YATI yini kutsi kusho kutsini kuba nelubandlululo?— Kuba nelubandlululo kusho kutondza umuntfu ngobe nje angafanani nawe ngelibala lesikhumba nobe akhuluma lolunye lulwimi. Ngako-ke, kubandlulula kusho kungamtsandzi lomunye umuntfu nobe kuba nembono lomubi ngaye ngaphambi kwekutsi umati kahle.

Ucabanga kutsi kulungile yini kungamtsandzi lomunye umuntfu losengakamati kahle, nobe umtondze ngenca yekutsi akafanani nawe ngelibala?— Kubandlulula akukalungi, ngisho nobe kungaba kwaluphi luhlobo. Akukafaneli sibaphatse kabi labanye bantfu ngenca nje yekutsi abafanani natsi ngelibala.

Asewucabange nje ngaloku: Ukhona yini umuntfu lomatiko lonelibala lelingafanani nelakho nobe lokhuluma lolunye lulwimi?— Kungenteka nekutsi kunebantfu lobatiko labangafanani nawe ngenca yekutsi balimala nobe bayagula. Ubaphatsa ngemusa nangelutsandvo yini bantfu labangafanani nawe?—

Nangabe simlalela uMfundzisi Lomuhle Kakhulu, Jesu Khristu, sitawuba nemusa kubo bonkhe bantfu. Akukafaneli kusikhatsate kutsi umuntfu uvela kuliphi live nobe kutsi linjani libala lesikhumba sakhe. Kufanele sibe nemusa kuye. Nanobe bantfu labanyenti bangakukholwa loku, kepha nguloko Jesu lakufundzisa. Ase sicoce ngako.

Lomunye umJuda lobekanelubandlululo, weta kuJesu wambuta, watsi: ‘Yini lokufanele ngiyente kute ngitfole kuphila lokuphakadze?’ Jesu bekati kutsi lomuntfu bekafuna atsi kufanele ube nemusa kubantfu beluhlanga lwakubo kuphela nobe besive sakubo. Ngako-ke, kunekutsi awuphendvule lombuto, Jesu watsi kulendvodza: ‘Umtsetfo waNkulunkulu utsi kufanele senteni?’

Lendvodza yaphendvula yatsi: ‘Kufanele utsandze Jehova Nkulunkulu wakho ngayo yonkhe inhlitiyo yakho futsi kufanele utsandze makhelwane wakho njengobe utitsandza wena.’ Jesu watsi: ‘Uphendvule kahle, ngako chubeka wenta letintfo futsi utawutfola kuphila lokuphakadze.’

Nanobe kunjalo, lendvodza beyingafuni kuba nemusa nobe kutsandza bantfu lebebangafanani nayo. Ngako yazama kubeka taba. Yabuta Jesu, yatsi: “Ngubani vele longumakhelwane wami?” Kungenteka kutsi lendvodza beyifuna Jesu atsi: “Makhelwane wakho bangani bakho,” nobe atsi: “Bantfu labafanana nawe.” Kute aphendvule lombuto, Jesu wacoca indzaba lemayelana nemJuda nemSamariya. Naku lokwenteka.

Indvodza beyehla isuka eJerusalema iya eJerikho. Lendvodza beyingumJuda. Njengobe ihamba, emasela ayibamba. Ayishaya yawela phansi, abese atsatsa imali yayo netimphahla. Lamasela ashaya lendvodza yate yalimala kakhulu, ase ayishiya eceleni kwemgwaco sekusele kancane kutsi ife.

Ngemuva kwesikhashana, kwendlula umphristi kulomgwaco. Wayibona lendvodza lebeyilimele kakhulu. Kube wena bewulapho, yini  lebewutayenta?— Lomphristi wavele wewela, wayohambela ngale kwemgwaco. Akazange eme ngisho nakancane. Kute lakwenta kuze asite lendvodza.

Kusenjalo, lenye indvodza lekholwako yachamuka yehla ngawo lowo mgwaco. BeyingumLevi losebenta ethempelini eJerusalema. LomLevi wema yini kuze asite lendvodza lelimele?— Akazange eme. Naye walingisa lomphristi.

Ekugcineni, kwefika umSamariya. Uyambona yini njengobe eta kulelijika lemgwaco?— Wayibona lendvodza lengumJuda ilele phansi futsi ilimele kakhulu. Khumbula kutsi emaSamariya nemaJuda lamanyenti bekanyanyana. (Johane 4:9) Ngako lomSamariya wayishiya yini lendvodza, wangayisiti? Bekungenteka yini kutsi atsi: “Kungani kufanele ngisite lomJuda? Mosi yena bekangeke angisite kube bekungimi lolimele.”

Nanobe kunjalo, lomSamariya wayibuka lendvodza lebeyilele eceleni kwemgwaco, wayivela buhlungu. Wabona kutsi bekangeke ayishiye lapho, ayiyekele ife. Ngako, wehla kulembongolo bekayigibele, waya kulendvodza, wase usula emanceba ayo. Watsela emafutsa neliwayini kuwo. Loku bekutawusita lamanceba kutsi aphole. Ngemuva kwaloko, wawabhandisha ngendvwangu.

LomSamariya watsatsa lendvodza ngesineke, wayigibelisa embongolweni yakhe. Nakacedza, bahamba behla ngemgwaco befika endzaweni yekulala nobe ehhotela lelincane. Lapho, lomSamariya watfolela lendvodza indzawo yekulala, futsi wayinakekela.

Jesu wase ubuta lendvodza labekhuluma nayo, ­watsi: ‘Ucabanga kutsi ngubani kulaba labatsatfu lowaba ngumakhelwane lomuhle?’ Wena bewungaphendvula njani? Bekungumphristi yini, umLevi nobe bekungumSamariya?—

Lendvodza yaphendvula yatsi: ‘Indvodza leyema futsi yanakekela lendvodza lebeyilimele ngiyo leyaba ngumakhelwane lomuhle.’ Jesu watsi: ‘Ukhulume liciniso. Nawe hamba wente njalo.’​—Lukha 10:25-37.

Lena yindzaba lenhle kakhulu. Yenta kucace kutsi bobani bomakhelwane betfu. Akusibo nje bangani betfu labakhulu kuphela. Akusibo nebantfu labanelibala lesikhumba lelifanana neletfu, nobe labo labakhuluma lulwimi lwetfu. Jesu wasifundzisa kutsi sibe nemusa kubantfu, ngisho nobe bavela kuphi, babukeka njani nobe bakhuluma luphi lulwimi.

NaJehova Nkulunkulu unjalo. Ute lubandlululo. Jesu watsi: ‘Babe wenu losezulwini wenta lilanga liphumele bantfu lababi nalabahle. Uphindze ente imvula inele bantfu labalungile nalabangakalungi.’ Natsi-ke kufanele sibe nemusa kubo bonkhe bantfu, njengaNkulunkulu.​—Matewu 5:44-48.

Kufanele wenteni nawubona lomunye umuntfu alimele?— Kutsiwani nangabe lomuntfu avela kulelinye live, nobe anelibala lesikhumba lelingafanani nelakho? Ngisho kunjalo, ungumakhelwane wakho, futsi kufanele umsite. Nangabe ungeke ukhone kumsita ngenca yekutsi umncane kakhulu, cela lusito kumuntfu lomdzala. Ungacela lusito emaphoyiseni nobe kuthishela. Nawenta njalo, usuke ubonisa umusa njengalendvodza lengumSamariya.

UMfundzisi Lomuhle Kakhulu ufuna sibe nemusa. Ufuna sisite labanye, kungakhatsaliseki kutsi babobani. Kungako acoca indzaba yemSamariya lolungile.