ASE sitsi umuntfu ukupha sipho lesihle kakhulu. Utativa njani ngaso?— Utawumane utsi uyabonga yini bese uyamkhohlwa lomuntfu lokuphe sona? Nobe utamkhumbula yini loyo muntfu kanye naloko lakwentele kona?—

Jehova Nkulunkulu wasipha sipho lesihle kakhulu. Watfumela iNdvodzana yakhe emhlabeni kutsi itosifela. Uyati kutsi yini leyenta kwadzingeka kutsi Jesu asifele?— Lena yindzaba lebaluleke kakhulu lokufanele siyati.

Njengobe sifundzile eSehlukweni 23, Adamu wona ngesikhatsi angalaleli umyalo waNkulunkulu. Natsi satfola sono ku-Adamu longubabe wetfu sonkhe. Ngako ucabanga kutsi yini lesiyidzingako?— Kusho kutsi sidzinga babe lomusha, longazange ente emaphutsa ngesikhatsi aphila lapha emhlabeni. Ucabanga kutsi ngubani longaba ngubabe wetfu?— Jesu angaba nguye.

Jehova watfumela Jesu emhlabeni kuze abe njengababe wetfu esikhundleni sa-Adamu. LiBhayibheli litsi: “‘Adamu, umuntfu wekucala, waba ngumphefumulo lophilako.’ Adamu wekugcina waba ngumoya lonika kuphila.” Bekangubani Adamu wekucala?— Nguloyo Nkulunkulu lamdala ngelutfuli lwemhlaba. Ngubani Adamu wesibili?— NguJesu. LiBhayibheli liyakusho loko nalitsi: “Umuntfu wekucala uvela emhlabeni futsi wentiwe ngelutfuli; umuntfu wesibili [Jesu] uvela ezulwini.”​—1 Khorinte 15:45, 47; Genesisi 2:7.

Njengobe Nkulunkulu atsatsa kuphila kwaJesu kwasezulwini wakufaka entfombini ligama layo lokunguMariya, Jesu akazange asitfole  sono sa-Adamu. Kungaleso sizatfu Jesu bekangumuntfu lote sono. (Lukha 1:30-35) Nguloko lokwenta lengilosi leyakhuluma ngaJesu kubelusi yatsi: “Lamuhla, nitalelwe uMsindzisi.” (Lukha 2:11) Kodvwa kuze abe nguMsindzisi wetfu, yini lomntfwana longuJesu lebekudzingeka ayente kucala?— Bekudzingeka kutsi akhule abe ngumuntfu lomdzala njenga-Adamu. Ngemuva kwaloko, Jesu bekatawuba ‘ngu-Adamu wesibili.’

Jesu uMsindzisi wetfu, utawuphindze abe ‘nguBabe wetfu Waphakadze.’ Ubitwa njalo eBhayibhelini. (Isaya 9:6, 7) Njengobe Jesu bekete sono, bekangaba ngubabe wetfu esikhundleni sa-Adamu, lowaba nesono ngesikhatsi enta tintfo letimbi. Ngaleyo ndlela, singakhetsa ‘Adamu wesibili’ kutsi abe ngubabe wetfu. Kuliciniso kutsi Jesu lucobo lwakhe uyiNdvodzana yaJehova Nkulunkulu.

Ngekufundza ngaJesu, singakhona kumemukela njengeMsindzisi wetfu. Usakhumbula kutsi yini lesidzinga kusindziswa kuyo?— Sidzinga kusindziswa esonweni nasekufeni lesakutfola ku-Adamu. Kuphila kwakhe lokute sono Jesu lanikela ngako ngenca yetfu, kubitwa ngekutsi yinhlawulo. Jehova wasilungiselela inhlawulo kute sitsetselelwe tono tetfu.​—Matewu 20:28; Roma 5:8; 6:23.

Angitsi asifuni kukukhohlwa loko Nkulunkulu neNdvodzana yakhe labasentele kona?— Jesu wakhombisa balandzeli bakhe indlela lekhetsekile  lengasisita kutsi sikhumbule loko lakwenta. Ase sicoce ngayo.

Ase uticabange usekamelweni lelisetulu endlini leseJerusalema. Kusebusuku. Jesu nebaphostoli bakhe bahleti ngasetafuleni. Kulelitafula, kunenyama yemvu leyosiwe, sinkhwa kanye neliwayini lelibovu. Banesidlo lesikhetsekile. Uyati kutsi kungani?—

Lesidlo bebasentela kukhumbula loko Jehova lakwenta eminyakeni leminyenti leyendlulile ngesikhatsi bantfu bakhe, ema-Israyeli batigcila eGibhithe. Ngaleso sikhatsi, Jehova watsi kubantfu bakhe: ‘Umndeni ngamunye awuhlabe imvu, bese  ubhoca ingati yayo etinsikeni temnyango wayo.’ Wabese utsi: ‘Ngenani etindlini tenu, bese nidla lemvu.’

Ema-Israyeli akwenta loko. Futsi ngalobo busuku, ingilosi yaNkulunkulu beyihambahamba eveni laseGibhithe. Etindlini letinyenti, lengilosi beyibulala umntfwana wekucala. Kodvwa nangabe lengilosi ibona ingati yemvu etinsikeni temnyango, beyivele yendlule. Kuleto tindlu, kute umntfwana lowafa. Faro, inkhosi yaseGibhithe, kwametfusa loko lebekwentiwe ngulengilosi yaJehova. Ngako watsi kuma-Israyeli: ‘Ngiyanikhulula. Hambani lapha eGibhithe!’ Ngaso leso sikhatsi, batsatsa tintfo tabo batibeka etikwemakamela nasetimbongolweni tabo, bahamba.

Jehova bekangafuni kutsi bantfu bakhe bayikhohlwe lendlela labekabakhulule ngayo. Ngako watsi: ‘Kanye ngemnyaka kufanele nidle kudla lokufanana naloku lenikudle lamuhla.’ Babita lesidlo lesikhetsekile ngekutsi liPhasika. Uyati kutsi kungani?— Kungenca yekutsi ngalobo busuku, ingilosi yaNkulunkulu ‘yatengca’ tonkhe tindlu lebetineluphawu lwengati.​—Eksodusi 12:1-13, 24-27, 31.

Jesu nebaphostoli bakhe bebacabanga ngaloku ngesikhatsi badla sidlo seliPhasika. Wabese wenta intfo lebalulekile. Kodvwa ngaphambi kwekutsi ayente, wacosha umphostoli longaketsembeki, Judasi. Ngemuva kwaloko, Jesu watsatsa sinkwa lebesisele, wathantaza futsi wasihlephula wabese usinika bafundza bakhe. Watsi: “Tsatsani nidle.” Waphindze watsi kubo: ‘Lesinkhwa sisho umtimba wami lengitawunikela nanginifela.’

Jesu wabese utsatsa indzebe yeliwayini lelibovu. Nase athantaze kwesibili, wabanika yona watsi: “Natsani kuyo nonkhe.” Wase utsi kubo: ‘Leliwayini lisho ingati yami. Masinyane ngitawucitsa ingati yami kute nitsetselelwe tono tenu. Chubekani nikwenta loku, ningikhumbula.’​—Matewu 26:26-28; 1 Khorinte 11:23-26.

 Ubonile yini kutsi Jesu watsi bafundzi bakhe kufanele bachubeke bakwenta loku kuze bamkhumbule?— Bebangeke basaba nesidlo seliPhasika. Kodvwa kanye ngemnyaka bebatawuba nalesidlo lesikhetsekile kute bakhumbule Jesu nekufa kwakhe. Lesidlo sibitwa ngekutsi Sidlo SeNkhosi Sakusihlwa. Lamuhla sivame kusibita ngekutsi Sikhumbuto. Kungani?— Kungobe sisikhumbuta loko Jesu naBabe wakhe Jehova Nkulunkulu labasentele kona.

Lesinkhwa kufanele sisente sicabange ngemtimba waJesu. Bekatimisele kunikela ngalomtimba wakhe kute sitfole kuphila lokuphakadze. Kutsiwani ngeliwayini lelibovu?— Kufanele lisikhumbute ngekubaluleka kwengati yaJesu. Ibaluleke kakhulu kwendlula ingati yemvu yeliPhasika laseGibhithe. Uyati kutsi kungani?— LiBhayibheli litsi ingati yaJesu ingenta kutsi sitsetselelwe tono tetfu. Ngesikhatsi tonkhe tono tetfu setitsetselelwe, angeke sisagula, siguge futsi sife. Kufanele sicabange ngaloko nasiseSikhumbutweni.

Kufanele yini kutsi bonkhe bantfu badle sinkhwa futsi banatse liwayini eSikhumbutweni?— Naku Jesu lakutjela labo labadlako baphindze banatse liwayini: ‘Nitawuba nencenye embusweni wami niphindze nihlale nami etihlalweni tebukhosi ezulwini.’ (Lukha 22:19, 20, 30) Loku bekusho kutsi bebatawuya ezulwini babe ngemakhosi naJesu. Ngako ngulabo labanelitsemba lekubusa naJesu ezulwini kuphela lokufanele badle lesinkhwa futsi banatse naleliwayini.

Kodvwa ngisho nalabo labangasidli lesinkhwa nobe banatse leliwayini, kufanele babe khona eSikhumbutweni. Uyati kutsi kungani?— Kungenca yekutsi Jesu wasifela sonkhe. Nasiya eSikhumbutweni, sisuke sikhombisa kutsi asikakhohlwa. Siyasikhumbula sipho saNkulunkulu lesihle kakhulu.