BONKHE batali bahlanganyela esentweni lokute umuntfu longakhona kusicondza kahle. Ngamunye kubo unikela incenye letsite lephuma emtimbeni wakhe. Ngemuva kwaloko, kulomake kwakheka umntfwana lophelele. Kungako kungamangalisi kutsi nangabe kutalwa umntfwana bantfu batsi “kusimangaliso kutala.”

Kutfola bantfwana kusicalo semtfwalo webatali. Ekucaleni bantfwana batsembela ngalokuphelele kubatali babo, kodvwa njengobe bachubeka bakhula badzinga lokungetulu kwekunakwa kwetidzingo temitimba yabo. Badzinga kusitwa kuze bakhule endleleni yabo yekucabanga, ngekwemivelo, endleleni labatiphatsa ngayo nasebuhlotjeni babo naNkulunkulu.

Kuze bantfwana bakhule kahle, bakudzinga ngalokukhetsekile kutsandvwa batali babo. Nanobe kusho emavi lakhombisa lutsandvo kubalulekile, netento tibalulekile kute tikhombise kuba liciniso kwalawo mavi. Bantfwana badzinga kutsi batali babo babe sibonelo lesihle. Badzinga kucondziswa endleleni yekutiphatsa kanye netimiso lokufanele baphile ngato. Loku bakudzinga kusukela basebancane kakhulu. Tintfo letivisa buhlungu tingenteka futsi tenteka nangabe bantfwana batfola lusito sekwephutile.

Timiso letincono kakhulu longatitfola tiseBhayibhelini. Sicondziso lesisekelwe eBhayibhelini siba nemiphumela lemihle. Nangabe bantfwana baniketwa ticondziso, bayacaphela kutsi loko labatjelwa kona akuveli nje kumuntfu kodvwa kuvela kuMdali wabo longuBabe wabo losezulwini. Loko kwenta seluleko sibe nesisindvo ngendlela lengenakucatsaniswa.

LiBhayibheli likhutsata batali kutsi basebente matima kute bafake timiso letinhle etingcondvweni tebantfwana babo. Nanobe kunjalo, njengobe bantfwana bakhula, kuvame kuba matima ngebatali kukhuluma nabo ngetintfo letibaluleke kakhulu. Lencwadzi letsi Fundza KuMfundzisi Lomuhle Kakhulu, yentelwe  kusita ekuvimbeni kutsi timo letinjalo tingabi khona. Lencwadzi itawunika wena nemntfwana wakho litfuba lekufundza ndzawonye tindzaba letiseBhayibhelini. Ngetulu kwaloko, itawusita kutsi kube nekucocisana emkhatsini webantfwana kanye nalabo labafundza nabo lencwadzi.

Utawucaphela kutsi lencwadzi ifuna umntfwana aphendvule. Kulencwadzi kunemibuto lemihle leminyenti. Nawufika kuyo, utawubona dvwi (—). Lodvwi ukukhumbuta kutsi ubindze sikhashana bese ukhutsata umntfwana kutsi avete umbono wakhe. Bantfwana bayakutsandza kuveta imibono yabo. Nangabe umntfwana angavunyelwa kutsi avete umbono wakhe, usheshe aphelelwe ngumdlandla wekufundza.

Lokubaluleke kakhulu kutsi lemibuto itakusita utfole loko umntfwana lakucabangako. Kuliciniso kutsi umntfwana angase asho imphendvulo lengasiyo. Kodvwa emavi lalandzela umbuto ngamunye entelwe kusita umntfwana kutsi abe nendlela lenhle yekucabanga.

Lenye intfo lekhetsekile lekulencwadzi, titfombe letikuyo letingetulu kwa-230. Titfombe letinyenti talencwadzi tinemagama eceleni lavumela umntfwana kutsi avete umbono wakhe lomayelana naloko lakubonako kanye nalakufundzile. Ngako, cocani ngaletitfombe nemntfwana. Tingaba yindlela lenhle kakhulu yekufundzisa letawugcizelela tifundvo letibalulekile taloko lokufundziswako emntfwaneni.

Nangabe umntfwana afundza kutifundzela, mkhutsate kutsi akufundzele lencwadzi aphindze atifundzele yena. Njengobe achubeka atifundzela lencwadzi, teluleko letinhle letikuyo titawungena tijule engcondvweni nasenhlitiyweni yakhe. Ngako kute ucinise buhlobo nenhlonipho lesemkhatsini wakho nemntfwana, kufanele nifundze lencwadzi ndzawonye futsi loko nikwente njalo.

Tintfo lebekucatjangwa kutsi angeke tize tenteke eminyakeni leminyenti leyendlulile setiyenteka, bantfwana nyalo babona kutiphatsa kabi ngekwemacasi, kusebentelana nemimoya kanye naleminye imikhuba lemibi. Ngako kudzingeka bavikelwe, futsi lencwadzi iniketa teluleko letingagwegwesi kodvwa ngendlela lehloniphekile. Nanobe kunjalo, bantfwana bakudzinga ngalokukhetsekile kucondziswa kuBabe wetfu wasezulwini, Jehova Nkulunkulu longuMtfombo wako konkhe kuhlakanipha. Nguloko Jesu, Umfundzisi Lomuhle Kakhulu labekahlale akwenta. Setsemba kutsi lencwadzi itawusita wena nemndeni wakho kutsi nente kuphila kwenu kujabulise Jehova futsi nibusiswe kuze kube phakadze.