ANGITSI SONKHE siyafuna kujabula?— Kodvwa bantfu labanyenti abajabuli. Ucabanga kutsi yini lebenta bangajabuli?— Bentiwa kutsi abati kutsi yini lebangela injabulo sibili. Bacabanga kutsi kuba netintfo letinyenti ngiko lokungabenta bajabule. Kodvwa nase batitfolile, injabulo yabo isheshe iphele.

Umfundzisi Lomuhle Kakhulu watsi ngunaku lokulandzelako lokubangela injabulo sibili: “Kunenjabulo lenyenti ekupheni kunasekwemukeleni.” (Imisebenti 20:35) Ngako-ke, yini lengasenta sijabule?— Kupha labanye tintfo kanye nekubentela lokutsite. Bewukwati yini loko?—

Ase sifundze lokunye ngalendzaba. Jesu washo yini kutsi umuntfu lophiwa sipho angeke ajabule?— Akazange akusho loko. Uyatsandza yini kuphiwa tipho?— Bonkhe bantfu bayakutsandza loko. Siyajabula nasiphiwa tintfo letinhle.

 Kodvwa Jesu watsi sijabula kakhulu nasipha labanye bantfu. Ucabanga kutsi ngubani lophe bantfu tintfo letinyenti kubendlula bonkhe?— NguJehova Nkulunkulu.

LiBhayibheli litsi Nkulunkulu “unika bonkhe bantfu kuphila, umoya, nato tonkhe tintfo.” Usehlisela imvula ezulwini, asikhanyisele ngelilanga kuze titjalo tikhule bese sitfola kudla. (Imisebenti 14:17; 17:25) Kungaleso sizatfu liBhayibheli libita Jehova ngekutsi ‘nguNkulunkulu lojabulako.’ (1 Thimothi 1:11) Kupha labanye ngulenye yetintfo letenta Nkulunkulu ajabule. Natsi singajabula nasipha labanye.

Ucabanga kutsi singabaphani labanye bantfu? Ungatsi singabaphani nje?— Letinye tipho kudzingeka titsengwe. Nangabe ukhetsa sipho lesisesitolo, kutawudzingeka usibhadalele. Ngako nangabe ufuna kupha umuntfu sipho lesinjalo, kutawudzingeka ubeke imali kuze kube ngulapho seyenela leso sipho lofuna kusitsenga.

Akusito tonkhe tipho lokudzingeka utitsenge. Nasi sibonelo, lilanga nalishisa, emanti labandzako avele abe mnandzi. Ngako, nawupha umuntfu lowomile leso sipho, utawuba nenjabulo letfolakala ngekupha.

Mhlawumbe ngalelinye lilanga wena namake wakho ningabhaka emabhisikiti. Kungajabulisa kwenta loko. Kodvwa yini longayenta ngalalamanye emabhisikiti lengakwenta ujabule kakhulu, kunekutsi uwadle onkhe wedvwa?— Lamanye awo ungawapha bangani bakho. Ungatsandza yini kukwenta loko ngaletinye tikhatsi?—

 Umfundzisi Lomuhle Kakhulu kanye nebaphostoli bakhe bebati kutsi kupha kukwenta ujabule. Uyati kutsi babapha ini labanye bantfu?— Babapha intfo lenhle kakhulu kwendlula nobe yini emhlabeni. Bebalati liciniso lelimayelana naNkulunkulu, futsi bakujabulela kucocela labanye letindzaba letimnandzi. Loko bakwenta ngephandle kwekubabhadalisa imali.

Ngalelinye lilanga, umphostoli Pawula nemngani wakhe lomkhulu umfundzi Lukha, bahlangana nalomunye make naye lobekafuna kutfola injabulo yekupha. Bahlangana naye ngasemfuleni. BoPawula naLukha baya lapho ngobe bebavile kutsi leyo ndzawo beyibitwa ngekutsi yindzawo yemthantazo. Babona kutsi bekuliciniso ngobe nabefika khona batfola bomake labathantazako.

Pawula wacala kucocela labomake ngetindzaba letimnandzi letimayelana naJehova Nkulunkulu neMbuso wakhe. Ligama lalomunye wabo bekunguLidiya futsi walalelisisa. Ngemuva kwaloko, Lidiya wafuna kwenta lokutsite kute akhombise kutsi bekatitsandza sibili letindzaba letimnandzi lativile. Ngako watsi kuPawula nakuLukha: “Nangabe nibona kutsi ngetsembekile kuJehova, kotani nitewuhlala endlini yami.” Wabancenga baze bavuma kuya emtini wakhe.​—Imisebenti 16:13-15.

Lidiya wakujabulela kakhulu kuba naletinceku taNkulunkulu emtini wakhe. Bekatitsandza letinceku ngobe tamsita wafundza ngaJehova nangaJesu, nangekutsi bantfu bangaphila njani phakadze. Kwamjabulisa kupha boPawula naLukha kudla kanye nekubalungisela indzawo yekuphumula. Kuphana kwakhe kwamenta wajabula ngobe bekafuna mbamba kupha. Kufanele sikukhumbule loku. Lomunye umuntfu angase asitjele kutsi kufanele siphe. Kodvwa nangabe singafuni kukwenta loko, kupha kwetfu ngeke kusijabulise.

Nasi sibonelo: Ase sitsi unemaswidi. Nangingakutjela kutsi lamanye awo waphe lomunye umntfwana, ungakujabulela yini loko?— Kodvwa ase sitsi uphetse lamaswidi, bese uhlangana nemngani wakho  lomtsandzako, bewungatsandza yini kumupha? Angeke yini kukujabulise kupha umngani wakho ungakacelwa kutsi wente njalo?—

Ngaletinye tikhatsi sitsandza umuntfu kakhulu size sifune kumnika konkhe lesinako. Njengobe lutsandvo lwetfu ngaNkulunkulu lukhula, kufanele sitive ngaleyo ndlela ngaye.

Umfundzisi Lomuhle Kakhulu bekati umfelokati lobekaphuyile naye labetiva ngaleyo ndlela. Wambona ethempelini leliseJerusalema. Bekaphetse tinhlavu letimbili temali, lobekukuphela kwato. Nanobe kunjalo, watifaka totimbili ebhokisini lemnikelo nobe njengesipho ethempelini. Kute lowamtjela kutsi ente njalo. Bantfu labanyenti lebebalapho abazange bakubone loko lakwenta. Loko wakwenta ngobe bekafuna futsi atsandza naJehova. Kwamjabulisa kupha.​—Lukha 21:1-4.

Singapha ngetindlela letinyenti. Tikhona yini tindlela locabanga kutsi singapha ngato?— Nasipha ngesizatfu sekutsi siyatsandza, sitawujabula. Kungaleso sizatfu Umfundzisi Lomuhle Kakhulu atsi kitsi: “Phanini labanye.” (Lukha 6:38) Nasenta njalo, sitawenta labanye bantfu bajabule futsi tsine sitawujabula kakhulu kunabo.