Kulahlekelwa ngumsebenti kungasho kutsi angeke ube nemali leyenele yekunakekela umndeni wakho, futsi loko kungakwenta ukhatsateke futsi kukutfukutselise. Kucabanga ngaleteluleko letisekelwe etimisweni letihlakaniphile letiseBhayibhelini kungakusita ubeketelele lesimo.

•   Coca nalabanye ngendlela lotiva ngayo.

   Lokushiwo liBhayibheli: “Umngani sibili ukutsandza ngaso sonkhe sikhatsi.”—Taga 17:17.

   Ngemuva kwekulahlekelwa ngumsebenti ungeva buhlungu, utfukutsele, udideke nobe utikhandze usehluleki. Nawutjela emalunga emndeni nobe bangani bakho ngendlela lotiva ngayo, bangakwenta utive uncono. Bangakuniketa neseluleko longasisebentisa, baphindze bakusite utfole lomunye umsebenti.

•   Ungakhatsateki ngalokwecile.

   Lokushiwo liBhayibheli: “Ningacali nikhatsateke ngelilanga lelilandzelako, ngobe nalo litawuba netinkinga talo.”—Matewu 6:34.

   LiBhayibheli lisikhutsata kutsi sihlele kusenesikhatsi. (Taga 21:5) Nobe kunjalo, liphindze liseluleke ngekutsi singakhatsateki ngalokwecile ngelikusasa. Esikhatsini lesinyenti, sigcina sikhatsateka ngetintfo letingeke tize tenteke. Kuncono kunaka lokumele sikwente ngalelolanga.

   LiBhayibheli lisiniketa teluleko letihlakaniphile tendlela lesingabhekana ngayo nekucindzeteleka lokungenteka sinako. Fundza sihloko lesitsi “Indlela Yokubhekana Nokucindezeleka,” lesitfolakala ngesiZulu, kuze utfole lokunyenti.

•   Shintja indlela losebentisa ngayo imali.

   Lokushiwo liBhayibheli: ‘Ngifundze kuba nalokunyenti kanye nekungabi nalutfo.’—KubaseFiliphi 4:12.

   Vumelana nesimo lokuso. Loku kufaka ekhatsi kushintja indlela losebentisa ngayo imali kuze ukhone kuphila ngalonako. Ungatifaki etikweletini ngalokungenasidzingo.—Taga 22:7.

   Kuze utfole teluleko letengetiwe letingakusita uvumelane nesimo sakho setimali, buka sihloko lesitsi “Indlela Ongaphila Ngayo Ngokuncane,” lesitfolakala ngesiZulu.

•   Sisebentise kahle sikhatsi sakho.

   Lokushiwo liBhayibheli: “Chubekani nihamba ngekuhlakanipha . . . nisisebentise kahle nesikhatsi senu.”—KubaseKholose 4:5.

   Ngisho nobe sewungasayi emsebentini, chubeka uneluhlelo loluhle lwekusebentisa kahle sikhatsi lonaso. Kwenta njalo kutawenta kuphila kwakho kuhleleke futsi kukwente ungatibukeli phansi.

•   Vumelana netimo.

   Lokushiwo liBhayibheli: “Konkhe kusebenta kamatima kunemvuzo.”—Taga 14:23.

   Kulungele kwenta umsebenti lowehlukile kulowo bewuwenta ngaphambili. Kungase kudzingeke ucabange nekwenta imisebenti lebonakala ingakabaluleki nobe leholela kancane kunalomsebenti bewuwenta.

•   Ungapheli emandla.

   Lokushiwo liBhayibheli: “Hlanyela inhlanyelo yakho ekuseni futsi ungayekeli kuhlanyela lize liyoshona; ngobe awati kutsi ngukuphi lokutawuphumelela.”—Umshumayeli 11:6.

   Chubeka ufuna umsebenti. Tjela labanye kutsi ufuna umsebenti. Khuluma netihlobo, bantfu lobetayele, bantfu loke wasebenta nabo kanye nabomakhelwane. Buka liphephandzaba lapho kukhulunywa khona ngemisebenti levulekile nobe ubuke tikhala temsebenti kuma-websites. Kulungele kuya kuma-interview lamanyenti emsebenti kanye nekuhambisa timphepha takho tekusebenta (résumés) ngaphambi kwekutsi utfole umsebenti.