1. Yini letawenteka ‘nasisondzela kuNkulunkulu’?

JEHOVA uyabatsandza labadvumisa yena. Nawumkhonta, utakubusisa nyalo nasesikhatsini lesitako. LiBhayibheli litsi: “Sondzelani kuNkulunkulu, naye utawusondzela kini.”—Jakobe 4:8.

2. Singasondzela njani kuNkulunkulu, futsi loku kutawuyitsintsa kanjani imithandazo yetfu?

² Nawufuna kusondzela kuNkulunkulu, kufanele ufundze liVi lakhe futsi usebentise lokufundzile. Nawuthandaza ngekuvumelana nentsandvo yakhe, Jehova utawuyilalela imithandazo yakho futsi ayiphendvule. Umphostoli Johane wabhala: “Sinesibindzi kutsi nasicela lutfo kuNkulunkulu ngekwentsandvo yakhe, uyasiva. Njengobe sati kutsi uyasiva kunobe yini lesiyicelako, siyati nekutsi sesikunikiwe loko lesikucela kuye.”—1 Johane 5:14, 15.

3-7. Singakutfola njani kuhlakanipha lokuvela kuNkulunkulu, futsi kungasisita kanjani?

³ Nawusachubeka usondzela kuNkulunkulu, yena utakuniketa kuhlakanipha kwekusingatsa tindzaba tekuphila kwamalanga onkhe. LiBhayibheli litsi: “Nangabe emkhatsini wenu kukhona loswele kuhlakanipha, akacele kuNkulunkulu.”—Jakobe 1:5.

⁴ Kuhlakanipha lokuvela kuNkulunkulu kungakusita njani? Kulokunye, kungakusita wati tintfo Jehova langatitsandzi. Ungaphindze wati kutsi timbi ngani letotintfo nekutsi ungentani kute wehlukane nato. Lolwati lungakuvikela etinkingeni letikhatsata linyenti lebantfu. Sibonelo saloku, kutitfoba eselulekweni saNkulunkulu sekutiphatsa kahle kukuvikela ekukhulelweni lokungafunwa, etifweni tekulalana, nasekubeni semshadweni lote injabulo nome lobhidlikako.

⁵ Kuhlakanipha lokuvela kuNkulunkulu kungakwentelani lenye? Kungakwenta ukusebentise kahle kuphila kwakho. Kungakusita wente tincumo letihlakaniphile etindzabeni letinjengekutsi ungayiphatsa njani imali yakho. Kutawukwenta ulandzele imigomo lezuzisako futsi uyekele imigomo lengenalo lusito loluhlala njalo.

⁶ Kuhlakanipha lokuvela kuNkulunkulu kungakusita ube nebudlelwane lobuhle nalabanye. Ungaba nenjabulo leyengetekile emndenini wakho. Ungaba nebungani lobungibo nalabanye, lobungapheli, futsi kukwente uhlonishwe nangulabo labangamkhonti Nkulunkulu.

⁷ Ngetulu kwaloko, kuba nekuhlakanipha lokuvela kuNkulunkulu kutawutfutfukisa indlela lokubuka ngayo kuphila. Kutawuphindze kukusite kutsi usingatse bulukhuni bemphilo nekudvumateka. Utawuphila unelitsemba lelihle ngelikusasa. Loko kungatfutfukisa imphilo yakho, engcondvweni nasemtimbeni.—Taga 14:30; Isaya 48:17.

8. Nawukhonta Nkulunkulu, yini longeke uyesabe?

⁸ Nawukhonta Nkulunkulu sibili, utawukhululeka ekwesabeni lokuhlupha labo labangamkhonti. Njengoba uyati kutsi  labafile emathuneni abaphili, ngeke ubesabe. Angeke wesabe ngisho nekufa, ngoba unalo litsemba lekutsi Nkulunkulu utabavusa labafile. Nekuloywa imbala ngeke ukwesabe ngoba sewuyati kutsi Nkulunkulu unemandla kwendlula nome ngubani lomunye.—Johane 8:32.

9-11. Bobani labatawuphila ePharadisi, futsi bobani labangeke baphile kulo?

⁹ Nangabe sewusondzele kuNkulunkulu, ngeke ulesabe likusasa. Njengoba sifundzile, liBhayibheli lalitibiketele letinkinga lesitibonako lamuhla. Jehova usitjela kutsi tonkhe letintfo tiyendlula; uMbuso wakhe utawenta umhlaba wonkhe ube lipharadisi.—Lukha 21:10, 11, 31; 23:43.

¹⁰ Ngulabasondzela kuJehova futsi bamkhonte kuphela labayophila ePharadisi. LiBhayibheli litsi: “Emvakwesikhashana benti balokubi bayawunyamalala, uyakutsi uyabafuna bangabe basatfolakala. Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.”—Tihlabelelo 37:10, 11.

¹¹ Labangafuni ngemabomu kulalela imitsetfo yaNkulunkulu lelungile batawulahlekelwa kuphila kwabo siphelane. (2 Thesalonika 1:8, 9) Ngeke baphindze babe khona. Labobantfu batawufa phakadze, njengaSathane nemadimoni. (Sembulo 20:10, 14) Labo labafundza ngaJehova futsi bamkhonte bona batawutfola injabulo lenkhulu ePharadisi emhlabeni.

12. Litsini liBhayibheli ngelikusasa?

¹² Jehova ubekele labamtsandzako tintfo letinhle kakhulu. Asewubuke nje kutsi liVi lakhe litsini ngekuphila ePharadisi emhlabeni:

• Inala yekudla: “[Kutawuba] nenala emasimini, lenala isibekele ticongo tetintsaba, kube tiphihli.”—Tihlabelelo 72:16.

• Tindlu letikahle: “Bantfu bayakwakha tindlu, bahlale kuto.”—Isaya 65:21.

• Umsebenti lojabulisako: “Labakhetsiwe bami bayawutijabulisa sikhatsi lesidze ngemisebenti yetandla tabo. Bangeke bashikanekele lite.”—Isaya 65:22, 23.

• Kuphela kwekugula: “Kute lohlala [khona] loyakutsi: ‘Ngiyagula.’”—Isaya 33:24.

• Kuphela kwekukhubateka: “Emehlo etimphuphutse ayawuvuleka, netindlebe tetihhulu tiyawuva. Labachutako bayawusuka emagonso njengenyamatane, nelulwimi lwesimungulu luyawumemeta ngenjabulo.”—Isaya 35:5, 6.

• Kuphela kwebuhlungu, kudzabuka, nekufa: “[Nkulunkulu] uyawesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.”—Sembulo 21:4.

• Kuphela kwemphi: “[Nkulunkulu] uvimba acedze timphi kutsi tichubeke emhlabeni wonkhe jikelele.”—Tihlabelelo 46:9.

• Kuphila lokuphakadze: “Labalungile bayawudla lifa lemhlaba, bahlale [kuwo] kuze kube phakadze.”—Tihlabelelo 37:29.

13. Ngubani lokukuphela kwakhe longenta lomhlaba ube lipharadisi, futsi yini lebangela loko?

¹³ Bantfu abayuze batiletse letintfo leti, kepha Jehova unemandla ekwenta nome yini latsi utayenta. Kute lokungamvimba kutsi ente loko lafuna kukwenta. LiBhayibheli litsi: “Nkulunkulu akehlulwa lutfo.”—Lukha 1:37.

14. Ungayitfola njani indlela leya ekuphileni lokuphakadze?

¹⁴ Ngekusebentisa boFakazi bakhe, Jehova uniketa bantfu emhlabeni wonkhe litfuba ‘lekungena ngelisango lelincane’ futsi bahambe endleleni leya ekuphileni lokuphakadze. Shengatsi ungaba semkhatsini webantfu labajabulako labemukela lesimemo. Chuba inkholo yeliciniso, futsi ujabulele tibusiso taJehova kuze kube phakadze!—Matewu 7:13, 14.