UKUTFOLA kumelula yini kukhonta Jehova?— Umfundzisi Lomuhle Kakhulu watsi angeke kube melula kwenta njalo. Kusasele busuku bunye kutsi Jesu abulawe, watjela baphostoli kutsi: “Nangabe live linitondza, yatini kutsi licale ngekutondza mine lisengakanitondzi nine.”​—Johane 15:18.

Phetro watikhukhumeta ngekutsi atsi ngeke kwenteke amshiye Jesu, kodvwa Jesu watjela Phetro kutsi utamphika tikhatsi letintsatfu ngalobo busuku. Loku ngiko kanye lokwentiwa nguPhetro. (Matewu 26:31-35, 69-75) Intfo lenjalo beyingenteka njani?— Kwenteka ngobe Phetro wafikelwa kwesaba, njengobe kwenteka lokufananako nakulabanye baphostoli.

Uyati kutsi yini leyabangela baphostoli besaba?— Behluleka kwenta intfo letsite lebalulekile. Kufundza ngaloko kungasisita kuze sikhonte Jehova ngisho nobe bantfu bangatsini nobe bangasentani. Kuze sikwati kahle loko, ake sicoce kafishane ngaloko lokwenteka ngebusuku bekugcina Jesu anebaphostoli bakhe.

Kwekucala, bagubha umkhosi weliPhasika bandzawonye. Lesi bekusidlo lesikhetsekile umnyaka nemnyaka lebesentelwe kukhumbuta bantfu baNkulunkulu ngekukhululwa kwabo ekugcilatweni bantfu baseGibhithe. Ngemuva kwaloko Jesu wacalisa lesinye sidlo lesikhetsekile. Lesidlo sitawucoca ngaso kulesinye sehluko lesitako futsi sitawuchaza kutsi lesidlo sisita njani kutsi sikhumbule Jesu. Ngemuva kwaleso sidlo nangemuva kwemavi ekukhutsata baphostoli bakhe, Jesu waya nabo ngephandle ensimini yaseGetsemane. Lena bekuyindzawo lebebayitsandza futsi lebebavame kuyivakashela.

 Jesu wahamba libanga lelifishane ayedvwana ayothantaza kulensimi. Waphindze watjela Phetro, Jakobe kanye naJohane kutsi nabo bathantaze. Kunekutsi bathantaze, balala. Jesu wahamba tikhatsi letintsatfu ayothantaza ayedvwana, futsi wabuya katsatfu watfola Phetro nalaba labanye bafundzi balele. (Matewu 26:36-47) Ucabanga kutsi kungani bekudzingeka bahlale baphaphamele kuthantaza?— Ase sicoce ngaloko.

Judasi Skariyothi bekakhona kuleliPhasika naJesu kanye nalabanye baphostoli entsambama. Njengobe ungakhumbula, Judasi waba lisela. Ngekuhamba kwesikhatsi watsengisa Jesu. Bekayati kahle lendzawo ensimini yaseGetsemane lapho Jesu bekavame kuhlangana khona nebaphostoli bakhe. Ngaleyondlela Judasi weta nemasotja kute abophe Jesu. Ngesikhatsi befika, Jesu wababuta kutsi: “Nifuna bani?”

Lamasotja aphendvula atsi: “Jesu.” Yena bekangesabi kungako aphendvula atsi: “Nginguye.” Emasotja amangala ngesibindzi Jesu lanaso kangangekutsi ahlehlela emuva futsi awa. Ngemuva kwaloko Jesu watsi: “Nangabe nifuna mine, bayekeleni laba.”​—Johane 18:1-9.

Ngesikhatsi emasotja abamba Jesu futsi ambopha, baphostoli besaba baphindze babaleka. BoPhetro kanye naJohane bebafuna kubona kutsi kutawukwentekani, ngako balandzela kancane bakhashanyana. Ekugcineni, Jesu uyiswa ekhaya laKhayafase umphristi lomkhulu. Njengobe Johane atiwa ngumphristi lomkhulu, gadzi wasesangweni uyabavumela kutsi bangene emabaleni banaPhetro.

Baphristi bese bahlangene ndzawonye ekhaya laKhayafase kute bateke lelicala. Bebafuna kutsi Jesu abulawe. Ngaleso sizatfu baletsa bofakazi kute bafakaze emanga ngaye. Bantfu bashaya Jesu ngetibhakela nangetimphama. Njengobe loku kuchubeka kwenteka, Phetro udvutane.

Lenye intfombatanyana kanye nagadzi wasesangweni lowavumela Phetro naJohane kutsi bangene batsi kuPhetro: “Nawe bewuhamba  naloJesu.” Kodvwa Phetro uyaphika kutsi uyamati Jesu. Ngemuva kwesikhashana lenye intfombatana yambona Phetro futsi yatsi kulabo bebalapho: “Lona naye abenaloJesu.” Phetro waphindze waphika kutsi uyamati Jesu. Ngemuva kwesikhashana, licembu lebantfu labona Phetro, futsi latsi kuye: “Vele nawe ungulomunye wabo.” Phetro waphika Jesu kwesitsatfu watsi: “Ngicinisile, angimati lomuntfu!” Phetro waze wafunga watsi ukhuluma liciniso futsi ngaso leso sikhatsi Jesu wagucuka wambuka.​—Matewu 26:57-75; Lukha 22:54-62; Johane 18:15-27.

Ucabanga kutsi yini leyabangela Phetro wacamba emanga?— Wabangelwa kwesaba. Yini leyambangela kutsi esabe? Yini lehluleka kuyenta lebeyitamenta abe nesibindzi? Ase ucabange ngako. Yini leyentiwa nguJesu kuze abe nesibindzi?— Wathantaza kuNkulunkulu, futsi Nkulunkulu wamsita wamupha sibindzi. Khumbula kutsi Jesu watjela Phetro kutsi kufanele athantaze katsatfu, aphindze aphaphame ahlale alindzile. Kodvwa yini lebeyentekile?—

Sikhatsi ngasinye Phetro abehlulwa butfongo. Akathantazanga futsi akahlalanga alindzile. Ngesikhatsi Jesu aboshwa, Phetro  bekangakakulindzeli loko. Nakusatekwa licala, ngesikhatsi Jesu ashaywa futsi kulungiselelwa kutsi abulawe, Phetro wesaba. Noma kunjalo, yini Jesu labetjele baphostoli bakhe kutsi bayente kusasele ema-awa lambalwa kungakenteki loko?— Wabatjela kutsi njengobe live belimnyanyile, nabo belitabanyanya.

Ase sicabange ngalokutsite lokungenteka kutsi kufanana naloko lokwenteka kuPhetro. Ase sitsi usekilasini ngesikhatsi labanye bacala kukhuluma tintfo letimbi ngebantfu labangayishayeli ifulegi indesheni nobe labangawugubhi khisimusi. Kutsiwani nangabe lomunye wabo agucukela kuwe futsi  akubute: “Kuliciniso yini kutsi awuyishayeli ifulegi indesheni?” Mhlawumbe labanye batsi: “Sivile kutsi awumgubhi Khisimusi.” Ungesaba yini kukhuluma liciniso?— Utawulingeka yini uze ucambe emanga njengobe kwenta Phetro?—

Ngemuva kwaloko, Phetro weva buhlungu ngekutsi bekaphike Jesu. Ngesikhatsi alibona liphutsa lakhe waphumela ngephandle futsi wakhala. Kodvwa wabuyela kuJesu. (Lukha 22:32) Ase ucabange ngaloko. Yini lengasisita kute singesabi njengobe kwentaPhetro?— Khumbula, Phetro wehluleka kuthantaza kanye nekuhlala alindzile. Ungatsi yini lesiyidzingako kute sibe balandzeli beMfundzisi Lomuhle Kakhulu?—

Asingabati kutsi sidzinga kuthantaza kuJehova kuze asisite. Ngesikhatsi Jesu athantaza, uyati kutsi yini Nkulunkulu lamentela yona?— Watfumela ingilosi kuze imcinise. (Lukha 22:43) Tingilosi taJehova tingasisita yini?— LiBhayibheli litsi: “Ingilosi yaSimakadze yakha umtsangala lotungeleta labo labamesabako, ibakhulule, iphindze ibavikele.” (Tihlabelelo 34:7) Kuze semukele lusito lwaNkulunkulu kumelwe singagcini nje kuphela ngekuthantaza. Uyati kutsi yini lenye lokumelwe siyente?— Jesu watjela balandzeli bakhe kutsi bahlale baphapheme futsi bahlale balindzile. Yini lengasisita kutsi sente loko?—

Kufanele sikulalele ngekucophelela loko lokufundziswa emihlanganweni yetfu yebuKhristu siphindze sinakisise loko lesikufundza eBhayibhelini. Kufanele siphindze sithantaze njalo kuJehova simcele asisite simkhonte. Nasenta njalo, sitawemukela lusito lekuncoba kwesaba. Ngaleyondlela sitawujabula kakhulu nasitfola sikhatsi sekutjela labanye ngeMfundzisi Lomuhle Kakhulu kanye nangeYise.