Bantfu labanyenti emhlabeni wonkhe babeketelela tikhukhula letinemandla. Naka lemibiko lelandzelako:

•   “Inhlokodolobha yaseChina ibike kutsi emalangeni lambalwa lendlulile kube netimvula letinkhulu lengakaze yatibona eminyakeni lengaba ngu-140. Letimvula betilinganiselwa ku-744.8 millimeters kusukela ngeMgcibelo kuya kuLesitsatfu.”​—I-AP News, August 2, 2023.

•   “Siphepho lokutsiwa nguKhanun sente kutsi ngaLesine kube lilanga lesibili kunetimvula letinkhulu kanye nemoya lonemandla eningizimu yeJapan. Ngenca yaloko, kufe bantfu lababili. . . . Lesiphepho kulindzeleke kutsi siletse imvula lengaba ngu-0.6 meters etindzaweni letiphakeme letisekhatsi nekhatsi neTaiwan.”​—I-Deutsche Welle, August 3, 2023.

•   “Tikhukhula letibekhona [eNova Scotia] tibangelwe timvula lebetihlasele sifundza sase-Atlantic Canada, futsi loku solo kwagcina kwenteka eminyakeni lengu-50 leyendlulile.”​—Tindzaba te-BBC, July 24, 2023.

 Litsini liBhayibheli ngaloku?

 LiBhayibheli liveta kutsi siphila esikhatsini lesibitwa ngekutsi ‘ngemalanga ekugcina.’ (2 KuThimothi 3:1) Jesu waphrofetha kutsi kulesikhatsi lesiphila kuso besitawubona “tintfo letetfusako” nobe tentakalo letesabisako. (Lukha 21:11) Kushintja kwesimo selitulu kubangele kutsi kube netehlakalo temvelo letingakalindzeleki, letenteka njalo futsi letenteka ngelizinga lelikhulu.

 LiBhayibheli lisitjela kutsi letintfo letetfusako letentekako emhlabeni lamuhla kufanele tisinikete litsemba. Kanjani? Jesu watsi: “Nanibona letintfo tenteka, nibowati kutsi uMbuso waNkulunkulu sewusondzele.”​—Lukha 21:31; Matewu 24:3.

 Simo selitulu lesibi lesikhona lamuhla sisikhombisa kutsi madvutane uMbuso waNkulunkulu utayilawula ngalokuphelele imvelo, lokufaka ekhatsi umjikeleto wemanti.​—Jobe 36:27, 28; Tihlabelelo 107:29.

 Kuze utfole lokunyenti mayelana nekutsi uMbuso waNkulunkulu utayibuyisela njani imvelo esimeni lesikahle, fundza sihloko lesitsi “Ngubani Lotawusindzisa Umhlaba?”