BAKILE yini bakwebela lokutsite?— Wativa kanjani ngaloko?— Loyo lowakwebela ulisela futsi akekho umuntfu lotsandza lisela. Ucabanga kutsi umuntfu wentiwa yini kutsi abe lisela? Utalwa angilo yini?—

Sisandza kufundza kutsi bantfu batalwa banesono. Ngako-ke, sonkhe sinesono. Kodvwa kute umuntfu lotalwa alisela. Lisela lingase livele emndenini lokahle. Batali, bobhuti kanye nabo sisi balo bangase babe bantfu labatsembekile. Kepha sifiso semuntfu sekuba nemali nesekuba netintfo letitsengwa ngemali, singase simente abe lisela.

Ungatsi ngubani lowaba lisela lekucala?— Ase sicabange ngaloko. Umfundzisi Lomuhle Kakhulu abemati loyo muntfu ngalesikhatsi asezulwini. Lelosela beliyingilosi. Njengobe Nkulunkulu enta tonkhe tingilosi taba bete sono, lengilosi yaba njani lisela?— Njengobe sifundzile eSehlukweni 8 salencwadzi, lengilosi beyifuna intfo lebeyingasiyo yayo. Usayikhumbula yini lentfo?—

Ngemuva kwekutsi Nkulunkulu asadale indvodza nemfati wekucala, lengilosi beyifuna kutsi bayikhonte. Beyite lilungelo lekutsi bayikhonte. NguNkulunkulu lobekanelilungelo lekukhontwa. Kodvwa lengilosi yaleba lelo lungelo. Ngekwenta bo-Adamu kanye na-Eva bayikhonte, lengilosi yaba lisela. Yaba nguSathane Develi.

Yini leyenta umuntfu kutsi abe lisela?— Kufisa intfo lengesiyo yakhe. Lesifiso singakhula kakhulu size sente bantfu labalungile bente tintfo letimbi. Ngaletinye tikhatsi, labo bantfu lababa ngemasela abaphindzi bagucuke bente lokuhle. Lomunye wabo bekangumphostoli waJesu. Libito lakhe bekunguJudasi Skariyothi.

 Judasi bekati kutsi kubi kweba ngobe loko bekakufundziswe eMtsetfweni waNkulunkulu kusukela asengumfana lomncane. Bekati kutsi Nkulunkulu wake wakhuluma nebantfu bakhe asezulwini, watsi: ‘Ningebi.’ (Eksodusi 20:15) Ngalesikhatsi Judasi sekakhulile, wahlangana neMfundzisi Lomuhle Kakhulu futsi waba ngulomunye webafundzi bakhe. Ngemuva kwesikhatsi, Jesu wamkhetsa Judasi kutsi naye abe ngulomunye webaphostoli bakhe labangu-12.

Jesu nebaphostoli bakhe bebahamba ndzawonye. Bebadla ndzawonye. Imali lelicembu lebelinayo beliyigcina ebhokisini lemali. Jesu wanika Judasi lelibhokisi kutsi alinakekele. Siyati kutsi lemali beyingasiyo yakhe Judasi. Kepha ingabe uyati kutsi yini Judasi layenta ngemuva kwesikhatsi?—

Judasi wabese ucala kutsatsa imali kulelibhokisi lebekangakafaneli kutsi ayitsatse. Abeyitsatsa lapho labanye bangamboni futsi waze wafuna indlela yekutfola lenyenti. Wabese ucala kucabanga ngemali ngaso sonkhe sikhatsi. Ase sibone kutsi lesifiso lesibi saholelaphi ngembikwekutsi Umfundzisi Lomuhle Kakhulu abulawe.

Mariya, longudzadze wemngani waJesu Lazaro, watsatsa emafutsa ladule kakhulu wagcobisa tinyawo taJesu. Kepha Judasi kwamphatsa kabi loko. Uyati kutsi kungani kwamphatsa kabi?— Kungenca yekutsi watsi lamafutsa ladulile angatsengiswa bese leyo mali iphiwa labeswele. Kodvwa intfo lebekayifuna mbamba Judasi kutfola imali lenyenti lebeyitofakwa ebhokisini, bese utebela yona.​—Johane 12:1-6.

Jesu watjela Judasi kutsi angamhluphi Mariya, ngobe bekente sento semusa. Judasi akuzange kumjabulise loko, wavele wahamba waya kubaphristi labakhulu labebatitsa taJesu. Bebafuna kubopha Jesu, kepha loko bebafuna kukwenta ebusuku kuze bantfu bangababoni.

Judasi watsi kulabaphristi: ‘Nitanginika malini nangingamtsengisa kini?’

 LabaPhristi batsi: ‘Sitakunika tinhlavu telisiliva letingemashumi lamatsatfu.’​—Matewu 26:14-16.

Judasi wayitsatsa lemali. Kwaba shengatsi utsengisa Umfundzisi Lomuhle Kakhulu kulawo madvodza. Uke wakucabanga yini kutsi umuntfu angenta intfo lenjena?— Nguloko-ke lokwentekako lapho umuntfu aba lisela futsi ebe nemali. Loyo muntfu utsandza imali kwendlula labanye bantfu, ngisho naNkulunkulu imbala.

Mhlawumbe nawe utawutsi: ‘Angeke ngitsandze nobe yini kwendlula indlela lengitsandza ngayo Jehova Nkulunkulu.’ Kuyintfo lenhle kutiva kanjalo. Ngalesikhatsi Jesu akhetsa Judasi kutsi abe ngumphostoli wakhe, kungenteka kutsi naJudasi bekativa ngaleyo ndlela nawe lotiva ngayo. Nalabanye lababe tigebengu kungenteka kutsi bake bativa ngendlela lefanako. Ase sicoce ngalabanye babo.

Lomunye wabo bekayinceku yaNkulunkulu, libito lakhe kungu-Akhani, futsi waphila kadzeni uMfundzisi Lomuhle Kakhulu asengakatalwa. Akhani wabona ingubo lenhle, lucetu lwegolide kanye netinhlavu tesiliva. Leto tintfo betingasito takhe. LiBhayibheli litsi letintfo betitaJehova ngobe betitsetfwe etitseni tebantfu baKhe. Kepha Akhani bekatifuna  kakhulu letintfo waze wateba.​—Joshuwa 6:19; 7:11, 20-22.

Nasi lesinye sibonelo. Kadzeni, Jehova wakhetsa Davide kutsi abe yinkhosi yebantfu baka-Israyeli. Ngalelinye lilanga, Davide wacala kubuka umfati lomuhle libito lakhe lokunguBhatisheba. Wachubeka abuka Bhatisheba futsi ngaloko wabese ucabanga kumtsatsa amyise ekhaya lakhe. Kepha Bhatisheba bekangumfati wa-Uriya. Yini Davide lebekufanele ayente?—

Davide bekufanele ayekele kucabanga ngaBhatisheba. Kepha akazange akwente loko. Ngako Davide wamtsatsa waya naye ekhaya lakhe. Ngemuva kwaloko wahlela kutsi kubulawe Uriya. Davide wayentelani intfo lembi kangaka?— Kungobe wachubeka ahawukela umfati lobekangasiye wakhe, kepha lobekawalenye indvodza.​—2 Samuweli 11:2-27.

 Ngesizatfu sekutsi Davide watisola, Jehova wamvumela kutsi aphile. Kepha ngaloko lakwenta Davide waba netinkinga letinyenti. Indvodzana yakhe, lokungu-Absalomu beyifuna kumsusa ekubeni yinkhosi. Ngalesikhatsi bantfu bete kuDavide, Absalomu abebagaca aphindze abange. LiBhayibheli litsi: “Absalomu wateba tonkhe tinhlitiyo temadvodza aka-Israyeli.” Wenta labantfu bafuna yena kutsi abe yinkhosi esikhundleni saDavide.​—2 Samuweli 15:1-12.

Wake wayifuna yini intfo letsite ngendlela Akhani, Davide na-Absalomu labenta ngayo?— Uma lentfo leyo iyalomunye umuntfu, kuyitsatsa ngephandle kwemvume, kweba. Usakhumbula loko lisela lekucala Sathane lebelikufuna?— Belifuna bantfu bakhonte lona esikhundleni sekukhonta Nkulunkulu. Ngalesikhatsi Sathane enta bo-Adamu na-Eva kutsi bamlalele, loko bekukweba.

Uma umuntfu anentfo letsite, unelilungelo lekusho kutsi ngubani latsandza kutsi ayisebentise. Nasi sibonelo: Ungaya kuyodlala nalabanye bantfwana emakhaya akubo. Kungaba yintfo lenhle yini kutsatsa intfo letsite lapho bese uhamba nayo ekhaya lakini?— Angeke kube yintfo lenhle, ngaphandle nangabe make nobe babe walelo khaya akutjela kutsi yitsatse. Uma utsatsa intfo letsite, uhambe nayo uye ekhaya kini ngephandle kwekuyicela, loko kukweba.

Yini lengakulinga ufune kweba?— Kufuna intfo letsite lengasiyo yakho. Ngisho nobe lomunye umuntfu angeke akubone uyitsatsa lentfo, kepha ngubani lokubonako?— NguJehova Nkulunkulu. Futsi kufanele sikhumbule kutsi Nkulunkulu uyakutondza kweba. Ngako-ke lutsandvo ngaNkulunkulu nabomakhelwane bakho lutakusita kutsi ungacali ube lisela.