NKULUNKULU wabeka bo-Adamu na-Eva ensimini yase-Edeni. Nanobe bagcina bangakamlaleli futsi bafile, Nkulunkulu wenta kutsi bantfwana babo lokufaka ekhatsi tsine lesiphila lamuhla sikhone kuphila phakadze ePharadisi. LiBhayibheli liyetsembisa: “Labalungile bayawudla lifa lemhlaba, bahlale kulo kuze kube phakadze.”​—Tihlabelelo 37:29.

LiBhayibheli lisitjela ‘ngemazulu lamasha nemhlaba lomusha.’ (Isaya 65:17; 2 Phetro 3:13) ‘Emazulu’ lakhona lamuhla akhiwa bohulumende bebantfu, kodvwa Jesu Khristu kanye nalabo lababusa naye ezulwini batawakha ‘emazulu lamasha.’ Kutawujabulisa kakhulu ngesikhatsi lamazulu lamasha lokunguhulumende waNkulunkulu wekulunga lonekuthula sewubusa wonkhe umhlaba.

Uyini-ke ‘umhlaba lomusha’?— Umhlaba lomusha kutawuba bantfu labakahle labatsandza Jehova. Kudzingeka ucondze kutsi nangabe liBhayibheli likhuluma ‘ngemhlaba’ lomusha ngalesinye sikhatsi lisuke lisho bantfu labaphila emhlabeni hhayi indzawo labaphila kuyo. (Genesisi 11:1; Tihlabelelo 66:4; 96:1) Loku kusho kutsi bantfu labakha umhlaba lomusha batawuphila lapha emhlabeni.

Umhlaba lokhona nyalo webantfu lababi utawube sewungekho. Khumbula kutsi Zamcolo wangesikhatsi saNowa wacedza bonkhe bantfu lababi emhlabeni. Njengobe sifundzile, lomhlaba lomubi lokhona nyalo utawubhujiswa e-Amagedoni. Manje ase sihlole kutsi kutawuba njani kuphila emhlabeni lomusha waNkulunkulu ngemuva kwe-Amagedoni.

 Uyafisa yini kuphila phakadze ePharadisi emhlabeni lomusha waNkulunkulu lonekuthula?— Kute dokotela longakhona kusenta siphile phakadze. Kute emaphilisi lesingawanatsa langasenta singafi. Yinye kuphela indlela lengasenta siphile phakadze, kutsi sisondzele kuNkulunkulu. UMfundzisi Lomuhle Kakhulu uyasitjela kutsi singakwenta kanjani loko.

Asitsatse emaBhayibheli etfu sivule Johane sehluko 17, vesi 3. Kulombhalo sitfola nankha emavi lashiwo nguMfundzisi Lomuhle Kakhulu: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.”

Ngako, Jesu watsi yini lokudzingeka siyente kuze siphile phakadze?— Kwekucala, kumelwe sifundze ngaBabe wetfu losezulwini, Jehova, kanye nangeNdvodzana yakhe leyanikela ngekuphila kwayo ngenca yetfu. Loku kusho kutsi kudzingeka sitadishe liBhayibheli. Lencwadzi letsi Fundza KuMfundzisi Lomuhle Kakhulu iyasisita kuze sitadishe liBhayibheli.

Kufundza ngaJehova kutasisita njani-ke kutsi siphile phakadze?— Njengobe sidzinga kudla malanga onkhe, kudzingeka sifundze ngaJehova malanga onkhe. LiBhayibheli litsi: ‘Umuntfu ngeke aphile ngesinkhwa sodvwa, kodvwa ngawo onkhe emavi laphuma emlonyeni waJehova.’​—Matewu 4:4.

Kudzingeka sifundze nangaJesu Khristu ngobe Nkulunkulu watfumela iNdvodzana yakhe kuze isuse tono tetfu. LiBhayibheli litsi: “Insindziso ngeke ite ngalomunye umuntfu.” LiBhayibheli liphindze litsi: “Lokholwa yiNdvodzana utawutfola kuphila lokuphakadze.” (Imisebenti 4:12; Johane 3:36) Kusho kutsini kubonisa ‘kukholwa’ kuJesu?— Kusho kutsi siyakholwa mbamba kuJesu nekutsi siyati kutsi angeke sikhone kuphila phakadze ngaphandle kwakhe. Siyakukholwa yini loko?— Nangabe sikukholwa sitawuchubeka sifundza kuMfundzisi Lomuhle Kakhulu malanga onkhe siphindze sente loko lakushoko.

 Lenye yetindlela lesingafundza ngayo kuMfundzisi Lomuhle Kakhulu kutsi sifundze lencwadzi siyiphindze kanyenti, futsi sibuke siphindze sicabange ngato tonkhe titfombe letikuyo. Ake utihlole kutsi ungakhona yini kuphendvula lemibuto lehambisana netitfombe. Ungaphindze ufundze lencwadzi namake wakho nome nababe wakho. Nangabe batali bakho bangekho, yifundze nalabanye bantfu labadzala kanye nalabanye bantfwana. Angeke yini kube yintfo lenhle nawungakhona kusita labanye bafundze kuMfundzisi Lomuhle Kakhulu ngaloko lokudzingeka kutsi bakwente kuze baphile phakadze emhlabeni waNkulunkulu lomusha?—

LiBhayibheli liyasitjela: “Live liyendlula.” LiBhayibheli liphindze lichaze kutsi singaphila njani phakadze emhlabeni lomusha waNkulunkulu. Litsi: “Loyo lowenta intsandvo yaNkulunkulu uhlala kuze kube phakadze.” (1 Johane 2:17) Singaphila njani phakadze emhlabeni lomusha waNkulunkulu?— Singaphila ngekutsi sifundze ngaJehova nangeNdvodzana yakhe letsandzekako, Jesu. Kodvwa kubalulekile kutsi sikwente nobe sikusebentise loko lesikufundzako. Shengatsi kutadisha kwakho lencwadzi kungakusita kutsi ukusebentise loko lokufundzako.