NgaFebruary 24, 2022, emasotja aseRussia acala kuhlasela i-Ukraine futsi loku kwabangela tinkinga letinyenti njengobe bantfu betama kubaleka. a

 “Bekuchuma emabhomu futsi bekwetfusa ngendlela lengachazeki. Nasiva kutsi kunetitimela letilayisha bantfu lababalekako, natsi sancuma kubaleka. Umuntfu ngamunye bekufanele apakishe konkhe latakudzinga esikhwameni sinye lesincane. Satsatsa kuphela timphepha letimcoka, emaphilisi nemitsi, emanti kanye nekudla lokulula. Sashiya konkhe lokunye sayogibela lesitimela njengobe bekuchuma emabhomu.”—Nataliia, waseKharkiv, e-Ukraine.

 “Bengisolo ngicabanga kutsi angeke kuze kube nemphi kwaze kwaba ngumzuzu wekugcina. Ngeva kuchuma kwemabhomu kuletinye tincenye telidolobha kwaze kwazizitela nemafasitelo. Ngancuma kuhamba, ngatsatsa kuphela tintfo lebengitidzinga mbamba. Ngasuka nga-8 ekuseni ngagibela sitimela lesiya eLviv, langafike ngatsatsa khona ibhasi leya ePoland.”—Nadija, waseKharkiv, e-Ukraine.

Lokukulesihloko

•  Yini mbambambamba lebangele kutsi labantfu babaleke eveni labo?

•  Babaleki bangalitfola kuphi litsemba?

•  LiBhayibheli lingabasita yini babaleki lamuhla?

 Yini mbambambamba lebangele kutsi labantfu babaleke eveni labo?

 Lenkinga yalababaleki yacala ngalesikhatsi emasotja aseRussia ahlasela i-Ukraine. Nobe kunjalo, liBhayibheli liveta imbangela lebhacile futsi lejulile yato tonkhe letinkinga letenta kube nebabaleki:

•   Emhlabeni wonkhe, bohulumende bebantfu behlulekile kunika bantfu loko labakudzingako. Labo labasemagunyeni bavame kusebentisa ligunya labanalo kuze bacindzetele labanye.—Umshumayeli 4:1; 8:9.

•   Sathane Develi, “umbusi walelive,” ulawula bantfu ngendlela lembi kangangekutsi liBhayibheli lize litsi: “Lonkhe live lisemandleni alomubi.”—Johane 14:30; 1 Johane 5:19.

•   Ngetulu kwetinkinga letihluphe bantfu iminyaka leminyenti, nyalo siphila emalangeni liBhayibheli lelaphrofetha ngawo: “Emalangeni ekugcina kutawuba netikhatsi letibucayi lokumatima kubhekana nato.” (2 KuThimothi 3:1) Ngetulu kwaloko, lamalanga abetawubonakala ngetimphi, tehlakalo temvelo, indlala kanye netifo letingumshayabhuce, lokutintfo letenta bantfu babaleke emaveni abo.—Lukha 21:10, 11.

 Babaleki bangalitfola kuphi litsemba?

 LiBhayibheli liveta kutsi uMdali wetfu, Jehova, b unguNkulunkulu lobatsandzako nalobavelako babaleki kanye nebantfu lokudzingeke kutsi bashiye emakhaya abo. (Dutheronomi 10:18) Wetsembisa kucatulula tinkinga letibangela kutsi kube nebabaleki asebentisa hulumende wasezulwini, lobitwa ngekutsi nguMbuso waNkulunkulu, lotawutsatsa sikhundla sabohulumende bebantfu. (Danyela 2:44; Matewu 6:10) Jehova utawusebentisa uMbuso wakhe kuze asuse Sathane Develi. (KubaseRoma 16:20) LoMbuso nguhulumende lotawubusa emhlabeni wonkhe, ususe nemincele leyehlukanisa emave. Bonkhe bantfu batawuba ngumndeni wemhlaba wonkhe lonebunye. Ngeke kuphindze kube nemuntfu lokutawudzingeka abaleke ashiye likhaya lakhe, ngobe liBhayibheli liyetsembisa: “Nguloyo naloyo utawuhlala ngephansi kwesihlahla sakhe semagilebisi nangephansi kwesihlahla sakhe semakhiwa, futsi kute lotabesabisa, ngobe Jehova wemabutfo sewukhulumile.”—Mikha 4:4.

 NguMbuso waNkulunkulu kuphela lotawuletsa sisombululo lesitawuhlala phakadze setinkinga letenta kube nebabaleki. Jehova utawusebentisa uMbuso wakhe kuze acedze tinkinga letiphocelela bantfu kutsi babe babaleki. Cabanga nganati tibonelo:

•   Timphi. “[Jehova] ucedza timphi emhlabeni wonkhe.” (Tihlabelelo 46:9) Kuze utfole kutsi Nkulunkulu utakucedza njani kungevani, fundza sihloko lesitsi “Ukuthula Emhlabeni—Kuyofika Kanjani?” lesitfolakala ngesiZulu.

•   Kucindzetelwa nebudlova. ‘Jehova utawubakhulula ekucindzetelweni nasebudloveni.’ (Tihlabelelo 72:14) Kuze ucondze kutsi bantfu bangayishintja njani indlela lesebanesikhatsi lesidze bacabanga ngayo, fundza luchungechunge lwetihloko letitsi “Singayincoba Inzondo,” lesitfolakala ngesiZulu.

•   Buphuya. ‘Jehova utawukhulula lohluphekile lokhalela lusito.’ (Tihlabelelo 72:12) Kuze ubone kutsi Nkulunkulu utayicedza njani imbangela leyinhloko yebuphuya, fundza sihloko lesitsi “Ingabe Isimo Sezomnotho Esanelisa Bonke Abantu Siyoke Sibe Khona?” lesitfolakala ngesiZulu.

•   Indlala. “Kutawuba nenala yekudla emhlabeni.” (Tihlabelelo 72:16) Kuze utfole loko Nkulunkulu latawukwenta kuze aciniseke kutsi kute umuntfu lolambako, fundza sihloko lesitsi “Ingabe Liyoke Libe Khona Izwe Elingenayo Indlala?” lesitfolakala ngesiZulu.

 LiBhayibheli lingabasita yini babaleki lamuhla?

 Yebo. Ngaphandle nje kwekubaniketa litsemba ngelikusasa, liBhayibheli lingaphindze libasite ngetinkinga lababhekene nato nyalo.

 Simiso seliBhayibheli: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga; futsi kuthula kwaNkulunkulu lokwendlula konkhe kucondza kutawulondvolota tinhlitiyo netingcondvo tenu ngaKhristu Jesu.”—KubaseFiliphi 4:6, 7.

 Lokukushoko: Kunobe ngusiphi simo lotitfola ukuso, cela Nkulunkulu akuphe kuthula kwengcondvo nekwenhlitiyo. Buka sihloko lesitsi “Filipi 4:6, 7—“Ningakhathazeki Ngalutho” lesitfolakala ngesiZulu.