WAKE wakucela yini umuntfu lotsite kutsi wente intfo lembi?— Wakuphocelela yini kutsi uyente? Watsi kutawuba mnandzi yini kuyenta nekutsi ayisiyimbi kangako?— Nangabe umuntfu enta loku kitsi, usuke etama kusilinga.

Yini lokufanele siyente nangabe silingwa? Kufanele sisivumele yini lesilingo, bese senta lokubi?— Nasenta njalo ngeke simjabulise Jehova Nkulunkulu. Kodvwa ucabanga kutsi ngubani lotawujabula?— Kutawujabula Sathane Develi.

Sathane usitsa saNkulunkulu nesetfu. Angeke sikhone kumbona ngobe ungumoya. Kodvwa yena uyakwati kusibona. Ngalelinye lilanga Develi wakhuluma naJesu uMfundzisi Lomuhle Kakhulu, futsi wetama kumlinga. Ase sibone kutsi Jesu wentani. Ngemuva kwaloko, sitawukwati kutsi yini lokufanele siyente nasilingwa.

Jesu bekahlale afuna kwenta intsandvo yaNkulunkulu. Loko wakuveta ngalokucacile ngesikhatsi abhajatiswa eMfuleni iJordani. Ngemuva kwekubhajatiswa kwakhe, Sathane wetama kumlinga. LiBhayibheli litsi ‘lizulu lavulekela’ kuJesu. (Matewu 3:16) Loku kungenteka kusho kutsi ngaleso sikhatsi, Jesu wacala kukhumbula tonkhe tintfo letenteka ngesikhatsi asesezulwini naNkulunkulu.

Ngemuva kwekubhajatiswa, Jesu waya ehlane kuze ayewucabanga ngetintfo lebesekatikhumbula.  Wahlala khona emalanga langu-40 nebusuku lobungu-40. Njengobe bekalapho, Jesu akazange adle lutfo, futsi besekalambe kakhulu. Ngaleso sikhatsi Sathane wetama kumlinga.

Develi watsi: “Nangabe uyindvodzana yaNkulunkulu, tjela lamatje ashintje abe tinkhwa.” Besitawuba mnandzi kakhulu lesinkhwa. Kodvwa Jesu bekangakhona yini kugucula ematje abe tinkhwa?— Bekangakhona. Yini lesenta sisho njalo? Kungenca yekutsi Jesu, iNdvodzana yaNkulunkulu, unemandla lamakhulu.

Wena bewutawagucula yini ematje abetinkhwa kube Develi watsi wagucule?— Jesu bekalambile. Ngako ucabanga kutsi bekungeke yini kube yintfo lekahle kutsi awagucule kanye nje kuphela lamatje?— Jesu bekati kutsi akukafaneli asebentise emandla akhe ngaleyondlela. Jehova bekamnike lawo mandla kute ente bantfu bakhonte Nkulunkulu, hhayi kutsi atizuzise yena.

Jesu watjela Sathane loko lokubhalwe eBhayibhelini, kutsi: “Umuntfu ngeke aphile ngesinkhwa sodvwa, kodvwa ngawo onkhe emavi laphuma emlonyeni waJehova.” Jesu bekati kutsi kwenta tintfo letijabulisa Jehova kubaluleke kakhulu kwendlula kudla.

Kodvwa Develi wachubeka amlinga. Watsatsa Jesu waya naye eJerusalema wabese ummisa endzaweni lephakeme yelithempeli. Ngemuva kwaloko watsi: ‘Nangabe  uyindvodzana yaNkulunkulu, tijike phansi. Ngobe kubhaliwe kutsi Nkulunkulu utawutfumela tingilosi takhe kute ungalimali.’

Yini leyenta Sathane kutsi asho loku?— Lamavi wawasho kuze alinge Jesu kutsi ente intfo lengakahlakaniphi. Kodvwa Jesu waphindze wangamlaleli Sathane. Watsi: “Kubhaliwe futsi kutsi: ‘Ungabomlinga Jehova Nkulunkulu wakho.’” Jesu bekati kutsi kuyintfo lembi kulinga Jehova ngekutsi abeke kuphila kwakhe engotini.

Nanobe kunjalo, Sathane akazange ayekele kumlinga. Watsatsa Jesu wamyisa entsabeni lendze kakhulu. Nabefika lapho, wamtjengisa yonkhe imibuso nobe bohulumende bemhlaba nenkhatimulo yabo. Ngemuva kwaloko Sathane watsi kuJesu: “Tonkhe letintfo ngitakunika tona nawungaguca ungikhonte.”

Asewucabange ngaloko lokwashiwo nguDeveli. Yonkhe lemibuso nobe bohulumende bebantfu bebabaSathane mbamba yini?— Jesu akazange amphikise Sathane ngaloko lakusho. Bekatamphikisa kube lemibuso beyingasiyo yakhe. Kuliciniso kutsi Sathane ungumbusi wato tonkhe tive letisemhlabeni. LiBhayibheli lize limbite ngekutsi ‘ngumbusi walelive.’​—Johane 12:31.

Wena bowutakwenta njani kube Develi bekangakutsembisa kukunika lokutsite nangabe ungamkhonta?— Jesu bekati kutsi akukafaneli akhonte Develi ngisho nobe angamtsembisa kumentelani. Ngesizatfu saloko, Jesu watsi: ‘Hamba Sathane! Ngobe liBhayibheli litsi kufanele ukhotsamele Jehova Nkulunkulu futsi nguye yedvwa lokufanele umkhonte.’​—Matewu 4:1-10; Lukha 4:1-13.

Natsi siyahlangabetana netilingo. Ucabanga kutsi ngutiphi letinye tato?— Nasi sibonelo. Kungenteka make wakho ubhake likhekhe lelimnandzi lenitalitfola nasenidlile. Mhlawumbe utakutjela kutsi ungalidli lelikhekhe kuze kube ngulapho sekufike sikhatsi sekudla. Kodvwa kungenteka kutsi sewufile yindlala, ngako ungase ulingeke kutsi ulidle. Utamlalela yini make wakho?— Sathane ufuna kutsi ungamlaleli.

 Khumbula indzaba yaJesu. Naye bekalambe kakhulu. Kodvwa bekati kutsi kujabulisa Nkulunkulu bekubaluleke kakhulu kwendlula kudla. Ukhombisa kutsi ufanana naJesu nangabe wenta loko lotjelwa kona ngumake wakho.

Kungenteka labanye bantfwana bakucele kutsi udle emaphilisi latsite. Bangase batsi lamaphilisi atakwenta utive ujabulile. Kodvwa kungenteka kutsi lamaphilisi atidzakamiva. Angase  akugulise nobe akubulale. Lomunye umuntfu angakunika ligwayi nalo lelinesidzakamiva, bese akuphocelela kutsi ulibheme. Yini longayenta?—

Khumbula loko lokwentiwa nguJesu. Sathane wetama kulinga Jesu kutsi abeke kuphila kwakhe engotini ngekumtjela kutsi atijike ngephandle kwelithempeli. Kodvwa Jesu akazange akwente loko. Yini wena lotayenta nangabe umuntfu lotsite akuphocelela kutsi wente intfo leyingoti?— Jesu akazange amlalele Sathane. Nawe akukafaneli ulalele umuntfu lofuna kukwentisa tintfo letimbi.

Ngalesinye sikhatsi ungase ucelwe kutsi ukhonte sitfombe, lokuyintfo liBhayibheli lelitsi akukafaneli siyente. (Eksodusi 20:4, 5) Kungenteka kutsi lokukhonta sitfombe kuyincenye yemkhosi wesikolwa. Mhlawumbe bangakutjela kutsi ungaseti esikolweni nangabe ungavumi kusikhonta. Yini longayenta?—

Kumelula kwenta intfo lelungile nangabe wonkhe umuntfu ayenta. Kodvwa kwenta lokulungile kungaba matima kakhulu nangabe labanye bantfu bafuna kusentisa tintfo letimbi. Mhlawumbe bangatsi loko labakwentako akusikubi kangako. Kodvwa umbuto lobalulekile ngulotsi: Nkulunkulu utsini ngaloko? Yena wati ncono kunatsi.

Ngako, ngisho nobe labanye bantfu bangatsini, akukafaneli sente tintfo Nkulunkulu latsi timbi. Nasenta njalo, sitawuhlale simjabulisa Nkulunkulu, futsi angeke kwenteke sijabulise Develi.