Litsini LiBhayibheli Ngekuswelakala Kwekudla Lamuhla?

DLALA

“Kuphela kwendlala.” Lawa ngemavi laveta umgomo webaholi bemave mayelana nalenye yetinkinga letinkhulu letikhungetse bantfu, lokukwenetisa bonkhe bantfu ngekudla emhlabeni. a Nobe kunjalo, kutawuke kwewnteke yini kutsi kungasabi nendlala emhlabeni? Litsini liBhayibheli?

LiBhayibheli laphrofetha ngenkinga yekuswelakala kwekudla lamuhla

LiBhayibheli laphrofetha ngekuswelakala kwekudla lobekutawenteka esikhatsini lesiphila kuso, lokusikhatsi lelisibita ngekutsi ‘ngemalanga ekugcina.’ (2 KuThimothi 3:1) Nkulunkulu akakubangeli lokuswelakala kwekudla, kodvwa usecwayisile ngako. (Jakobe 1:13) Naka nati tiphrofetho letimbili letiseBhayibhelini.

“Kutawuba khona indlala . . . etindzaweni letehlukahlukene.” (Matewu 24:7) Lesiphrofetho lesiseBhayibhelini sabiketela ngekwandza kwendlala. Umbiko wakamuva lophawulekako lovetwe ngulabo labanake indlela kudla lokukhicitwa nalokusakatwa ngayo utsi: “Indlala kanye nekuswelakala kwekudla lokunemphilo nalokwenela kusimo lesiya ngekuba sibi kakhulu.” b Tigidzi tebantfu emaveni lamanyenti atikutfoli kudla letikudzingako. Lokubuhlungu kutsi ngenca yaloko, bantfu labanyenti bayafa.

“Ngatsi nangibuka ngabona lihhashi lelimnyama; lobekaligibele bekaphetse sikali esandleni sakhe.” (Sembulo 6:5) Lelihhashi lelingekwemfanekiso kanye naloyo lobekaligibele kumelela indlala kulamalanga ekugcina. c Lesikali lesisesandleni salomgibeli walelihhashi sisetjentiselwa kukala kudla kuze bantfu batfole kudla lokuncane. Njengobe lomgibeli walelihhashi aligibele, kuvakala livi lelimemetela kutsi emanani ekudla atawenyuka kakhulu, futsi lecwayisa bantfu kutsi bangakumoshi kudla lokusisekelo. (Sembulo 6:6) Loku kuyiveta kahle indlela kudla lokuswelakala ngayo lamuhla njenogbe tigidzigidzi tebantfu tingakhoni kukutfola nobe kutsenga kudla lokunemphilo.

Indlela kuswelakala kwekudla lokutawuphela ngayo

Tati titsi iplanethi yetfu inekudla lokwenele lokungenela bonkhe bantfu labahlala kuyo. Ngako-ke, yini lebangela kutsi kube nekuswelakala kwekudla? LiBhayibheli litsi yini uMdali wetfu Jehova d latayenta kuze acatulule letinkinga?

Inkinga: Bohulumende angeke bakhone kucedza kuhlupheka kanye nekungalingani kwetemnotfo lokwenta bantfu bahlale balambile.

Sisombululo: Bohulumende labanesono batawutsatselwa sikhundla nguMbuso waNkulunkulu, lokunguhulumende lokahle kakhulu. (Danyela 2:44; Matewu 6:10) Lamuhla, bantfu labanyenti labaphuyile kumatima kutsi batfole kudla, kodvwa nasekubusa uMbuso waNkulunkulu loko kutawushintja. Naku lokushiwo liBhayibheli ngaJesu Khristu loyiNkhosi yeMbuso waNkulunkulu: “Itawukhulula lohluphekile lokhalela lusito, ikhulule lophansi kanye naloyo lote longamsita. . . . Kutawuba nenala yekudla emhlabeni; kube kunyenti ngisho naseticongweni tetintsaba.”—Tihlabelelo 72:12, 16.

Inkinga: Timphi tibanga umonakalo nekuwa kwemnotfo, lokwenta kutsi kube lukhuni ngebantfu kutfola kudla.

Sisombululo: “[Jehova] ucedza timphi emhlabeni wonkhe. Wephula butjoki, ephule nesikhali sibe ticucu; futsi ushisa tincola temphi ngemlilo.” (Tihlabelelo 46:9) Nkulunkulu utawubhubhisa tikhali temphi kanye nalabo lababanga timphi. Ngenca yaloko, kutawuba melula kutsi bonkhe bantfu batfole kudla. LiBhayibheli lisetsembisa kutsi: “Bantfu labalungile batawuphumelela, kwandze kuthula.”—Tihlabelelo 72:7.

Inkinga: Simo selitulu lesibi kanye netehlakalo temvelo kulimata titjalo kuphindze kubulale nemfuyo.

Sisombululo: Nkulunkulu utawulawula simo selitulu emhlabeni kutsi sibe ngulesikahle futsi kukhule titjalo. LiBhayibheli litsi: “[Jehova] uthulisa sivunguvungu; bese emagagasi aselwandle ayabindza. . . . Ushintja lugwadvule lube yindzawo lenemachibi; ashintje nendzawo leyomile ibe nemitfombo yemanti. Labalambile ubahlalisa lapho . . . Balima emasimu futsi bahlanyele netihlahla temagilebisi batfole sivuno lesihle kakhulu.”—Tihlabelelo 107:29, 35-37.

Inkinga: Bantfu labangemagovu nalabangaketsembeki bakhicita kudla lokungakaphephi, nobe bente bantfu bangakutfoli kudla labakudzingako.

Sisombululo: Umbuso waNkulunkulu utawususa bonkhe bantfu labangaketsembeki nalabakhohlakele. (Tihlabelelo 37:10, 11; Isaya 61:8) LiBhayibheli lichaza Jehova Nkulunkulu ngekutsi “Ubehlulela ngekulunga labo labemukwe tintfo tabo, abaphe kudla labo labeswele.”—Tihlabelelo 146:7.

Inkinga: Njalo ngemnyaka kumosheka nobe kulahlwe kudla lokunyenti kakhulu.

Sisombululo: Nasekubusa uMbuso waNkulunkulu, kudla kutawunakekelwa ngendlela lefanele. Ngalesikhatsi alamhlabeni, Jesu bekakubalekela kumosha kudla. Sibonelo nje, ngalelinye lilanga wondla sicumbi sebantfu lesingetulu kwa-5 000 ngalokusimangaliso. Ngekuhamba kwesikhatsi, watjela bafundzi bakhe watsi: “Butsani loko lokusele kuze kube bete lesikumoshako.”—Johane 6:5-13.

Ngenca yekutsi uMbuso waNkulunkulu utawucedza tonkhe tintfo letibangela indlala, bonkhe bantfu batawujabulela inala yekudla lokunemphilo. (Isaya 25:6) Kuze utfole kutsi uMbuso waNkulunkulu utawukwenta nini loku, fundza sihloko lesitsi “UMbuso WaNkulunkulu Utawubusa Nini Emhlabeni”

a I-2030 Agenda for Sustainable Development, leyavunywa ngiwo onkhe emave langemalunga aMhlabuhlangene emhlabeni nga-2015.

b Umbiko lowakhishwa yi-Food and Agriculture Organization of the United Nations, ne-nternational Fund for Agricultural Development, ne-United Nations Children’s Fund, ne-United Nations World Food Programme, kanye ne-World Health Organization.

c Kuze utfole lokunyenti ngebagibeli bemahhashi labane lokukhulunywa ngabo encwadzini yeSembulo, fundza sihloko lesitsi “Bobani Labagibeli Bemahhashi Labane?”

d Jehova ligama laNkulunkulu. (Tihlabelelo 83:18) Fundza sihloko lesitsi “Ungubani Jehova?”