Ipolitiki yehlukanise bantfu emhlabeni wonkhe. Ngekusho kwelucwaningo lwanga-2022 lwe-Pew Research Center, “emaphesenti langu-65 ebantfu labadzala labasemaveni langu-19 batsi kunekuphikisana lokumatima emkhatsini webantfu labasekela emacembu etepolitiki lehlukahlukene emaveni abo.”

 Unakile yini kutsi kuyandza kungevani lokubangwa yipolitiki lapho uhlala khona? Kubangwa yini loku? Likhona yini likhambi? Cabanga ngaloko lokushiwo liBhayibheli.

 LiBhayibheli laphrofetha kutsi esikhatsini setfu, lesibitwa ngekutsi ‘ngemalanga ekugcina,’ bantfu labanyenti bebatawuba nesimo sengcondvo lebesitawenta kube matima kutsi kube nebunye emhlabeni.

•   “Emalangeni ekugcina kutawuba netikhatsi letibucayi lokumatima kubhekana nato. Ngobe bantfu batawutitsandza bona, . . . bangavumi kwenta tivumelwane.”—2 KuThimothi 3:1-3.

 Nangetulu kwemetamo lemihle bantfu labayentako, bohulumende bayehluleka kusebenta ngendlela lephumelelako. Bantfu labanemibono lengafani bakutfola kumatima kusebenta ngekubambisana kuze kucatululwe tinkinga. Imiphumela yaloku ikufakazela kahle loko lokwashiwo liBhayibheli kadzeni.

•   “Umuntfu ubuse lomunye umuntfu wase uyamlimata.”—Umshumayeli 8:9.

 Nobe kunjalo, liBhayibheli liveta kutsi sisombululo saloku kutawuba nguhulumende loholwa ngumuntfu lonemandla ekucedza tinkinga tekungevani letikhungetse bantfu lamuhla.

 LiBhayibheli lisitjela ngemholi lokunguye yedvwa lofanelekako, lokunguJesu Khristu. Jesu unemandla, ligunya nesifiso sekuletsela bonkhe bantfu kuthula kanye nebunye.

•   “Nasekubusa yona, bantfu labalungile batawuphumelela, kwandze kuthula.”—Tihlabelelo 72:7.

•   “Onkhe emakhosi atayikhotsamela.”—Tihlabelelo 72:11.

 Jesu ungumholi lofanelekako ngobe uyabakhatsalela bantfu futsi ufuna kubasita, ikakhulukati labo labangaphatfwa kahle.

•   “Ngobe itawukhulula lohluphekile lokhalela lusito, ikhulule lophansi kanye naloyo lote longamsita. Itamvela lophansi nalohluphekile, futsi itawusindzisa kuphila kwalabahluphekile. Itawubakhulula ekucindzetelweni nasebudloveni.”—Tihlabelelo 72:12-14.

 Fundza lokunyenti ngeMbuso waNkulunkulu, lokunguhulumende wasezulwini loholwa nguJesu. Tfola kutsi ungazuza futsi uwusekele njani loMbuso.

•   Bukela i-video letsi Uyini UMbuso WaNkulunkulu?

•   Fundza sihloko lesitsi “UMbuso WaNkulunkulu—Unguhulumende Lote Inkhohlakalo.”