UYAKHULUMA yini naJehova Nkulunkulu?— Yena ufuna ukhulume naye. Nawukhuluma naNkulunkulu usuke uthantaza kuye. Jesu bekavame kukhuluma naBabe wakhe losezulwini. Ngaletinye tikhatsi, bekafuna kuba yedvwa nakakhuluma naNkulunkulu. LiBhayibheli litsi ngalelinye lilanga, “wakhuphuka waya entsabeni wayewuthantaza. Nanobe kwasekusebusuku kakhulu, wahlala lapho yedvwana.”​—Matewu 14:23.

Ungaya kuphi kuze uthantaze kuJehova uwedvwana?— Mhlawumbe ungathantaza kuJehova uwedvwana ngembikwekutsi uyolala. Jesu watsi: “Nawuthantaza, ngena ekamelweni lakho, uvale umnyango bese uthantaza kuYihlo.” (Matewu 6:6) Uyathantaza yini kuJehova ngaso sonkhe sikhatsi ngaphambi kwekutsi uyolala?— Nguloko lokufanele ukwente.

 Jesu wathantaza nangesikhatsi analabanye bantfu. Ngesikhatsi umngani wakhe Lazaro afile, Jesu wathantaza akanye nalabanye bantfu eceleni kwelithuna laLazaro. (Johane 11:41, 42) Jesu bekaphindze athantaze nalapho ahlangene nebafundzi bakhe. Wena uyaya yini emihlanganweni lapho kuthantazwa khona?— Kuleyo mihlangano kuvame kutsi kube nemuntfu lomdzala lothantazako. Kufanele ukulalelisise loko lakushoko ngobe usuke athantazela wena kuNkulunkulu. Nawenta njalo, utawukhona kutsi “Amen” nakacedza kuthantaza. Ucabanga kutsi kusho kutsini kutsi “Amen” ekupheleni kwemthantazo?— Kusho kutsi uyawutsandza lomthantazo lowentiwe. Kuphindze kusho kutsi uyavumelana nawo, nekutsi nawe ngumthantazo wakho loyo.

Jesu bekaphindze athantaze nangaphambi kwekutsi adle. Bekambonga Jehova ngekumupha kudla. Wena uyathantaza yini ngaso sonkhe sikhatsi ngaphambi kwekutsi udle?— Kufanele simbonge Jehova ngekusipha kudla ngaphambi kwekutsi sidle. Nangabe udla nalabanye bantfu, lomunye wabo angase athantaze. Kodvwa kutsiwani nangabe udla wedvwa nobe nangabe udla nebantfu labangathantazi kuJehova kuze bambonge?— Nangabe kunjalo, kufanele utithantazele wena.

Kufanele uthantaze ngalokuvakalako yini ngaso sonkhe sikhatsi, nobe Jehova angakhona kuva loko lokushoko ngisho uthantaza ngenhlitiyo?— Imphendvulo yalombuto singayitfola kuloko lokwenteka  kuNehemiya. Bekasikhonti saJehova lebesisebenta esigodlweni sa-Aritahishashita, inkhosi yasePheresiya. Ngalelinye lilanga Nehemiya waphatseka kabi kakhulu ngenca yekutsi bekeve kutsi lubondza lwaseJerusalema, lokulidolobha lelikhulu lebantfu bakubo, beludzilikile.

Ngesikhatsi inkhosi ibuta Nehemiya kutsi yini lebeyimphetse kabi, Nehemiya wacale wathantaza ngenhlitiyo. Ngemuva kwaloko, watjela inkhosi loko lebekumphetse kabi, futsi wacela kutsi imvumele ahambe aye eJerusalema kute ayokwakha lolubondza. Yini leyenteka ngemuva kwaloko?—

Nkulunkulu wawuphendvula lomthantazo waNehemiya. Inkhosi yamvumela Nehemiya kutsi ahambe. Yadzimate yamniketa netingodvo letinyenti kute atisebentise ekwakheni lolubondza. Ngako kuyacaca kutsi Nkulunkulu angayiphendvula imithantazo yetfu, ngisho naleyo lesiyisho ngenhlitiyo.​—Nehemiya 1:2, 3; 2:4-8.

 Asewucabange nganaku. Kufanele ugobe inhloko yakho yini nawuthantaza? Kufanele uguce ngemadvolo yini? Wena ucabangani?— Ngaletinye tikhatsi, Jesu bekaguca ngemadvolo nakathantaza. Ngaletinye, bekema ngetinyawo. Kantsi ngaletinye tikhatsi bekabuka etulu ezulwini, njengobe enta ngesikhatsi athantazela Lazaro.

Ngako-ke, loku kusitjelani?— Kusitjela kutsi indlela lesime ngayo nasithantaza, akusiyo intfo lebalulekile. Ngalesinye sikhatsi kuhle kutsi ugobe inhloko yakho futsi uvale emehlo. Kantsi ngaletinye tikhatsi ungase ufune kuguca ngemadvolo, njengobe kwenta Jesu. Kodvwa ungakhohlwa kutsi singathantaza kuNkulunkulu noma nini, emini nobe ebusuku, futsi utasiva. Intfo lebalulekile ngemthantazo kukholwa kutsi Jehova uyasilalela. Wena uyakholwa yini kutsi Jehova uyayiva imithantazo yakho?—

Yini lesingayisho nasithantaza kuJehova?— Ngisacela ungitjele: Nawuthantaza, yini loyikhuluma naNkulunkulu?— Jehova usiniketa tintfo letinyenti letinhle, futsi ucabanga kutsi ngeke yini kube kuhle kutsi simbonge ngato?— Singambonga ngekudla lasinike kona. Kodvwa uke wambonga yini ngesibhakabhaka, tihlahla letiluhlata kanye netimbali letinhle?— Phela naloko kwadalwa nguye.

Ngalelinye lilanga, bafundzi baJesu bamcela kutsi abafundzise kuthantaza. Ngako uMfundzisi Lomuhle Kakhulu wabafundzisa, futsi wababonisa tintfo letibaluleke kakhulu lebekufanele batithantazele. Uyatati yini letintfo?— Tsatsa liBhayibheli lakho, uvule kuMatewu sehluko 6. Emavesini 9 kuya ku-13, sitfola loko bantfu labanyenti  labakubita ngekutsi nguBabe Wetfu Wasezulwini nobe nguMthantazo WeNkhosi. Ase siwufundze ndzawonye lombhalo.

Kulombhalo sifundza kutsi Jesu utsi asithantazele ligama laNkulunkulu. Utsi asithantazele kutsi ligama laNkulunkulu lingcweliswe, nobe litsatfwe njengalelingcwele. Ngubani ligama laNkulunkulu?— NguJehova, futsi kufanele silitsandze leligama lakhe.

Kwesibili, Jesu usifundzisa kutsi sithantazele kufika kweMbuso waNkulunkulu. LoMbuso ubalulekile ngobe utawuletsa kuthula emhlabeni futsi uwente ube lipharadisi.

Kwesitsatfu, uMfundzisi Lomuhle Kakhulu watsi kufanele sithantazele kutsi intsandvo yaNkulunkulu yentiwe emhlabeni njengobe yentiwa ezulwini. Nangabe sithantazela kutsi loku kwenteke, kufanele sente intsandvo yaNkulunkulu.

Ngemuva kwaloko, Jesu wasifundzisa kutsi sithantazele kudla lesikudzinga ngalelo langa. Waphindze watsi kufanele sicolise kuNkulunkulu nangabe sente tintfo letimbi. Kufanele sicele intsetselelo kuNkulunkulu. Kodvwa ngaphambi kwekutsi asitsetselele, natsi kufanele sitsetselele labanye nangabe basona. Wena, ukutfola kumelula yini kutsetsela labanye?—

Ekugcineni, Jesu watsi kufanele sithantazele kutsi Jehova Nkulunkulu asivikele kulomubi, Sathane Develi. Ngako-ke, konkhe loku kutintfo letinhle lesingatithantazela kuNkulunkulu.

Kufanele sikholwe kutsi Jehova uyayiva imithantazo yetfu. Akukafaneli sigcine ngekumcela kutsi asisite, kodvwa kufanele simbonge ngaso sonkhe sikhatsi. Uyajabula nangabe loko lesikuthantazelako sikusho ngalokusuka enhlitiyweni, nalapho simcela tintfo letikahle. Jehova utawusipha leto tintfo. Uyakukholelwa yini loko?—