“Madvutane tintfo letentiwa bantfu titasiletsela inhlekelele yekushintja kwesimo selitulu. Emadolobha lamakhulu atawumbonywa ngemanti, kube nekushisa lokukhulu, tiphepho letetfusako kanye nekwandza kwekuswelakala kwemanti. Kutawushabalala tigidzi tetinhlobo tetitjalo netetilwane. Lena yintfo letawukwenteka mbamba, akusiyo inganekwane. Konkhe loku kuyimiphumela bososayensi labatsi itawubakhona nangabe bohulumende bangayishintji imitsetfo yekusebentisa tintfo letingcolisa umhlaba (energy policies).”—Inkhulumo ya-António Guterres, lowengamele inhlangano yaMhlabuhlangene, lemayelana nembiko we-Intergovernmental Panel on Climate Change lophume nga-April 4, 2022.

 “Bososayensi becwayisa ngekutsi madvutane cishe onkhe ema-national parks langu-423 e-United States atawulinyatwa kushintja kwesimo selitulu, ikakhulukati ngobe asheshe atsintseke nakwenyuka emazinga ekushisa. Letintfo letimbi letingenteka tivakala shengatsi tehlakalo lesifundza ngato eBhayibhelini: umlilo netikhukhula, kuncibilika kwelichwa, kuphakama kwemanti elwandle kanye nekwenyuka kwemazinga ekushisa.”—Sihloko lesitsi “Flooding Chaos in Yellowstone, a Sign of Crises to Come,” ku-The New York Times ya-June 15, 2022.

 Tinkinga tekungcoliswa kwemhlaba tingalungiseka yini? Nangabe kunjalo, ngubani longatilungisa? Cabanga ngaloko liBhayibheli lelikushoko.

 LiBhayibheli litsi Nkulunkulu ‘utawubhubhisa labo labalimata umhlaba.’ (Sembulo 11:18) Lelivesi lisifundzisa tintfo letintsatfu:

1.  1. Tintfo letentiwa bantfu titawulimaka kakhulu umhlaba.

2.  2. Kulinyatwa kwemhlaba kutawuphela.

3.  3. NguNkulunkulu lotawulungisa tinkinga tekulinyatwa kwemhlaba, hhayi bantfu.

 LiBhayibheli litsi “umhlaba utawuhlala ukhona kuze kube phakadze.” (Umshumayeli 1:4) Kutawuhlale kunebantfu emhlabeni.

•   “Labalungile batawudla lifa lemhlaba, futsi bahlale kuwo kuze kube phakadze.”—Tihlabelelo 37:29.

 Umhlaba utawubuyiselwa esimeni lowawungiso nawudalwa.

•   “Lihlane nendzawo leyomile kutawujabula, indzawo lebekile lelugwadvule itawujabula kakhulu, ichakaze njengembali.”—Isaya 35:1.