INCENYE 7
Bobani Labachuba Inkholo Yeliciniso?
1. Yini lokufanele siyente kuze sijabulise Nkulunkulu?
NASIFUNA kuba nebuhlobo lobuhle nalobunelutsandvo naNkulunkulu, kufanele sehlukane nenkholo yemanga. Kufanele sichube inkholo yeliciniso. Lamuhla, tigidzi tebantfu emhlabeni tiyakwenta loko.
2. BoFakazi BaJehova basabalele kangakanani, futsi uyini umsebenti wabo?
2 Njengoba liBhayibheli lasho, labakhonta Nkulunkulu ngeliciniso bakha “sicumbi lesikhulu” sebantfu lababuya “etiveni tonkhe, nasemindenini yonkhe, nasemaveni onkhe, nasetilimini tonkhe.” (Sembulo 7:9) Tigidzi taboFakazi BaJehova emaveni langetulu kwa-235 titimisele ngekusita bantfu bafundze ngetindlela taJehova telutsandvo kanye netintfo latifunako kubo.
Kubona Labamkhonta Sibili Nkulunkulu
3. BoFakazi bakhonta bani, futsi ngutiphi tindlela tekukhonta Nkulunkulu labatibalekelako?
3 BoFakazi bayakwemukela kutsi nguJehova yedvwana lokufanele akhontwe. Abatikhotsameli tithico nome titfombe tenkholo. (1 Johane 5:21) Ababakhonti labafile ngekwenta imilindzelo naleminye imisimeto yekubahlonipha letfutfukisa tinkholelo temanga kanye “netimfundziso temadimoni.” (1 Thimothi 4:1) Kepha bayabadvudvuta labashonelwe ngekubachazela kutsi Nkulunkulu wetsembisa kuvusa labafile, baphile emhlabeni lolipharadisi.—Johane 5:28, 29; Imisebenti 24:15.
4. Bantfu baNkulunkulu bakubuka kanjani kusebentisa imilingo?
4 BoFakazi abayisebentisi nani imilingo, abayi etangomeni, nome batsakatse, ngoba bayati kutsi konkhe loku kuvela kuDeveli. Litsemba labo alikho emilingweni kutsi ibavikele, kepha likuJehova.—Taga 18:10.
5. BoFakazi BaJehova “abasibo balelive” ngayiphi indlela?
5 Jesu watsi bafundzi bakhe bebangeke ‘babe balelive.’ (Johane 17:16) Naye lucobo lwakhe wala kungenela tembusave tangaleso sikhatsi. (Johane 6:15) Ngendlela lefanako, boFakazi abangeni kutembusave, abaphakamisi lesinye sive etikwalesinye, futsi abalweli kutfutfuka ngemazinga alelive. Kepha imitselo bayayikhokha futsi bayayilalela nemitsetfo yetindzawo labahlala kuto.—Johane 15:19; Roma 13:1, 7.
6. Ngutiphi ticondziso letilandzelwa tinceku taNkulunkulu macondzana nemshado, futsi yini lengentiwa kuze kugwenywe idivosi?
6 BoFakazi bayatilalela ticondziso tabohulumende, ngiko bakucilikele kutsi imishado yabo iba semtsetfweni. (Thithusi 3:1) Balalela sicondziso saNkulunkulu. Loku kwenta kutsi bangasitsatsi sitsembu. (1 Thimothi 3:2) Ngetulu kwaloko, njengoba tinceku taNkulunkulu tisebentisa timfundziso teliBhayibheli ekuphileni kwato, imishado yato ayikavami kubhidlika.
7. BoFakazi bakhombisa njani kutsi bayatsandzana?
7 BoFakazi bayatsandzana. Kutsandzana kwabo nekutsandza kwabo Nkulunkulu kubahlanganisa ndzawonye ebuzalwaneni sibili, noma nje bachamuka etiveni netinhlanga letahlukahlukene. Nangabe kuba netinhlekelele nome tikhatsi tekweswela, boFakazi basitana ngekushesha. Indlela boFakazi labaphila ngayo sonkhe sikhatsi ikhombisa lutsandvo.—Johane 13:35.
BoFakazi BaJehova bamunye ebuzalwaneni bemhlaba wonkhe
8. Ngumiphi imikhuba lemibi bantfu baNkulunkulu labayibalekelako?
8 Bantfu baJehova balwela kuphila imphilo yekwetsembeka nekulunga. Bayakubalekela kweba, kukhuluma emanga, kutiphatsa lokubi, kudzakwa, nemikhuba yekungetsembeki etindzabeni tebhizinisi. Emadvodza awabashayi bafati bawo. Labanye bebatenta letintfo basengakabi boFakazi, kepha Jehova wabasita bakuyekela. ‘Sebagezwa,’ baba ngulabahlobile emehlweni aNkulunkulu.—1 Khorinte 6:9-11.
Benti Bentsandvo YaNkulunkulu
9. Lenye incwadzi yatsini macondzana nemasontfo akamoya ase-Afrika?
9 Kuyatiwa kutsi tinkholo letinyenti titsi tiphetse liciniso. Titsi loko kufakazelwa timangaliso letitentako. Lenye incwadzi nayikhuluma ngemasontfo akamoya ase-Afrika itsi: “Benti bemilingo netangoma sebatsatselwe indzawo [ngemacembu ebuKhristu lamasha]. . . . Atsi ayaboniswa futsi ente timangaliso. Baphrofethi bawo babona imibono futsi bachaze emaphupho. Basebentisa tiwasho, emafutsa langcwele, umlotsa, emakhandlela, nemphepho kutsi belaphe futsi bavimbele tifo.”
10, 11. Sisho ngani kutsi timangaliso talamuhla atifakazeli kutsi inkholo letsite ivela kuNkulunkulu?
10 Bantfu labakuletinkholo batsi letimangaliso tikhombisa kutsi inkholo yabo ibusiswa nguNkulunkulu. Kepha loko lokutsiwa kutimangaliso akusibo bufakazi bekutsi Jehova uyayemukela leyonkholo. NaSathane uyatinika letinye tikhonti takhe “emandla” ekwenta imisebenti lemangalisako. (2 Thesalonika 2:9) Kantsi futsi liBhayibheli latsi “tiyawuphela” tipho letibuya kuNkulunkulu tekwenta timangaliso, njengekuphrofetha, kukhuluma ngetilwimi, nekuba nelwati lolusimangaliso.—1 Khorinte 13:8.
11 Jesu wecwayisa watsi: “Akusibo bonkhe labatsi kimi: ‘Nkhosi, Nkhosi,’ labayawungena embusweni welizulu, kodvwa ngulabo labenta intsandvo yaBabe losezulwini. Ngalelo langa labanyenti bayakutsi kimi: ‘Nkhosi, Nkhosi, asizange siphrofethe yini ngelibito lakho? Asiwakhiphanga yini emadimoni ngelibito lakho? Asiyentanga yini imisebenti leminyenti nalemikhulu ngelibito lakho?’ Kepha ngiyawubaphendvula ngitsi: ‘Angizange nginati. Sukani kimi, nine benti balokubi!’”—Matewu 7:21-23.
12. Bobani labayawungena eMbusweni welizulu?
12 Kepha-ke, bobani labayawungena eMbusweni welizulu? Ngulabo labenta intsandvo yaJehova.
Bashumayeli BeMbuso WaNkulunkulu
13. Ngumuphi umsebenti Nkulunkulu layale bantfu bakhe kutsi bawente lamuhla, futsi bobani labawentako?
13 Iyini intsandvo yaNkulunkulu ngebantfu bakhe lamuhla? Jesu watsi: “LeliVangeli ngembuso liyawushunyayelwa emhlabeni wonkhe, kuze kube bufakazi etiveni tonkhe.” (Matewu 24:14) Ngiwo umsebenti BoFakazi BaJehova labawenta ngenshisekelo.
14. Uyini uMbuso waNkulunkulu, futsi bobani labatawubusa kuwo?
14 “Emhlabeni wonkhe,” boFakazi BaJehova bamemetela kutsi uMbuso waNkulunkulu unguhulumende wasezulwini lotawubusa umhlaba wonkhe ngekulunga. Bafundzisa kutsi Jehova ubeke Khristu Jesu kutsi abe yiNkhosi yalowoMbuso, waphindze wakhetsa nalabanye bantfu labangu-144 000 kutsi babuse naye.—Danyela 7:14, 18; Sembulo 14:1, 4.
15. Yini letawubhujiswa nguloMbuso?
15 BoFakazi basebentisa liBhayibheli kukhombisa bantfu kutsi uMbuso waNkulunkulu utawubhubhisa lonkhe live laSathane. Itawube seyingekho inkholo yemanga netimfundziso tayo letingamhloniphi Nkulunkulu, kepha letikhatimulisa Develi. (Sembulo 18:8) Nabohulumende bebantfu labaphikisana naNkulunkulu batawube sebangekho!—Danyela 2:44.
16. Bobani labatawuba tikhonti taKhristu Jesu, futsi batawuhlala kuphi?
16 Ngetulu kwaloko, BoFakazi BaJehova bamemetela kutsi Khristu Jesu utawuniketa bonkhe labenta lokufunwa nguNkulunkulu tibusiso letimangalisako. Batawuba tikhonti takhe emhlabeni. LiBhayibheli liyasetsembisa: “Iyamkhulula loyibitako, naloweswele, nalomphofu, nalote umsiti. Inesihe kulababutsakatsaka nalabeswele, isindzise kuphila kwalabeswele.”—Tihlabelelo 72:12, 13.
17. Bobani lokungibo kuphela labashumayela ngeMbuso waNkulunkulu?
17 Kute lelinye licembu lebantfu lelenta intsandvo yaNkulunkulu ngekushumayela tindzaba letinhle teMbuso. BoFakazi BaJehova kuphela labatisa umhlaba wonkhe ngeMbuso waNkulunkulu.