YINI lesingayenta kuze sijabulise Nkulunkulu? Ucabanga kutsi kukhona yini lesingamupha kona?— Jehova utsi: “Tonkhe tilwane tesiganga tami.” Uphindze atsi: “Isiliva yami, negolide ngeyami.” (Tihlabelelo 24:1; 50:10; Hagayi 2:8) Nanobe kunjalo, kukhona lesingamupha kona Nkulunkulu. Yini leyo?—

Jehova uyasivumela kutsi sikhetse kutsi sitamkhonta yini nobe angeke. Akasiphoceleli kutsi sente loko lokufunwa nguye. Asetame kutfola kutsi kungani Nkulunkulu asidala ngendlela yekutsi sikhetse kutsi sitamkhonta yini nobe angeke.

Kungenteka uyalati lirobhothi. Lingumshini lowakhiwe ngendlela yekutsi wente loko lokufunwa ngumuntfu lolentile. Ngako lirobhothi alikwati kutikhetsela kutsi lifuna kwentani. Natsi Jehova ngabe wasenta saba njengemarobhothi. Bekatasenta ngendlela yekutsi sente loko lokufunwa nguye. Kodvwa Nkulunkulu akazange akwente loko. Uyati kutsi kungani?— Phela lamanye emathoyisi anjengemarobhothi. Nakuchafatwa likinobho livele lente loko umakhi walo lalentela kutsi likwente. Uke walibona yini lithoyisi lelinjalo?— Imvamisa bantfu basheshe badzinwe kudlala ngelithoyisi lelenta kuphela loko lelakhelwa kutsi likwente. Nkulunkulu  akafuni kutsi simlalele kube shengatsi singemarobhothi lentelwe kutsi amkhonte. Kodvwa Jehova ufuna simkhonte ngenca yekutsi siyamtsandza futsi sifuna kumlalela.

Ucabanga kutsi Babe wetfu wasezulwini utiva njani nangabe simkhonta ngobe sitsandza?— Ngicela ungitjele, batali bakho bativa njani ngendlela wena lotiphatsa ngayo?— LiBhayibheli litsi indvodzana “lehlakaniphile ijabulisa uyise [wayo],” kodvwa indvodzana lelibele “ikhuba unina” wayo. (Taga 10:1) Uke wanaka yini kutsi nangabe wenta loko make wakho nobe babe wakho lakucela utsi ukwente, bayajabula?— Kodvwa bativa njani nangabe ungabalaleli?—

Nyalo, ase sicabange ngaBabe wetfu losezulwini Jehova. Uyasitjela kutsi singamjabulisa njani. Ngicela utsatse liBhayibheli lakho bese uvula Taga 27:11. Kulombhalo Nkulunkulu ukhuluma natsi, utsi: “Ndvodzana yami [nobe singaphindze sitsi, ndvodzakati yami], hlakanipha, khona ngitewujabula, ngitekwati kuphendvula nome ngabe ngubani longedzelelako.” Uyati yini kutsi kusho kutsini kwedzelela umuntfu?— Umuntfu angase akwedzelele ngekutsi ahlekise ngawe futsi atsi angeke ukhone kwenta loko lotsite ungakhona kukwenta. Sathane umedzelela njani Jehova?— Ase sibone.

Uyakhumbula kutsi eSehlukweni 8 salencwadzi safundza kutsi Sathane ufuna kuba mkhulu kunaNkulunkulu futsi ufuna bonkhe bantfu  balalele yena. Lokukuphela kwesizatfu latsi Sathane ngiso lesenta bantfu bakhonte Jehova kutsi utabanika kuphila lokuphakadze nangabe benta njalo. Ngemva kwekutsi Sathane aphumelele ekwenteni bo-Adamu na-Eva kutsi bangamlaleli Jehova, wabese uhlasela Nkulunkulu. Watsi kuNkulunkulu: ‘Bantfu bakhonta wena ngenca yaloko labakutfola kuwe. Nginike sikhashana nje, ngingabenta bonkhe kutsi bangakukhonti.’

Kuliciniso kutsi lamavi awakabhalwa ngalendlela eBhayibhelini. Kodvwa nasifundza ngaJobe, kuvele kusicacele kutsi Sathane washo emavi lafanana nalawa kuNkulunkulu. Kwetsembeka kwaJobe kuNkulunkulu nobe kungetsembeki kwakhe, bekubalulekile kuSathane nakuJehova. Asivule eBhayibhelini incwadzi yaJobe sehluko sekucala nesesibili kuze sitfole kutsi kwentekani.

Ngicela unake sehluko sekucala kulencwadzi yaJobe kutsi Sathane bekasezulwini ngalesikhatsi tingilosi tiya kuNkulunkulu. Ngako Jehova wabuta Sathane, watsi: “Uphumaphi?” Sathane  wamphendvula ngekutsi bekahambahamba abuka umhlaba. Jehova wase uyambuta: ‘Umbonile yini Jobe, kutsi uyangikhonta futsi kute lokubi lakwentako?’​—Jobe 1:6-8.

Ngaso leso sikhatsi, Sathane watsi: ‘Jobe ukhonta wena kuphela ngobe ute tinkinga. Nawungasusa sivikelo kanye netibusiso takho kuye, utakwetfuka ebusweni bakho.’ Jehova wamphendvula watsi: ‘Kulungile Sathane, ungenta nobe ngabe yini loyifunako kuye, kodvwa ungamlimati Jobe.’​—Jobe 1:9-12.

Yini Sathane labese uyayenta?— Wenta kutsi bantfu bebe tinkhomo netimbongolo taJobe, futsi babulale nebantfu lebebatinakekela. Ngemva kwaloko, umbane washaya, wabulala timvu kanye nebelusi bato. Ngemva kwesikhatsi, kwefika bantfu beba emakamela baphindze babulala nalabantfu labawanakekelako. Ekugcineni Sathane waletsa umoya lomkhulu lowadzilita indlu lebeyinebantfwana baJobe labalishumi kuyo futsi bonkhe bafa. Nangetulu kwato tonkhe letintfo, Jobe wachubeka akhonta Jehova.​—Jobe 1:13-22.

Ngesikhatsi Jehova aphindze abona Sathane, wamtjela kutsi Jobe solo wetsembekile kuye. Sathane wenta taba watsi: ‘Ngicela ungivumele ngilimate umtimba wakhe, utakutfuka ebusweni bakho.’ Ngako Jehova wamvumela Sathane kutsi alimate Jobe kodvwa wamecwayisa kutsi angambulali.

 Sathane wabangela kutsi wonkhe umtimba waJobe uvele ematfumba. Lamatfumba bekanuka kabi futsi kute umuntfu lebekafuna kusondzela kuye. Ngisho nemfati wakhe watsi: “Yetfuka loNkulunkulu wakho, ufe lokungenani!” Nalabo lebebenta shengatsi babangani baJobe bamvakashela futsi bamvisa buhlungu ngekutsi batsi kukhona tintfo letimbi latentile letimbangela kutsi abe naletinkinga. Nangetulu kwaletinkinga nebuhlungu labubangelwe nguSathane, Jobe wachubeka akhonta Jehova ngekwetsembeka.​—Jobe 2:1-13; 7:5; 19:13-20.

Ucabanga kutsi kwetsembeka kwaJobe kwamenta wativa njani Jehova?— Kwamjabulisa, ngobe bekangakhona kutjela Sathane kutsi: ‘Buka Jobe! Ungikhonta ngobe afuna.’ Utamlingisa yini Jobe, umuntfu Jehova lakhonile kubhekisela kuye njengesibonelo lesikufakazelako kutsi Sathane unemanga?— Asingabati kutsi kulilungelo kuniketa imphendvulo kuSathane nakatsi yena angakhona kwenta bantfu bayekele kukhonta Jehova. Jesu nakanjani loko wakutsatsa njengelilungelo.

Umfundzisi Lomuhle Kakhulu akamvumelanga Sathane kutsi ambangele ente tintfo letimbi. Cabanga ngekutsi sibonelo sakhe senta Babe wakhe wajabula kangakanani. Jehova bekangakhomba Jesu bese aphendvule Sathane atsi: ‘Buka iNdvodzana yami! Ichubeke itsembekile kimi ngobe iyangitsandza!’ Cabanga futsi ngendlela Jesu lajabula ngayo ngekwenta inhlitiyo yaBabe wakhe ijabule. Ngenca yaleyo njabulo, Jesu wakhona kubeketelela kufa elugodvweni lwekuhlushwa.​—Hebheru 12:2.

Uyafuna yini kuba njengeMfundzisi wetfu Lomuhle Kakhulu uphindze wente Jehova ajabule?— Nangabe kunjalo, chubeka ufundza ngaloko Jehova lafuna ukwente futsi umente ajabule ngekwenta loko.