NGIYETSEMBA utawuvuma kutsi labanye bantfu baphakeme, bakhulu futsi banemandla kunami nawe. Ucabanga kutsi ngubani lomunye wabo?— NguJehova Nkulunkulu. Ucabangani ngeNdvodzana yakhe lenguMfundzisi Lomuhle Kakhulu? Iphakeme yini kunatsi?— Iphakeme kunatsi.

Jesu waphila naNkulunkulu ezulwini. BekayiNdvodzana lengumoya nome ingilosi. Nkulunkulu watenta yini letinye tingilosi nobe emadvodzana langumoya?— Yebo, wenta letinyenti kakhulu. Letingilosi nato tiphakeme futsi tinemandla lamakhulu kwendlula tsine.​—Tihlabelelo 104:4; Danyela 7:10.

Bekungubani ligama lalengilosi leyakhuluma naMariya?— BekunguGabhriyeli. Watjela Mariya kutsi umntfwanakhe bekatawuba yiNdvodzana yaNkulunkulu. Nkulunkulu wafaka kuphila kwaleNdvodzana yakhe lengumoya kuMariya kuze italwe emhlabeni.​—Lukha 1:26, 27.

Uyasetsemba yini lesimangaliso? Uyakholwa yini kutsi Jesu waphila naNkulunkulu ezulwini?— Jesu washo kutsi waphila naye. Wakwati njani loko? Kungenteka kutsi ngesikhatsi asemncane, Mariya wamcocela ngaloko Gabhriyeli lakusho. Mhlawumbe naJosefa wamtjela Jesu kutsi Nkulunkulu bekanguBabe wakhe mbamba.

 Ngesikhatsi Jesu abhajatiswa, Nkulunkulu wakhuluma asezulwini, watsi: “Lena yiNdvodzana yami.” (Matewu 3:17) Ngebusuku bangembikwekufa kwakhe, Jesu wathantaza watsi: “Babe ngikhatimulise, ungente ngibe seceleni kwakho, futsi ngibe nenkhatimulo lebenginayo live lisengekho.” (Johane 17:5) Jesu wacela kubuyela ezulwini kute aphindze ahlale naNkulunkulu. Bekungenteka njani loko?— Bekungenteka kuphela nangabe Jehova Nkulunkulu bekangaphindze amshintje abe ngumuntfu longumoya nome ingilosi.

Nyalo ngifuna kukubuta umbuto lobalulekile. Ucabanga kutsi tonkhe tingilosi tilungile yini?— Kuke kwaba nesikhatsi lapho tonkhe tingilosi betilungile. Loko bekubangelwa kutsi nguJehova labetidalile futsi konkhe lakwentako kulungile. Kodvwa lenye ingilosi yacala kwenta tintfo letimbi. Kwenteka njani loko?

Kute sitfole imphendvulo yalombuto, ase sikhumbule sikhatsi lapho Nkulunkulu adala indvodza yekucala nemfati wekucala, bo-Adamu na-Eva. Labanye bantfu batsi lendzaba iyinganekwane. Kodvwa uMfundzisi Lomuhle Kakhulu bekati kutsi lendzaba iliciniso.

Ngesikhatsi Nkulunkulu adala bo-Adamu na-Eva, wababeka ensimini lenhle lesendzaweni lebitwa ngekutsi yi-Edeni. Lensimi beyilipharadisi. Bebangaba nebantfwana labanyenti, umndeni lomkhulu baphindze  baphile phakadze ePharadisi. Kodvwa bekunesifundvo lesibalulekile lebekufanele basifundze. Lesifundvo sicocile ngaso. Ase sibone kutsi sisasikhumbula yini.

Jehova watjela bo-Adamu na-Eva kutsi bebangadla tonkhe titselo tetihlahla lebetikulensimi. Kodvwa bekunesihlahla sinye labetsite bangadli kuso. Nkulunkulu wabatjela loko lebekutawenteka nangabe badla kuso. Watsi: ‘Nitakufa nekufa.’ (Genesisi 2:17) Ucabanga kutsi yini bo-Adamu na-Eva lebekufanele bayifundze?—

Bekufanele bafundze kulalela. Kuliciniso kutsi kuze siphile kufanele silalele Jehova Nkulunkulu. Bekungakeneli kutsi bo-Adamu na-Eva bamane batsi batamlalela Nkulunkulu. Bekufanele bakhombise ngetento tabo kutsi batamlalela. Kube bamlalela, bebatawube bakhombisa kutsi bayamtsandza futsi bafuna abe nguMbusi wabo. Ngekwenta njalo, bebatawuphila phakadze ePharadisi. Kube badla kulesihlahla, bekutawukhombisa kutsini?—

Bekutawukhombisa kutsi abambongi Nkulunkulu ngaloko labaphe kona. Kube wena bewulapho, bewutamlalela yini Jehova?— Ekucaleni, bo-Adamu na-Eva bamlalela.  Kodvwa lesinye sidalwa lesiphakeme kunabo sayenga Eva. Samenta wangamlaleli Jehova. Besingubani lesidalwa?—

LiBhayibheli litsi inyoka yakhuluma na-Eva. Kodvwa uyati kutsi inyoka ayikwati kukhuluma. Ngako-ke yini leyayenta yakhuluma?— Lenye ingilosi yenta lenyoka yabonakala shengatsi iyakhuluma. Ecinisweni bekungulengilosi lebeyikhuluma. Lengilosi beseyicale kucabanga tintfo letimbi. Beyifuna bo-Adamu na-Eva bakhonte yona. Beyifuna nekutsi bente tintfo letifunwa ngiyo futsi itsatse nesikhundla saNkulunkulu.

Lengilosi lembi yenta Eva wacabanga emanga. Isebentisa inyoka, yatsi ku-Eva: ‘Nkulunkulu uniyengile. Angeke nife nanidla kulesihlahla. Nitawuhlakanipha njengaYe.’ Wena bewutakukholwa yini loko lokwashiwo ngulenyoka?—

Eva wacala kufuna intfo Nkulunkulu langazange amnike yona. Wadla sitselo salesihlahla lokwatsiwa bangadli kuso. Ngemuva kwesikhatsi, wabese uniketa na-Adamu. Adamu akazange akukholwe loko lokwashiwo ngulenyoka. Kodvwa bekatsandza kakhulu Eva kwendlula Nkulunkulu. Ngako naye wadla kulesihlahla.​—Genesisi 3:1-6; 1 Thimothi 2:14.

 Loko kwaba namiphi imiphumela?— Bo-Adamu na-Eva baba nesono, baguga futsi bafa. Ngenca yekutsi besebanesono, nebantfwababo baba nesono, baguga futsi bafa. Nkulunkulu abecinisile. Kute siphile, kufanele simlalele. (Roma 5:12) LiBhayibheli lisitjela kutsi lengilosi leyayenga Eva nguSathane Develi, futsi litsi letinye tingilosi letacala kwenta tintfo letimbi tibitwa ngekutsi ngemadimoni.​—Jakobe 2:19; Sembulo 12:9.

Ucabanga kutsi yini leyenta lengilosi lelungile leyadalwa nguNkulunkulu yaba yimbi?— Kungenca yekutsi yacala kucabanga tintfo letimbi. Beyifuna kuba yinkhulu kunaNkulunkulu. Beyati kutsi Nkulunkulu watjela Adamu na-Eva kutsi babe nebantfwana, futsi beyifuna bonkhe bayikhonte. Develi ufuna kwenta bonkhe bantfu bangamlaleli Jehova. Ngako wetama kubenta bacabange tintfo letimbi.​—Jakobe 1:13-15.

Develi utsi kute umuntfu lomtsandza mbamba Jehova. Utsi mine nawe asimtsandzi Nkulunkulu futsi asifuni kwenta loko lasitjela kona. Uphindze atsi silalela Jehova kuphela nangabe tintfo tisihambela kahle. Kuliciniso yini loko lakushoko? Sinjalo yini tsine?

UMfundzisi Lomuhle Kakhulu watsi Develi ucala emanga. Jesu wakhombisa kutsi umtsandza mbamba Jehova ngekutsi amlalele. Akazange alalele Nkulunkulu kuphela nangabe tintfo timhambela kahle. Bekahlale amlalela, ngisho nalapho bantfu betama kumenta kutsi angamlaleli. Wetsembeka kuJehova kwaze kwaba ngulapho afa. Kungaleso sizatfu Nkulunkulu amvusa kute aphile phakadze.

Ucabanga kutsi ngubani lositsa setfu lesikhulu?— NguSathane Develi. Ungakhona yini kumbona?— Cha, angeke umbone ngemehlo. Kodvwa siyati kutsi ukhona nekutsi uphakeme futsi unemandla lamakhulu kunatsi. Nanobe kunjalo, ngubani lophakeme kakhulu kwendlula Develi?— NguJehova Nkulunkulu. Ngako siyati kutsi Nkulunkulu utasivikela.