Nga-October 9, 2024, i-World Wildlife Fund yakhipha umbiko lowetfusako lomayelana nendlela bantfu labaphatsa ngayo tilwane tesiganga. Lombiko waveta kutsi, “kuleminyaka lengu-50 leyengcile (1970-2020), linani letilwane tesiganga letigadvwako lehle ngemaphesenti langu-73.” Wecwayisa watsi: “Lokutokwenteka kuleminyaka lesihlanu letako kutawuveta kutsi tilwane tesiganga titawube tisekhona yini Emhlabeni.”

 Bantfu labanyenti iyabetfusa lemibiko, futsi kube kufanele. Siyalitsandza likhaya letfu lelingumhlaba, futsi kusivisa buhlungu kubona tilwane tesiganga letikulelikhaya tiphatseka kabi. Sitiva ngalendlela ngobe Nkulunkulu bekasidalele kutsi sitinakekele letilwane.​—Genesisi 1:27, 28; Taga 12:10.

 Ungahle utibute, ‘Sitawukhona yini kuvikela tilwane tesiganga? Litsini liBhayibheli?’

 Noma singazama kangakanani kuvikela tilwane, angeke siphumelele ngoba nguNkulunkulu kuphela longakhona kutivikela. KuSembulo 11:18, liBhayibheli liyaveta kutsi Nkulunkulu ‘utawubhubhisa labo labalimata umhlaba.’ Lelivesi lisifundzisa ngetintfo letimbili:

1.  1. Nkulunkulu utawuvimba bantfu kutsi bangawulimati ngalokuphelele umhlaba.

2.  2. Nkulunkulu utawutsatsa sinyatselo ngekushesha. Sati ngani? Ngobe lamuhla kuphila kwetilwane tesiganga kusengotini lenkhulu kwendlula esikhatsini lesendlulile.

 Yini Nkulunkulu latoyenta kuze alungise lenkinga? Utawusebentisa hulumende wakhe wasezuluwini nobe uMbuso wakhe kutsi ubuse emhlabeni wonkhe. (Matewu 6:10) Lohulumende utawufundzisa bantfu labalalelako indlela yekunakekela kanye nekuvikela tilwane tesiganga.​—Isaya 11:9.