:11) Kwenyuka kwemazinga ekushisa emhlabeni kwente bantfu besaba kutsi kutawugcina kungasahlaleki emhlabeni.

 Cha. Nkulunkulu wadala lomhlaba kutsi ube likhaya lebantfu kuze kube phakadze. (Tihlabelelo 115:16; Umshumayeli 1:4) Kunekutsi avumele bantfu bawulimate, ‘utawubhubhisa labo labalimata umhlaba,’ njengobe etsembisa.—Sembulo 11:18.

 Cabanga nganati tiphrofetho letimbili letikhombisa lokunye Nkulunkulu letsembise kukwenta:

•   “Lihlane nelive lelihamukile kuyawujabula, lugwadvule luyawujabula luchakaze timbali.” (Isaya 35:1) Nkulunkulu ngeke avume kutsi umhlaba ube yindzawo lelugwadvule lengahlali muntfu, kodvwa utawulungisa tindzawo letonakele kuwo.

•   “Wena unakekela umhlaba, uwente unotse futsi ukhicite kakhulu.” (Tihlabelelo 65:9) Nkulunkulu utawugucula lomhlaba awente lipharadesi.

 Kuze utfole lokunyenti ngendlela kushintja kwesimo selitulu lokugcwalisa ngayo siphrofetho seliBhayibheli, fundza sihloko lesitsi “Litsini LiBhayibheli Ngekushintja Kwesimo Selitulu Kanye Nangelikusasa Letfu?”

 Fundza sihloko lesitsi, “Ngubani Lotawusindzisa Umhlaba?,” kuze utfole setsembiso lesiseBhayibheli sekutsi umhlaba utawulungiswa.