Baholi bemhlaba kanye netinhlangano letikhona emhlabeni wonkhe bayehluleka kuletsa kuthula. Sekunyenti kakhulu kungevani lokuholela etimphini lamuhla kunaloko bekukhona kusukela kwaphela iMphi Yelive Yesibili. Cishe bantfu labangu 2 billion emhlabeni wonkhe bahlala emaveni lahlaselwe ngulokungevani lokuholela etimphini.

 Yini leyenta bantfu behluleke kuletsa kuthula? Litsini liBhayibheli?

1.  1. Bantfu batiphatsa ngendlela lebenta bangakhoni kwakha kuthula ngisho nobe bangazama kanganani. LiBhayibheli laphrofetha kutsi esikhatsini setfu “bantfu batawutitsandza bona, batsandze imali, batigabatise, batigcabhe, . . . bangetsembeki, . . . bangavumi kwenta tivumelwane, . . . bangatibambi, babe nelulaka, bangakutsandzi lokuhle, . . . babe nenkhani, bagcwale umgcabho.”​—2 KuThimothi 3:2-4.

2.  2. Umuntfu amunye nobe balicembu, angeke bakhone kucatulula tinkinga tabo ngaphandle kwekusitwa nguMdali wabo, Nkulunkulu Jehova. a LiBhayibheli liveta kutsi “akusiko kwemuntfu kutsi aticondzisele yena imphilo yakhe.”​—Jeremiya 10:23.

3.  3. Umhlaba wonkhe ubuswa ngumbusi lomubi futsi lonemandla, Sathane Develi, “lodukisa umhlaba wonkhe.” (Sembulo 12:9) Timphi kanye nekungevani angeke kuze kuphela nangabe umhlaba wonkhe ‘usesemandleni alomubi.’​—1 Johane 5:19.

 LiBhayibheli lisicinisekisa kutsi kuthula kutawubakhona, kodvwa angeke kuletfwe bantfu, kutawuletfwa nguNkulunkulu.

•   “Jehova utsi: ‘Ngikwati kahle loko lengitanentela kona, ngitanenta nibe nekuthula, ningehlelwa yinhlekelele, kuze nibe nelikusasa lelihle kanye nelitsemba.’”​—Jeremiya 29:11.

 Nkulunkulu utasifeza njani lesetsembiso? “Nkulunkulu lonika kuthula utawupitjita Sathane.” (KubaseRoma 16:20) Utawusebentisa hulumende wasezulwini, liBhayibheli leliwubita ngekutsi “nguMbuso waNkulunkulu,” kuze aletse kuthula emhlabeni wonkhe. (Lukha 4:43) Jesu Khristu, iNkhosi yaloMbuso, nasekabusa umhlaba wonkhe, bantfu batawufundziswa kuphilisana ngekuthula.​—Isaya 9:6, 7.

•   Kuze utfole lokunyenti, fundza sihloko lesitsi “Yini Letawufezwa NguMbuso WaNkulunkulu?”