Setfulo
NKULUNKULU UMNINIMANDLA ONKHE uyiNkhosi lebusa indzawo yonkhe. Ungumsekeli wekuphila kwetfu kwanyalo nekwesikhatsi lesitako. Nkulunkulu unemandla ekuniketa umvuzo lomuhle nemandla ekujezisa. Unemandla ekuniketa kuphila nemandla ekukucedza. Nasemukeleka kuye, kutawusihambela kahle, kantsi nasingemukeleki, kutawusihambela kabi. Uyakubona-ke kubaluleka kwekukhonta Nkulunkulu ngendlela layemukelako!
Bantfu bamihibahiba ekukhonteni Nkulunkulu. Nasifananisa inkholo nendlela, besingatsi tonkhe tindlela tekukholwa tiyemukeleka yini kuNkulunkulu? Cha, atemukeleki. Umphrofethi waNkulunkulu longuJesu wachaza kutsi timbili kuphela tindlela. Watsi: “Lisango libanti nendlela ibanti leyisa ekubhujisweni, banyenti labangena ngalo. Kepha lisango lincane nendlela yincane leyisa ekuphileni, nebantfu labayitfolako bambalwa.”—Matewu 7:13, 14.
Timbili kuphela tinhlobo tetinkholo: leya ekuphileni naleya ekubhujisweni. Injongo yalencwajana kutsi ikusite utfole indlela leya ekuphileni lokuphakadze.