NANGABE bantfwana benta tintfo letinhle, labo lababanakekelako bayajabula. Nangabe intfombatana yenta intfo lenhle, babe wayo uyakujabulela kutjela labanye kutsi: “Lena yindvodzakati yami.” Nobe nangabe umfana enta tintfo letinhle, babe wakhe uyakujabulela kutsi: “Lena yindvodzana yami.”

Jesu bekahlale enta loko lokujabulisa Babe wakhe. Ngako Babe wakhe uyatigcabha ngaye. Usakhumbula kutsi yini Babe waJesu layenta ngalelinye lilanga ngesikhatsi Jesu anebalandzeli bakhe labatsatfu?— Nkulunkulu wakhuluma asezulwini, watsi kubo: “Lena yiNdvodzana yami letsandzekako nalengiyemukele.”​—Matewu 17:5.

Jesu uhlale akujabulela kwenta tintfo letijabulisa Babe wakhe. Uyati kutsi kungani? Kungobe uyamtsandza Babe wakhe. Nangabe umuntfu enta tintfo ngobe kulindzeleke kutsi atente, kuba matima kutenta. Kodvwa nangabe afisa, kuba melula. Kusho kutsini kufisa?— Kusho kufuna kuyenta mbamba intfo letsite.

Ngisho nangesikhatsi Jesu asengaketi emhlabeni, abefuna kwenta nobe ngabe yini Babe wakhe labemcela kutsi ayente. Loko wakwenta ngobe bekamtsandza Babe wakhe, Jehova Nkulunkulu. Jesu bekanendzawo lenhle ezulwini anaBabe wakhe. Kodvwa Nkulunkulu bekanemsebenti lokhetsekile lebekafuna kutsi Jesu awente. Kute Jesu akhone kwenta lomsebenti, bekufanele asuke ezulwini. Bekufanele atalwe emhlabeni abe ngumntfwana. Jesu bekafisa kukwenta loko ngobe Jehova bekafuna akwente.

Kuze Jesu atalwe emhlabeni abe ngumntfwana, kwadzingeka kutsi abe namake. Bekungubani ligama lamake wakhe?— BekunguMariya. Jehova watfuma ingilosi yakhe Gabhriyeli kutsi iyokhuluma naMariya. Gabhriyeli watjela Mariya kutsi abetawuba nemntfwana wemfana.  Lomntfwana bekutawutsiwa nguJesu. Ngubani lebekatawuba ngubabe walomntfwana?— Lengilosi yatsi Jehova Nkulunkulu nguye lotawuba nguBabe walomntfwana. Kungaleso sizatfu Jesu abitwa ngekutsi uyiNdvodzana yaNkulunkulu.

Ucabanga kutsi Mariya wativa njani ngalendzaba?— Mariya washo yini kutsi: “Angifuni kuba ngumake waJesu”? Cha, Mariya bekakulungele kwenta loko lokufunwa nguNkulunkulu. Kodvwa iNdvodzana yaNkulunkulu lesezulwini beyitawutalwa njani emhlabeni ibe ngumtfwana? Indlela Jesu latalwa ngayo beyehluke njani endleleni labanye bantfwana labatalwa ngayo? Uyati yini?—

Nkulunkulu wenta batali betfu bekucala, bo-Adamu na-Eva ngendlela yekutsi bakhone kuhlangana. Ngemuva kwaloko, umntfwana ucala kukhula ngekhatsi kumake wakhe. Bantfu batsi loku kuyamangalisa. Ngiyetsemba nawe uvumelana nabo.

Nkulunkulu wenta intfo lemangalisa kakhulu. Watsatsa kuphila kweNdvodzana yakhe ezulwini wakufaka ngekhatsi kuMariya. Nkulunkulu bekangakaze wakwenta loku, futsi akazange aphindze akwente kusukela lapho. Ngenca yaloku, Jesu wacala kukhula ngekhatsi kuMariya njengobe nalabanye bantfwana bakhula ngekhatsi kubomake wabo. Ngemuva kwaloko, Mariya washada naJosefa.

Kwatsi nasekufika sikhatsi sekutsi Jesu atalwe, boMariya naJosefa bebavakashe edolobheni laseBhetlehema. Kodvwa bekunebantfu labanyenti. Bekute ngisho nendzawo boMariya naJosefa lebebangahlala  kuyo, ngako kwadzingeka kutsi bahlale lapho kubekwa khona tilwane. Mariya wefika wamtalela lapho Jesu, wase umbeka emkhombeni, ngengobe ubona kulesitfombe. Umkhombe yindzawo lapho kufakwa khona kudla kwetinkhomo kanye nekwaletinye tilwane.

Kwenteka tintfo letijabulisako ngalobusuku Jesu latalwa ngabo. Ingilosi yabonakala kulabanye belusi edvute naseBhetlehema. Yabatjela kutsi Jesu bekangumuntfu lobalulekile. Lengilosi yatsi: ‘Nginitjela tindzaba letimnandzi letitawujabulisa bantfu. Lamuhla kutelwe umuntfu lotawusindzisa bantfu.’​—Lukha 2:10, 11.

Lengilosi yatjela labelusi kutsi bebatawutfola Jesu eBhetlehema alele emkhombeni. Ngekushesha ngemuva kwaloko, naletinye tingilosi tahlanganyela nalengilosi yekucala ekudvumiseni Nkulunkulu. Letingilosi tahlabela tatsi: “Akadvunyiswe Nkulunkulu losezulwini, futsi  akube nekuthula emhlabeni kubantfu labemukelwa nguye.”​—Lukha 2:12-14.

Ngesikhatsi letingilosi setihambile, labelusi baya eBhetlehema futsi bamtfola Jesu. Nabefika lapho, batjela Josefa naMariya tonkhe tintfo letinhle lebebativile. Ucabanga kutsi Mariya wajabula kangakanani ngekutsi wavuma kuba ngumake waJesu?

Ngemuva kwesikhatsi, boJosefa naMariya batsatsa Jesu baya edolobheni laseNazaretha. Jesu wakhulela lapho. Ngesikhatsi sekakhulile, wacala umsebenti wakhe lomkhulu wekufundzisa. Lona bekungulomunye wemisebenti Jehova Nkulunkulu labefuna iNdvodzana yakhe iwente emhlabeni. Jesu bekafuna kuwenta lomsebenti ngobe abemtsandza kakhulu Babe wakhe losezulwini.

 Ngaphambi kwekutsi Jesu acale umsebenti wakhe wekuba nguMfundzisi Lomuhle Kakhulu, wabhajatiswa nguJohane Umbhabhatisi eMfuleni iJordane. Kwabese kwenteka intfo lemangalisako. Njengobe Jesu aphuma emantini, Jehova wakhuluma asezulwini, watsi: “Lena yiNdvodzana yami letsandzekako, ngiyemukele.” (Matewu 3:17) Uyajabula yini nangabe batali bakho bakutjela kutsi bayakutsandza?— Singaciniseka kutsi naJesu wajabula.

Jesu bekahlale enta lokulungile. Akazange atente umuntfu langesiye. Akazange atjele bantfu kutsi unguNkulunkulu. Ingilosi Gabriyeli yatjela Mariya kutsi Jesu abetawubitwa ngekutsi yiNdvodzana yaNkulunkulu. NaJesu watsi uyiNdvodzana yaNkulunkulu. Akazange atjele bantfu kutsi wati tintfo letinyenti kwendlula Babe wakhe. Watsi: “Babe mkhulu kunami.”​—Johane 14:28.

Ngisho nasezulwini, ngesikhatsi Babe wakhe amnika umsebenti, Jesu abewenta. Akazange atsi utawenta bese enta lokwehlukile. Bekamtsandza Babe wakhe. Ngako bekakulalela loko Babe wakhe lamtjela kona. Ngesikhatsi Jesu eta emhlabeni, wenta loko Babe wakhe labemtfume kutsi akwente. Akazange asebentise sikhatsi sakhe enta lokunye lokwehlukile. Kungaleso sizatfu Jehova ajabula ngeNdvodzana yakhe.

Angitsi natsi siyafuna kujabulisa Jehova?— Ngako kufanele sikhombise kutsi siyamlalela Nkulunkulu njengobe naJesu enta. Nkulunkulu ukhuluma natsi ngeliBhayibheli. Ucabanga kutsi kungaba kuhle yini kwenta shengatsi silalela Nkulunkulu kodvwa sibe sikholelwa futsi senta tintfo letingashiwo liBhayibheli?— Khumbula kutsi sitakujabulela kujabulisa Jehova nangabe simtsandza mbamba.