1. Ngukuphi kukhetsa bantfu lokufanele bakwente?

JESU watsi: “Longekho ngakimi, umelene nami.” (Matewu 12:30) Kungaba kutsi singakuJehova nome singakuSathane. Bantfu labanyenti bacabanga kutsi bakhonta Nkulunkulu ngendlela leyemukelekile, kepha liBhayibheli litsi Sathane “[unguMkhohlisi] wemhlaba wonkhe.” (Sembulo 12:9) Tigidzi tebantfu ticabanga kutsi tikhonta Nkulunkulu, kantsi tikhonta Sathane longuDeveli. Bantfu kufanele bakhetse kunye kuloku: Kukhonta Jehova, “Nkulunkulu lowetsembekile,” nome kukhonta Sathane, “[longuyise] wawo onkhe emanga.”—Tihlabelelo 31:5; Johane 8:44.

2. Nguyiphi indlela Sathane letama ngayo kuvimbela bantfu kutsi bakhonte Jehova?

² Kukhetsa kukhonta Jehova kusincumo lesihlakaniphile, lesenta umuntfu emukeleke kuye. Kepha Sathane akajabuli nani ngebantfu labakhonta Nkulunkulu. Esikhundleni saloko, ubaletsela tinkinga, njengekuhlekwa nome kuphikiswa ngulabanye, ngisho nebangani netihlobo. Jesu wecwayisa: “Titsa letinkhulu temuntfu kuyawuba bakabo.”—Matewu 10:36.

3. Ungenta njani nangabe tihlobo takho nebangani tiphikisana nekukhonta kwakho Nkulunkulu?

³ Nakungenteka kuwe loku, ungenta njani? Labanye bantfu bayati kutsi indlela labakhonta ngayo Nkulunkulu ayikalungi, kepha bayangabata kwehlukana nayo. Bacabanga kutsi loko kungasho kutsi sebayilahlile imindeni yabo. Kunengcondvo yini  kucabanga kanjalo? Kube bewungatfola kutsi tihlobo takho tisebentisa tidzakamiva letiyingoti, bewungeke yini uticwayise ngebungoti baloku? Bewungangena yini ube mdvumo munye nato?

4. Joshuwa wawatjelani ema-Israyeli ngendlela yekukhonta Nkulunkulu?

⁴ Joshuwa wakhutsata ema-Israyeli kutsi ehlukane nemasiko aboyisemkhulu nemikhuba yenkholo lengakalungi. Watsi: “Ngako yesabani Simakadze nimkhonte ngekwetsembeka konkhe. Balahleni bonkulunkulu bebakhontwa bokhokho benu ngesheya kweMfula, naseGibhithe, nikhonte Simakadze.” (Joshuwa 24:14) Joshuwa abetsembekile kuJehova, futsi Jehova wambusisa. Natsi nasetsembekile kuJehova, utawusibusisa.—2 Samuweli 22:26.

5. Kudzingeke ngani kutsi umuntfu ehlukane netintfo temilingo?

⁵ Kushiya inkholo yemanga kuphindze kusho kutsi sehlukane netintfo letihambisana nemilingo, njengetiphandla nebuhlalu bekuticinisa, naletinye tintfo letifana naleti. Loku kubalulekile ngoba kukhombisa kutsi setsembele kuJehova ngalokuphelele.

6. EmaKhristu ekucala entani ngetincwadzi tawo temilingo?

⁶ Ake ucabange ngaloko lokwentiwa ngulabanye bantfu ngesikhatsi bakhetsa kungena enkholweni yeliciniso. LiBhayibheli litsi: “Labanyenti balabo lababenemilingo baletsa tincwadzi tabo temilingo ndzawonye batokhela ngemlilo, bonkhe bantfu babuka.”—Imisebenti 19:19.

7. Yini lesingayenta nangabe emadimoni asihlukumeta?

⁷ Kungenteka emadimoni abahluphe labanye nabatsi bacala kukhonta Jehova futsi kutsakatsa, kulumba, naleminye imikhuba yekusebentisa imimoya. Nakwenteka nakuwe loku, thandaza kuJehova uphimisele, ubite ligama lakhe. Jehova utakusita.—Taga 18:10; Jakobe 4:7.

8. EmaKhristu atitsatsa kanjani titfombe letisetjentiswa enkholweni yemanga?

⁸ Labo labafuna kukhonta Jehova akukafaneli bakhonte imifanekiso, tithico, nome titfombe letisetjentiswa enkholweni yemanga, futsi akukafaneli nje babe nato. EmaKhristu sibili ‘aphila ngekukholwa, hhayi ngekubona.’ (2 Khorinte 5:7) Ayawuhlonipha umtsetfo waNkulunkulu lovimbela kutsi kukhontwe nome ngutiphi titfombe.—Eksodusi 20:4, 5.

9. LiBhayibheli liniketa siphi seluleko ngendlela yekutfola kuhlakanipha?

⁹ LiBhayibheli litsi: “Lohambisana nebantfu labahlakaniphile naye ugcina asahlakaniphile.” (Taga 13:20) Nasifuna kuhlakanipha, kufanele sihambe, nome sitihlanganise naboFakazi BaJehova. Ngibo labahamba endleleni leyisa ekuphileni.—Matewu 7:14.

10. BoFakazi BaJehova bangakusita kanjani kutsi ukhonte Nkulunkulu?

¹⁰ BoFakazi banendzaba nebantfu. Kungumsebenti wabo kusita bantfu labanetinhlitiyo letinhle bevisise emaciniso laniketa kuphila lokuphakadze latfolakala eBhayibhelini. Bangakusita ngekufundza nawe liBhayibheli mahhala. Batawuphendvula imibuto yakho futsi bakukhombise indlela yekusebentisa lwati loluseBhayibhelini ekuphileni kwakho.—Johane 17:3.

11. Imihlangano yemaKhristu itakusita njani?

¹¹ Emihlanganweni yabo, levamise kuba semaHholweni eMbuso, utawufundza lokwengetiwe ngetindlela taJehova. Sifiso sakho sekuchuba inkholo yeliciniso sitawukhula. Utawuphindze ufundziswe indlela yekusita labanye bafundze emaciniso laseBhayibhelini.—Hebheru 10:24, 25.

12. Kuthandaza kungakusita njani ukhonte Nkulunkulu?

¹² Usachubeka nekufundza kabanti ngaJehova, lutsandvo lwakho ngetindlela takhe telutsandvo kufanele kube lutawukhula. Sifiso sakho sekwenta lokumjabulisako futsi ubalekele lokungamjabulisi naso kufanele  sikhule. Khumbula kutsi ungaya kuJehova ngemthandazo, umcele akusite wente lokulungile futsi ubalekele lokubi.—1 Khorinte 6:9, 10; Filiphi 4:6.

13. Ungayenta kanjani inhlitiyo yaJehova ijabule?

¹³ Ngekuhamba kwesikhatsi, usachubeka nekukhula etintfweni takamoya, kufanele kube utawusibona sidzingo sekuba nguFakazi waJehova lotiniketele futsi wabhajatiswa. Ngekutihlangasa nebantfu baJehova, utawube wenta inhlitiyo yakhe ijabule. (Taga 27:11) Utawuba ngulomunye webantfu labajabulako Nkulunkulu latsi ngabo: “Ngiyawuhlala [nabo], ngihambe emkhatsini wabo; ngiyawuba nguNkulunkulu wabo, bona bayawuba sive sami.”—2 Khorinte 6:16.