“Sonkhe sifuna kuphila kwetfu kubuyele njengobe bekunjalo ngaphambi kwe-COVID-19.”—Angela Merkel, German chancellor.

 Kungenteka uvumelana nalamavi akhe njengobe sifo se-COVID-19 sichubeka sihlasela bantfu emhlabeni wonkhe. Kushoni kubuyela “ekuphileni kwangaphambi kwe-COVID-19”? Yini bantfu labafise kuyenta?

•   Kuphila ngendlela lebebaphila ngayo ngaphambi kwe-COVID-19. Labanye balangatelela kucitsa sikhatsi nalabanye bantfu, bakhone kubahaga nekubachawula futsi baphindze bavakashe. Beva shengatsi kuphila imphilo levamile kufaka ekhatsi “kuya etindzaweni tekudlela, kuya lakubukelwa khona emafilimu [kanye] nekwenta lokunye lokufana naloku,” njengobe kusho Dr. Anthony Fauci a.

•   Kutfutfukisa kuphila kwabo. Labanye babona loku njengelitfuba lekushintja kuphila kwabo kuze kube ncono kunakucala. Beva shengatsi kunetintfo letinyenti lokufanele tishintje, njengemisebenti ledzinga sikhatsi nemandla lamanyenti, kuphatfwa kabi kwebantfu ngenca yebuve babo nobe simo sabo semnotfo kanye nekucindzeteleka kwebantfu. Klaus Schwab, longumsunguli we-World Economic Forum, utsi, “i-COVID-19 isinikete litfuba leliyimvela kancane lekucabangisisa ngetimphilo tetfu nangendlela lesifuna lomhlaba lesiphila kuwo ube ngayo, bese senta lushintjo ngobe lelitfuba angeke lihlale likhona.”

 Labanye lesifo se-COVID-19 sibabangele tinkinga letinyenti kakhulu kangangekutsi abasaboni kutsi kuphila kuyawuke kubuyele njengobe bekunjalo ekucaleni. Sibonelo nje, labanyenti balahlekelwe yimisebenti, ngemakhaya abo, bagula, futsi lokubi nakakhulu bashonelwe tihlobo tabo.

 Kuliciniso kutsi kute longasho ngalokucondzile kutsi kuphila kutawuba njani nasekuphele lesifo se-COVID-19. (Umshumayeli 9:11) Nobe kunjalo, liBhayibheli lingasisita ngaloko lesingakulindzela ngelikusasa futsi lisisite sibhekane nanobe yini letawukwenteka. Ngetulu kwaloko, liBhayibheli lisitjela ngelikusasa lesingaciniseka ngalo, lokungenteka asikalilindzeli.

 Kadzeni liBhayibheli laphrofetha kutsi bekutawubakhona tifo letitsatselwanako nobe “letingumshayabhuce” ‘ekupheleni kwalelive.’ (Lukha 21:11; Matewu 24:3) Nasibuka i-COVID-19 ngaleyo ndlela, siyabona kutsi ingulesinye setentakalo letibalulekile letifaka ekhatsi timphi, kutamatama lokukhulu kwemhlaba kanye nendlala, liBhayibheli lelaphrofetha kutsi titawenteka.

 Kwati loku kusisita njani: Ngisho nobe timo tekuphila kulomkhuhlane tingaba ncono, liBhayibheli lisecwayisa ngekutsi siphila “etikhatsini letibucayi lokumatima kubhekana nato.” (2 KuThimothi 3:1) Kwati loku kutasisita ngaloko lesingakulindzela ekuphileni kwetfu kuletikhatsi letimatima.

 LiBhayibheli lisiniketa nangu umbono longiwo: Madvutane kutawuba nelushintjo lolukhulu kulomhlaba lesiphila kuwo lonetinkinga letingapheli. Lutawuba yini lolushintjo?

 LiBhayibheli aliphrofethanga kuphela ngetinkinga letinkhulu letikhona lamuhla kodvwa laphindze laphrofetha nangelikusasa lelihle lelitawufika madvutane. Likhuluma ngelikusasa bohulumende bebantfu labangakucabangi nekukucabanga kuliletsela bantfu, kodvwa lelingaletfwa kuphela nguNkulunkulu. “Uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona.”—Sembulo 21:4.

 Jehova b Nkulunkulu uyetsembisa: “Ngenta tonkhe tintfo tibe tinsha.” (Sembulo 21:5) Utawucatulula tinkinga talomhlaba, lokufaka ekhatsi naleto letibe timbi kakhulu kulesikhatsi salomkhuhlane.Utawusentela naku lokulandzelako:

•   Utasenta sibe nemphilo lenhle emitimbeni nasetingcondvweni, singaphindzi sigule nobe sife.—Isaya 25:8; 33:24.

•   Utasiniketa umsebenti lowenetisa mbamba, hhayi lodzinga sikhatsi nemandla lamanyenti futsi losenta sikhatsale kakhulu.—Isaya 65:22, 23.

•   Utawuletsa imphumelelo kubo bonkhe bantfu futsi aciniseke kutsi kute buphuya nendlala.—Tihlabelelo 72:12, 13; 145:16.

•   Utaselapha ebuhlungwini lobubangelwa tintfo letenteka esikhatsini lesengcile, futsi sitawuphindze sibe nelitsemba lekutsi tihlobo tetfu letifile titawuvuswa.—Isaya 65:17; Imisebenti 24:15.

 Kwati loku kungasisita njani: LiBhayibheli litsi: “Sinalelitsemba lelinjengelihhuka lemkhumbi letimphilo tetfu.” (KumaHebheru 6:19, umbhalo longentasi) Lelitsemba letintfo letinhle letisatokwenteka lingasisita sibhekane netinkinga letimatima letikhona lamuhla, linciphise kukhatsateka, liphindze lisisite sihlale sinekuthula futsi sijabulile.

 Singakwetsemba mbamba yini loko liBhayibheli lelisetsembisa kona? Buka sihloko lesitsi “LiBhayibheli Lingumtfombo Loliciniso Lesingawetsemba.”

•   Kutsatse njengalokuligugu kuphila

   Umbhalo: ‘Kuhlakanipha kulondvolota kuphila kwalabo labanako.’—Umshumayeli 7:12.

   Lokukushoko kuwe: Yenta tincumo letihlakaniphile kuze unciphise ematfuba ekugula. Kwati lokwenteka endzaweni lohlala kuyo. Cabanga ngemitsetfo yetemphilo neyekuphepha, lizinga lesifo lesandza ngayo kanye nelinani lebantfu labagome ngalokuphelele endzaweni lohlala kuyo.

•   Hlala ucaphile

   Umbhalo: “Umuntfu lohlakaniphile uhlala acaphile futsi uyakubalekela lokubi, kodvwa silima asinendzaba futsi sitetsemba kakhulu.”—Taga 14:16.

   Lokukushoko kuwe: Chubeka wenta lokudzingekile kuze uvikele imphilo yakho. Tati tikholelwa kutsi i-coronavirus itawuchubeka ikhona sikhatsi lesidze.

•   Sebentisa kwatiswa lokuliciniso

   Umbhalo: “Umuntfu lote lwati wetsemba konkhe lakuvako, kodvwa lohlakaniphile uyacabangisisa ngako konkhe lakwentako.”—Taga 14:15.

   Lokukushoko kuwe: Sikhetse kahle seluleko lotasilandzela. Lokukhetsako kubalulekile ngobe ungahle ubeke imphilo yakho engotini ngenca yetincumo lotentako letisekelwe endzabeni lengemanga.

•   Bani nembono lokahle

   Umbhalo: “Ungacali utsi: “Kungani emalanga akadzeni bekancono kunalawa?” ngobe akusiko kuhlakanipha kubuta loko.”—Umshumayeli 7:10.

   Lokukushoko kuwe: Timisele kuphila imphilo lejabulisako kulesimo lokuso. Kubalekele kucabanga kutsi kuphila bekuncono ngaphambi kwekutsi kucale lesifo kanye nekucabanga ngetintfo longakakhoni kutenta ngenca yaso.

•   Hlonipha labanye bantfu

   Umbhalo: “Hloniphani tonkhe tinhlobo tebantfu.”—1 Phetro 2:17.

   Lokukushoko kuwe: Bantfu banemibono lengafani ngalesifo nemiphumela yaso, ngako yihloniphe imibono yabo futsi unamatsele esincumeni lesihle losentile. Bacabangele labangakagomi, lasebakhulile kanye nalabanetinkinga temphilo letimatima.

•   Beketela

   Umbhalo: “Lutsandvo luyabeketela futsi lunemusa.”—1 KubaseKhorinte 13:4.

   Lokukushoko kuwe: Bani nemusa kulabanye nangabe bativa bangakhululeki kwenta tintfo lebebavame kutenta ngaphambi kwekutsi kucale lesifo. Nawe tibeketelele njengobe timo setiba ncono futsi sewungakhona nekwenta letinye tintfo.

 BoFakazi BaJehova batfola indvudvuto etetsembisweni teliBhayibheli telikusasa lelihle, futsi tibasita kutsi banganaki kakhulu loko lokwenteka kulesikhatsi salomkhuhlane. Baphindze basekelane ngekulalela umyalo weliBhayibheli lotsi bahlangane njalo ndzawonye kuze bakhonte Nkulunkulu. (KumaHebheru 10:24, 25) Wonkhe muntfu wemukelekile kubakhona kulemihlangano yaBoFakazi BaJehova lebanjwa nge-videoconferencing kulesikhatsi salomkhuhlane.

 Labanye bayavuma kutsi kubakhona kulemihlangano yaBoFakazi BaJehova kubasite kakhulu kuletikhatsi letimatima. Sibonelo nje, lomunye wesifazane lobekane-COVID-19 wemukela simemo sekujoyina imhlangano yaBoFakazi BaJehova lebanjwa nge-videoconferencing. Lemihlangano imsite wajabula ngisho nobe bekalwisana nalesifo. Ngekuhamba kwesikhatsi watsi: “Ngitiva ngililunga lalomndeni. Kufundza liBhayibheli kungenta ngibe nekuthula, futsi kungisita nginake litsemba lenginalo ngelikusasa kunekunaka tinkinga tami. Ngiyabonga ngekungisita ngisondzelane naNkulunkulu lokuyintfo lebengisolo ngiyifuna kuphila kwami konkhe.”